ବେଙ୍ଗାଲୁରୁ,୧୩।୨(ପି.ଟି.)- ନ୍ୟୁଜିଲାଣ୍ଡ ବିପକ୍ଷ ଗତ ତୃତୀୟ ଦିନିକିଆ ମ୍ୟାଚ୍ ଅବସରରେ କର୍ନାଟକର ଦୁଇ କ୍ରିକେଟର ଲୋକେଶ ରାହୁଲ ଓ ମନୀଷ ପାଣ୍ଡେ ହିନ୍ଦୀ କିମ୍ବା ଇଂଲିଶ୍ରେ କଥା ନ ହୋଇ ନିଜ ମାତୃ ଭାଷା କନ୍ନଡରେ ବାର୍ତ୍ତାଳପ କରିଥିଲେ। ମ୍ୟାଚ୍ ପ୍ରସାରଣ ବେଳେ ଏହା ଶୁଣିବାକୁ ମିଳିଥିଲା। ଏହା କର୍ନାଟକର କ୍ରିକେଟ ପ୍ରେମୀଙ୍କୁ ଅବଶ୍ୟ ଖୁସି କରିଥିବ। ପଡିଆରେ ଲଗାଯାଇଥିବା ମାଇକ୍ରୋଫୋନରେ ଏହି ଦୁଇ କ୍ରିକେଟରଙ୍କ ବାର୍ତ୍ତାଳାପ ରେକର୍ଡ ହୋଇଥିଲା ଓ ପରେ ଏହାର ପ୍ରସାରଣ କରାଯାଇଥିଲା। ଅନ୍ତିମ ଦିନିକିଆରେ ଗୁରୁତ୍ୱପୂର୍ଣ୍ଣ ସମୟରେ ଦୁହେଁ ନିଜ ଭାଷାରେ କଥା ହୋଇଥିଲେ। ଏହା ଏବେ ଚର୍ଚ୍ଚା ସୃଷ୍ଟି କରିଛି। ଏହି ମ୍ୟାଚ୍ରେ ଭାରତ ପରାସ୍ତ ହୋଇଥିଲା।
‘ଓଡି ଓଡି ବା’ ଅର୍ଥାତ ଆସ ଦୌଡ଼ ବୋଲି ଉଭୟ ପରସ୍ପରକୁ କହିଥିଲେ। ‘ବାରଥିରା’(ତୁମେ ଆସିବ କି), ବେଡ଼ା ବେଡ଼ା (ନା ନା) ଓ ‘ବା ବା’ (ଆସ) ଭଳି ଉଭୟ ବ୍ୟାଟ୍ସମ୍ୟାନ ବ୍ୟବହାର କରିଥିଲେ। ବଡ଼ ପାଟିରେ ଏହି ଶବ୍ଦ ବ୍ୟବହାର କରିଥିଲେ ରାହୁଲ ଓ ପାଣ୍ଡେ, ଯାହାକୁ ଅଣଦେଖା କରିହେବ ନାହିଁ। ବିଶ୍ୱରେ ଥିବା କନ୍ନଡ ଭାଷାଭାଷୀ ଲୋକ ଏହା ଶୁଣି ଅବଶ୍ୟ ଖୁସି ହୋଇଥିବେ। ମ୍ୟାଚ୍ରେ ରାହୁଲ ୧୦୭ ଓ ପାଣ୍ଡେ ୪୨ ରନର ପାଳି ଖେଳିଥିଲେ ଓ ଉଭୟ ପଞ୍ଚମ ଉଇକେଟରେ ୧୦୭ ରନ ସଂଗ୍ରହ କରି ଭାରତର ସ୍କୋରକୁ ୨୯୬ରେ ପହଞ୍ଚାଇଥିଲେ।
ଉଲ୍ଲେଖଥାଉ କି, ପାଣ୍ଡେ ବେଙ୍ଗାଲୁରୁରେ ସ୍କୁଲ ଶିକ୍ଷା ସମାପ୍ତ କରିଥିଲେ ଓ ରାହୁଲ କର୍ନାଟକର ତୁମାକୁରୁରେ ଜନ୍ମ ଗ୍ରହଣ କରିଥିଲେ। ରାହୁଲ ଅବଶ୍ୟ ପରେ ଜୈନ ଜାଭିୟର ବିଶ୍ୱ ବିଦ୍ୟାଳୟରେ ପାଠ ପଢିଥିଲେ। ଅନ୍ତିମ ମ୍ୟାଚ୍ ଜିତି ନ୍ୟୁଜିଲାଣ୍ଡ ୩-୦ରେ ଦିନିକିଆ ସିରିଜ କ୍ଲିନ୍ ସୁଇପ୍ କରିଥିଲା।