ଦାରିଙ୍ଗବାଡ଼ି,୧।୪(ଡି.ଏନ୍.ଏ.)- କରୋନା ସଂକ୍ରମଣ ପ୍ରତିହତ ପାଇଁ ପ୍ରଶାସନ ପକ୍ଷରୁ ଲକ୍ଡାଉନକୁ କଡ଼ାକଡ଼ି ପାଳନ କରାଯାଇଛି। ମଙ୍ଗଳବାର ଠାରୁ କନ୍ଧମାଳ-ଗଞ୍ଜାମ ଜିଲାକୁ ସଂଯୋଗ କରୁଥିବା ୫୯ ନଂ. ଜାତୀୟ ରାଜପଥର ଡବେରୀଠାରେ ସୀମାକୁ ସିଲ୍ କରିଦିଆଯାଇଛି। ସେଠାରେ ଦାରିଙ୍ଗବାଡି ପୋଲିସ ପକ୍ଷରୁ କଡା ପ୍ରହରା ଦିଆଯାଉଛି। ମଙ୍ଗଳବାର ବିଳମ୍ବିତ ରାତିରେ ଏକ ମିନି ଟ୍ରାଭଲର୍ସ (ନଂ.ଓଡି୦୨ଏମ୍-୧୪୭୫)ରେ ୩୬ ଜଣ ଯାତ୍ରୀ ଆସୁଥିବାବେଳେ ପୋଲିସ ଗାଡିକୁ ଅଟକାଇଥିଲା। ଯାଞ୍ଚପରେ ନଂ. ୪୪/୨୦ରେ ମାମଲା ରୁଜୁକରି ଚାଳକ ଗଞ୍ଜାମ ଜିଲା ତାରସିଂ ଗ୍ରାମର ମହେନ୍ଦ୍ର ବେହେରା ଏବଂ ହେଲ୍ପର ଗଞ୍ଜାମ ଜିଲା ଜଗନ୍ନାଥ ପ୍ରସାଦ ଥାନା କୁମଣ୍ଡ ଗ୍ରାମର ପିଣ୍ଟୁ ଦାସଙ୍କୁ ଗିରଫ କରାଯାଇଥିବା ଆଇଆଇସି କୌଶିକ ମାଝୀ କହିଛନ୍ତି।
ପ୍ରକାଶ ଯେ, ଭୁବନେଶ୍ୱର ସାଲିଆସାହିରେ ଦାରିଙ୍ଗବାଡ଼ି ଥାନା ଦାସିଂବାଡି ଏବଂ ଡଙ୍ଗାମାଲା ଅଞ୍ଚଳର ୩୪ ଜଣ କାମ କରୁଥିଲେ। ଲକ୍ଡାଉନ ଯୋଗୁ ସେମାନେ ଚାଳକ ଓ ହେଲପରଙ୍କୁ ମିଶାଇ ମୋଟ ୩୬ ଜଣ ଏହି ଗାଡିରେ ଦାରିଙ୍ଗବାଡ଼ି ଫେରୁଥିଲେ। ତେବେ ଭୁବନେଶ୍ୱରରୁ ବାହରିଥିବା ଏହି ଟ୍ରାଭଲର୍ସର ପାସ ରହିଥିବାବେଳେ ଏହାର ଫାଇଦା ନେଇ ଚାଳକ ଅଧିକା ଯାତ୍ରୀ ନେଇ ଦାରିଙ୍ଗବାଡ଼ିରେ ପହଞ୍ଚତ୍ଥିଲେ। ଯାତ୍ରୀ ମାନଙ୍କୁ ଡବେରୀ ଠାରେ ଏକ ବିଦ୍ୟାଳୟରେ ରଖି ରାତିରେ ଖାଇବାକୁ ଦେଇ ରଖାଯିବା ସହ ସ୍ବାସ୍ଥ୍ୟପରୀକ୍ଷା କରାଯାଇଥିଲା।
