ଭୁବନେଶ୍ୱର,୧୭-୯(ବ୍ୟୁରୋ): କିଛିଦିନ ହେବା ନିଷ୍କ୍ରିୟ ହୋଇପଡିଥିବା କଂଗ୍ରେସ ପୁଣିଥରେ ଦଳୀୟ କନ୍ଦଳକୁ ନେଇ ଚର୍ଚ୍ଚାକୁ ଆସିଯାଇଛି। ପ୍ରଦେଶ କଂଗ୍ରେସ କମିଟି(ପିସିସି) ସଭାପତି ନିରଞ୍ଜନ ପଟ୍ଟନାୟକଙ୍କ ବିରୋଧରେ ମନ୍ତବ୍ୟ ରଖିବା ଯୋଗୁ ରବିବାର ଇତିଶ ପ୍ରଧାନଙ୍କୁ ଏନ୍ଏସୟୁଆଇ ଓଡିଶା ଇନ୍ଚାର୍ଜ ମୋଥା ରୋହିତ ପ୍ରାଥମିକ ସଦସ୍ୟ ପଦରୁ ନିଲମ୍ବନ କରିଛନ୍ତି। ଅନ୍ୟପଟେ ନିଲମ୍ବନ ଆଦେଶ ମିଳିବାପରେ ଇତିଶ ପୁଣିଥରେ ନିରଞ୍ଜନଙ୍କ ଉପରେ ବର୍ଷିଛନ୍ତି। ସେ ଯୁଆଡେ ଯିବେ ତାଙ୍କୁ ଅଣ୍ଡା ମାଡ଼ କରାଯିବ ବୋଲି ଇତିଶ କହିଛନ୍ତି। ଅନ୍ୟପଟେ ଏଆଇସିସି ସଦସ୍ୟ ମନୀଷା ତ୍ରିପାଠୀ ସୋମବାର ରାଜ୍ୟ କାର୍ଯ୍ୟାଳୟ ଠାରେ ଖବରଦାତା ସମ୍ମିଳନୀ କରି କହିଛନ୍ତି, ଦଳୀୟ ବିଶୃଙ୍ଖଳାକୁ ଆଧାର କରି ନିଖିଳ ଭାରତ ଛାତ୍ର କଂଗ୍ରେସ ଓଡ଼ିଶା ପ୍ରଭାରୀ ଇତିଶଙ୍କୁ ନିଲମ୍ବନ କରିଛନ୍ତି। ଇତିଶ ନିରଞ୍ଜନଙ୍କ ଚରିତ୍ର ଉପରେ କଟୁ ସମାଲୋଚନା ଓ ବିଭିନ୍ନ ଅଭଦ୍ରୋଚିତ ଭାଷା ପ୍ରୟୋଗ କରିଥିଲେ। ଏନେଇ ଏଆଇସିସି ନିକଟରେ ଅଭିଯୋଗ କରାଯିବ। ଇତିଶଙ୍କୁ ୬ବର୍ଷ ପାଇଁ ବହିଷ୍କାର କରିବାକୁ ଦାବି କରିବୁ। ଏହାସହ ସେମାନେ କ୍ୟାପିଟାଲ ଥାନାରେ ଇତିଶଙ୍କୁ ଗିରଫ କରିବା ଦାବି କରିଛନ୍ତି।