ରଣପୁର,୭ା୧୧(ସ୍ବ.ପ୍ର.): ନୟାଗଡ଼ ଜିଲା ରଣପୁର ବ୍ଲକ କନ୍ଧନୟାଗଡ ପଞ୍ଚାୟତରେ ସ୍ବଚ୍ଛ ଭାରତ ମିଶନରେ ନିର୍ମାଣ ହେଉଥିବା ପାଇଖାନା ଦୁର୍ନୀତିର ବୁଧବାର ତଦନ୍ତ ହୋଇଛି । ବ୍ଲକ କନିଷ୍ଠ ଯନ୍ତ୍ରୀ ରବୀନ୍ଦ୍ର ନାଥ ସାହୁଙ୍କ ନେତୃତ୍ୱରେ ଏକ ୬ଜଣିଆ ଟିମ୍ ତଦନ୍ତ କରି ଫେରିଛନ୍ତି। ତେବେ ଟିମ୍ରେ ୪ ଜଣ ଦୁର୍ନୀତିଗ୍ରସ୍ତ କର୍ମଚାରୀ ସାମିଲ ଥିବାରୁ ତଦନ୍ତର ସ୍ବଚ୍ଛତା ନେଇ ଉଠିଛି ପ୍ରଶ୍ନ। ଯେଉଁମାନେ ଦୁର୍ନୀତିରେ ସମ୍ପୃକ୍ତ ଅଛନ୍ତି ସେମାନେ ତଦନ୍ତ ଦାୟିତ୍ୱରେ ଥିବାରୁ ପ୍ରାରମ୍ଭରୁ ଦୁର୍ନୀତି ଚାପିବାକୁ ପ୍ରୟାସ ଆରମ୍ଭ ହୋଇଛି। ଫଳରେ ଜିଲାପାଳ ଯେଉଁ ଉଚ୍ଚସ୍ତରୀୟ ତଦନ୍ତ ନିର୍ଦ୍ଦେଶ ଦେଇଥିଲେ ତାହା ଫସର ଫାଟିଥିବା ଏଠାରେ ଆଲୋଚନା ହେଉଛି ।
ଅଭିଯୋଗ ଅନୁସାରେ ସ୍ବଚ୍ଛ ଭାରତ ମିଶନରେ ନିର୍ମାଣ ହେଉଥିବା ପାଇଖାନାରେ ୧୨ ହଜାର ଅନୁଦାନ ମିଳୁଛି । ତେବେ ଏଥିପାଇଁ ୩ରୁ ୪ହଜାର ଲାଞ୍ଚ ଦେବାକୁ ପଡୁଛି । ୩ରୁ ୪ ହଜାର ପିସି ଦେଇଥିବା ହିତାଧିକାରୀ ବିଲ୍ ପାଇ ସାରିଲେଣି । ଯେଉଁମାନେ ପିସି ଦେଉ ନାହାନ୍ତି ସେମାନେ ପାଇଖାନା ନିର୍ମାଣ ପରେ ବି ସରକାରୀ ଅନୁଦାନ ପାଉ ନାହାନ୍ତି। କନ୍ଧନୟାଗଡରେ ପ୍ରାୟ ୧୫ ଲକ୍ଷରୁ ଊର୍ଦ୍ଧ୍ୱ ଟଙ୍କା ହରିଲୁଟ୍ ହୋଇ ସାରିଲାଣି । ଏହାର ତଦନ୍ତ ପାଇଁ ସ୍ଥାନୀୟ ଲୋକେ ରଣପୁର ବିଡିଓ, ଜିଲାପାଳଙ୍କୁ ଅବଗତ କରିଥିଲେ। ଅଭିଯୋଗ ପରେ ପାାଇଖାନାରେ ପିସି କାରବାରକୁ ସରପଞ୍ଚ ସ୍ବୀକାର କରି ବ୍ଲକ ଦୁଇ ହଜାର ଟଙ୍କା ନେଉଥିବା କହିଥିଲେ । ସରପଞ୍ଚଙ୍କ ପିସି ସ୍ବୀକାର ସମ୍ପର୍କରେ ଜିଲାପାଳଙ୍କୁ ପଚାରିବାରୁ ସେ ଉଚ୍ଚସ୍ତରୀୟ ତଦନ୍ତ କରାଯାଇ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଥିଲେ। ତେବେ ଦୁର୍ନୀତିରେ ସମ୍ପୃକ୍ତ ଥିବା କର୍ମଚାରୀ ତଦନ୍ତ ଦାୟିତ୍ୱ ନେଇଥିବାରୁ ଅଭିଯୋଗକାରୀ ଅସନ୍ତୋଷ ବ୍ୟକ୍ତ କରିଛନ୍ତି। ସୂଚନାଯୋଗ୍ୟ କନ୍ଧନୟାଗଡ଼ରେ ପାଇଖାନା ଦୁର୍ନୀତି ଶୀର୍ଷକରେ ଗତ ୫ ତାରିଖରେ ଧରିତ୍ରୀରେ ଖବର ପ୍ରକାଶ ପାଇଥିଲା। ଏହା ପରେ ଜିଲାପାଳଙ୍କ ନିର୍ଦ୍ଦେଶରେ ବିଡିଓ ୬ଜଣିଆ କମିଟି ଗଠନ କରିବ ତଦନ୍ତ କରାଇଛନ୍ତି।