ନୂଆଦିଲ୍ଲୀ, ୫ା୨: ଦିଲ୍ଲୀର ଶାହିନ୍ବାଗରେ ଗତ ସପ୍ତାହରେ ହୋଇଥିବା ସିଏଏ ବିରୋଧୀ ବିକ୍ଷୋଭ ବେଳେ ଗୁଳି ଫୁଟାଇ ଗିରଫ ହୋଇଥିବା ୨୩ ବର୍ଷୀୟ କପିଲ ଗୁଜ୍ଜର ଏଏପି ସଦସ୍ୟ ବୋଲି ପୋଲିସ କହିଛି। କ୍ରାଇମ୍ ବ୍ରାଞ୍ଚର ବରିଷ୍ଠ ଅଧିକାରୀ ରାଜେଶ୍ ଦେଓ କହିଛନ୍ତି, ତଦନ୍ତ ପରେ କପିଲଙ୍କ ଫୋନ୍ରୁ ଏହି ତଥ୍ୟ ମିଳିଛି। ଜେରାବେଳେ କପିଲ ଓ ତାଙ୍କ ପିତା ଚୌଧୁରୀ ଗଜେ ସିଂ ୨୦୧୯ରେ ଏଏପିରେ ଯୋଗ ଦେଇଥିବା ସ୍ପଷ୍ଟ ହୋଇଛି। ପ୍ରକାଶଥାଉ କି, ପୂର୍ବତନ ବିଏସ୍ପି ନେତା ଗଜେ ସିଂ ୨୦୦୮ ଓ ୨୦୧୨ରେ ଦିଲ୍ଲୀ ବିଧାନସଭା ନିର୍ବାଚନ ଓ ପୌର ନିର୍ବାଚନ ଲଢ଼ିଥିଲେ। କେଜ୍ରିଓ୍ବାଲଙ୍କ ଏଏପିରେ ଗତବର୍ଷ ବାପା-ପୁଅ ଯୋଗ ଦେଇଥିବା ସ୍ପଷ୍ଟ ହୋଇଛି ବୋଲି ପୋଲିସ କହିଛି। ଏଠାରେ ଉଲ୍ଲେଖଯୋଗ୍ୟ, କପିଲ ସିଏଏ ବିରୋଧୀ ବିକ୍ଷୋଭ ସ୍ଥଳ ନିକଟରେ ଦୁଇଟି ଗୁଳି ଫୁଟାଇଥିଲେ ହେଁ କେହି ମୃତାହତ ହୋଇ ନ ଥିଲେ। ଏହା ପରେ ପୋଲିସ ସଙ୍ଗେ ସଙ୍ଗେ ତାଙ୍କୁ କାବୁକରି ନେଇଥିଲା।
