ରାୟଗଡ଼ା ଅଫିସ,୧୩।୬: ଦକ୍ଷିଣ ଭାରତରୁ ଶ୍ରମିକ ସ୍ପେଶାଲ ଟ୍ରେନ ଯୋଗେ ଫେରିବାରେ ଲାଗିଛନ୍ତି ପ୍ରବାସୀ। ଶୁକ୍ରବାରଠାରୁ ଶନିବାର ସକାଳ ପର୍ଯ୍ୟନ୍ତ ୬ଟି ସତନ୍ତ୍ର ଟ୍ରେନରେ ବିଭିନ୍ନ ଜିଲାରୁ ପ୍ରାୟ ୭୭୬ ଜଣ ପ୍ରବାସୀ ରାୟଗଡ଼ାରେ ପହଞ୍ଚିଛନ୍ତି । ଶ୍ରମିକ ଟ୍ରେନ (୦୭୭୪୮)ରେ ଆସୁଥିବା ଏକ ଗର୍ଭବତୀ ମହିଳା ଯନ୍ତ୍ରଣା ଅନୁଭବ କରିବାରୁ ସେଠାରେ ଉପସ୍ଥିତ ଥିବା ଅତିରିକ୍ତ ଜିଲାପାଳ ଶରତ ଚନ୍ଦ୍ର ପଣ୍ଡା ଏବଂ ଉପଜିଲାପାଳ ପ୍ରତାପଚନ୍ଦ୍ର ପ୍ରଧାନ ତୁରନ୍ତ ଆମ୍ବୁଲାନ୍ସ ଡ଼କାଇ ତାଙ୍କୁ ସ୍ଥାନୀୟ ମୁଖ୍ୟ ଡାକ୍ତରଖାନରେ ଭର୍ତ୍ତି କରିବାକୁ ନିର୍ଦ୍ଦେଶ ଦେଇଥିଲେ । ଉକ୍ତ ମହିଳା ଏକ କନ୍ୟା ସନ୍ତାନ ଜନ୍ମ ଦେଇଛନ୍ତି। ଉଭୟ ମା’ ଛୁଆ ସୁସ୍ଥ ଥିବା ସ୍ବାସ୍ଥ୍ୟ ବିଭାଗ ପକ୍ଷରୁ ସୂଚନା ଦିଆଯାଇଛି। ପ୍ରବାସୀଙ୍କ ମଧ୍ୟରୁ କେବଳ ନବରଙ୍ଗପୁର ଜିଲାର ୬୦୨ ଜଣ ଥିବା ବେଳେ ରାୟଗଡା ଜିଲାର ୧୮ଜଣ, କନ୍ଧମାଳ ଜିଲାର ୬ ଜଣ ଓ କୋରାପୁଟ ଜିଲାର ୨ଜଣ ପ୍ରବାସୀ ଶ୍ରମିକ ମିଶି ମୋଟ ୭୭୬ଜଣ ପ୍ରବାସୀ ଦୁଇଦିନରେ ଫେରିଛନ୍ତି ।