ଫୁଲବାଣୀ ଅଫିସ, ୧୮ା୩ – ପ୍ରାଣଘାତୀ କରୋନା ଭୂତାଣୁ ଚାରିଆଡ଼େ ଆତଙ୍କ ଖେଳାଇଛି। ଏହାର ମୁକାବିଲା ପାଇଁ ରାଜ୍ୟ ସରକାର ବିଭିନ୍ନ ପଦକ୍ଷେପ ନେଇଥିବା ବେଳେ କନ୍ଧମାଳ ଜିଲା ପ୍ରଶାସନ ପକ୍ଷରୁ ମଧ୍ୟ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଛି। ମଙ୍ଗଳବାର ଜିଲାପାଳ ତଥା ଜିଲା ମାଜିଷ୍ଟ୍ରେଟ୍ ଡା.ବୃନ୍ଦା ଡି. ଏକ ବୈଠକ ଡାକି ଜିଲାରେ ୧୪୪ ଧାରା ଜାରି କରିଛନ୍ତି। ଏହି ଧାରା ଅନୁସାରେ ସମସ୍ତ ନିୟମ ପାଳନ କରିବାକୁ କୁହାଯାଇଛି।
ସାପ୍ତାହିକ ହାଟ, ନିଜ ଘର ବା ପରିବାର ବ୍ୟତୀତ ଅନ୍ୟ କୌଣସି ସ୍ଥାନରେ ୫ ଜଣରୁ ଅଧିକ ଏକତ୍ରିତ ହୋଇ ପାରିବେନାହିଁ। ଏହି ସମୟରେ ଯାନିଯାତ୍ରା, ଦଣ୍ଡନାଚ, ଅପେରା, ବିବାହ, ବ୍ରତ ଆଦି କାର୍ଯ୍ୟ ହେବନାହିଁ। କଲ୍ୟାଣ ମଣ୍ଡପରେ ଜନସମାଗମ ହେବା ଭଳି କୌଣସି କାର୍ଯ୍ୟ କରାଯିବ ନାହିଁ। ସେହିପରି ରାଲି, ଆନ୍ଦୋଳନ ବନ୍ଦ ରହିବ। ସମସ୍ତ ହୋଟେଲ ଯେଉଁଠି ଲୋକେ ରହୁଛନ୍ତି, ସେଠାରେ ହ୍ୟାଣ୍ଡ ୱାଶ୍, ସାନିଟାଇଜର ଓ ପୃଥକୀକରଣ କକ୍ଷ ରଖିବାକୁ ନିର୍ଦ୍ଦେଶ ଦିଆଯାଇଛି। ଏସ୍ପି, ଉପଖଣ୍ଡସ୍ତରୀୟ ମାଜିଷ୍ଟ୍ରେଟ, ଆଇଆଇସି ନିଜ ଅଞ୍ଚଳରେ ନଜର ରଖିବେ। ଯେଉଁମାନେ ୧୪୪ ଧାରାର ଆଦେଶକୁ ଉଲ୍ଲଂଘନ କରିବେ ସେମାନଙ୍କ ବିରୋଧରେ ଆଇନ ଅନୁସାରେ ଅଭିଯୋଗ ଦାଖଲ କରାଯିବ। କେହି କୌଣସି ଗୁଜବ ସୃଷ୍ଟି କରି ପାରିବେ ନାହିଁ। ଏହି ଆଦେଶକୁ କୋର୍ଟ ରବ୍ଦ ନ କରିବା ପର୍ଯ୍ୟନ୍ତ ବଳବତ୍ତର ରହିବ ବୋଲି କୁହାଯାଇଛି। ଖବରଦାତା ସମ୍ମିଳନୀରେ ଅତିରିକ୍ତ ଜିଲାପାଳ ବସନ୍ତ କୁମାର ସାହୁ, ଜିଲା ମୁଖ୍ୟ ଚିକିତ୍ସା ଓ ଜନସ୍ବାସ୍ଥ୍ୟ ଅଧିକାରୀ ଡ. ରାଜଶ୍ରୀ ପଟ୍ଟନାୟକ ଓ ଆଇଏଏସ୍ ପ୍ରୋବେଶନର ଡା. ଶୁଭଙ୍କର ମହାପାତ୍ର ପ୍ରମୁଖ ଉପସ୍ଥିତ ଥିଲେ।