ମୁମ୍ବାଇ,୧୯।୮: ପ୍ରଶାସକ କମିଟି (ସିଓଏ)ର ନୂଆ ସଦସ୍ୟ ରବୀନ୍ଦ୍ର ଥୋଡ୍ଗେ ଓ ଜେନାରାଲ ମ୍ୟାନେଜର (ଅପରେଶନ) ସବା କରିମ ପୂର୍ବତନ କ୍ରିକେଟରଙ୍କୁ ସ୍ବାର୍ଥ ନିହିତ ଦ୍ୱନ୍ଦ୍ୱ (କନ୍ଫ୍ଲିକ୍ଟ ଅଫ୍ ଇଣ୍ଟରେଷ୍ଟ) ସମ୍ପର୍କରେ ଆଲୋଚନା କରିବା ପାଇଁ ସୋମବାର ବୈଠକ ଡକାଇଛନ୍ତି। କେତେଜଣ ପୂର୍ବତନ କ୍ରିକେଟର ଏହି ବୈଠକରେ ଯୋଗଦେବା ଲାଗି ଇଚ୍ଛା ପ୍ରକାଶ କରିଥିବାବେଳେ ବ୍ୟାଟିଂ କିମ୍ବଦନ୍ତୀ ସଚିନ ତେନ୍ଦୁଲକର ଯୋଗ ଦେବାକୁ ମନା କରିଦେଇଛନ୍ତି। ପୂର୍ବତନ ଭାରତୀୟ ଅଧିନାୟକ ଅନିଲ କୁମ୍ବଲେ ଯୋଗଦେଇ ନ ପାରନ୍ତି। ଜୁନିୟର ଭାରତୀୟ ଦଳର କୋଚ୍ ଓ ଜାତୀୟ କ୍ରିକେଟ ଏକାଡେମୀ (ଏନ୍ସିଏ) ମୁଖ୍ୟ ରାହୁଲ ଡ୍ରାଭିଡ୍ ଯୋଗଦେବାର ସମ୍ଭାବନା ରହିଛି। ଏହି ବୈଠକରେ ବାହାରିବାକୁ ଥିବା ନିଷ୍କର୍ଷ ଓ ପୂର୍ବତନ ଖେଳାଳିଙ୍କ ମତ ସୁପ୍ରିମକୋର୍ଟରେ ଉପସ୍ଥାପନ କରାଯିବ। ନ ହେଲେ ବୌଠକର ମୂଲ୍ୟ କିଛି ରହିବ ନାହିଁ। କିନ୍ତୁ ମିଳିଥିବା ସୂଚନା ମୁତାବକ ବହୁ ପୂର୍ବତନ କ୍ରିକେଟର ବୈଠକ ନେଇ ଚିନ୍ତିତ। ଏଣୁ ସେମାନେ ଯୋଗ ଦେବେ କି ନାହିଁ ଚିନ୍ତା କରୁଛନ୍ତି। ସିଓଏ ଅଧ୍ୟକ୍ଷ ବିନୋଦ ରାଇ ଦେଶରେ ନ ଥିବାରୁ ବୈଠକରେ ଯୋଗଦେଇ ପାରିବେ ନାହିଁ। ରାଇଙ୍କ ସାଥୀ କର୍ମକର୍ତ୍ତା ତଥା କମିଟିରେ ଥିବା ଏକମାତ୍ର କ୍ରିକେଟର ଡାଇନା ଇଡୁଲଜି ବୈଠକରେ ଯୋଗଦେବା ନେଇ କୌଣସି ସ୍ପଷ୍ଟ ସୂଚନା ଦିଆଯାଇ ନାହିଁ। ପୂର୍ବତନ ଅଧିନାୟକ ସୌରଭ ଗାଙ୍ଗୁଲି, ଡ୍ରାଭିଡ୍, ସଚିନ, ଭିଭିଏସ୍ ଲକ୍ଷ୍ମଣଙ୍କ ଭଳି ପୂର୍ବତନ ଖେଳାଳିଙ୍କ ବିରୋଧରେ କନଫ୍ଲିକ୍ଟ ଅଫ୍ ଇଣ୍ଟରେଷ୍ଟ ଆସିଛି।