ଥିରୁଭାନନ୍ତପୁରମ୍,୨୫।୮: କେରଳରେ ଅନ୍ତିମ ସଂସ୍କାର ସମୟରେ ଉଠାଯାଇଥିବା ଏକ ଫଟୋ ସୋସିଆଲ ମିଡିଆରେ ଭାଇରାଲ ହେଉଛି। ଫଟୋରେ ମୃତକଙ୍କ ପରିବାର ସଦସ୍ୟମାନେ କଫିନ ଚାରିପାଖରେ ବସି ହସି ହସି କ୍ୟାମେରା ଆଗରେ ପୋଜ ଦେଉଥିବା ଦେଖାଯାଉଛି। ଏହି ଫଟୋ ଭାଇରାଲ ପରେ ସମ୍ପୃକ୍ତ ପରବାର ଟ୍ରୋଲର ଶିକାର ହୋଇଛନ୍ତି।
ଏହି ଭାଇରାଲ ଫଟୋ ପଠାନଥିଟ୍ଟା ଜିଲାର ମାଲାପଲ୍ଲୀ ଗାଁର ଅଟେ। ଅଗଷ୍ଟ ୧୭ରେ ଏଠାରେ ଏକ ପରିବାରର ୯୫ ବର୍ଷିୟା ମରିୟମଙ୍କ ପରଲୋକ ଘଟିଥିଲା। ତାଙ୍କ ଅନ୍ତିମ ସଂସ୍କାରରେ ଅତିକମ୍ରେ ୪୦ ଜଣ ପରିବାର ସଦସ୍ୟ ଏକାଠି କଫିନ ନିକଟରେ ଫଟୋ ପୋଜ୍ ଦେଇଥିଲା। ଏହି ସମୟରେ ସମସ୍ତଙ୍କ ମୁହଁରେ ହସ ଥିଲା।ଏହି ଫଟୋ ସୋସିଆଲ ମିଡିଆରେ ଭାଇରାଲ ହେବା ପରେ ଲୋକେ ଭିନ୍ନ ଭିନ୍ନ ମତ ଦେଇଥିଲେ। କେରଳ ମନ୍ତ୍ରୀ ମଧ୍ୟ ଏହି ଫଟୋ ଦେଖି ନିଜ ମନ୍ତବ୍ୟ ଦେଇଥିଲେ।
ବୟସ ଓ ସ୍ବାସ୍ଥ୍ୟ କାରଣରୁ ମରିୟମ ପ୍ରାୟ ଏକ ବର୍ଷ ହେବଶଯ୍ୟାଶାୟୀ ଥିଲେ। ତାଙ୍କର ୯ ସନ୍ତାନ ଏବଂ ୧୯ ଜଣ ନାତୁଣୀନାତୀ ଅଛନ୍ତି। ଦେଶ ତଥା ବିଶ୍ୱର ବିଭିନ୍ନ ସ୍ଥାନରେ ସେମାନେ ରୁହନ୍ତି। କିନ୍ତୁ ସେମାନଙ୍କ ମଧ୍ୟରୁ ଅଧିକାଂଶ ଘରେ ରହୁଥିଲେ।
ଫଟୋ ଭାଇରାଲ ହେବା ପରେ ମରିୟମଙ୍କ ଜଣେ ସମ୍ପର୍କୀୟ କହିଥିଲେ ଯେ, ପରିବାର ଏହି ଫଟୋକୁ ଭାଇରାଲ କରିବାକୁ ଆଦୌ ଚାହୁଁ ନ ଥିଲେ। ମରିୟମ ୯୫ ବର୍ଷ ପର୍ଯ୍ୟନ୍ତ ଖୁସିରେ ଜୀବନ ଅତିବାହିତ କରିଥିଲେ ଏବଂ ତାଙ୍କର ସମସ୍ତ ପିଲା ଏବଂ ନାତୁଣୀନାତୀଙ୍କୁ ଭଲ ପାଉଥିଲେ। ପରିବାର ତାଙ୍କ ସହ ବିତାଇଥିବା ମୂହୁର୍ତ୍ତଗୁଡ଼ିକୁ ମନେ ରଖିବା ପାଇଁ ଫଟୋ ଉଠାଯାଇଥିଲା। ଆମେ ତାଙ୍କୁ ଖୁସି ଖୁସିରେ ବିଦା କରିବାକୁ ଚାହୁଁଥିଲୁ।
କେରଳ ଶିକ୍ଷା ମନ୍ତ୍ରୀ ଭି ଶିବାନକୁଟ୍ଟୀ ଏହି ପରିବାର ସପକ୍ଷରେ ନିଜ ମତ ନେଇଥିଲେ। ସେ ଫେସବୁକରେ କହିଛନ୍ତି, ମୃତ୍ୟୁ ଯନ୍ତ୍ରଣାଦାୟକ ଅଟେ। କିନ୍ତୁ ଏହା ମଧ୍ୟ ଏକ ବିଦାୟ। ଯେଉଁମାନେ ଖୁସିରେ ଜୀବନଯାପନ କରୁଛନ୍ତି ସେମାନଙ୍କୁ ହସି ହସି ବିଦାୟ ଦେବା ଅପେକ୍ଷା ଅଧିକ ଆନନ୍ଦଦାୟକ କ’ଣ ହୋଇପାରେ। ଏହି ଫଟୋଟି କୌଣସି ନକାରାତ୍ମକ କମେଣ୍ଟ ଦେବାର ଆବଶ୍ୟକତା ନାହିଁ।