ଢେଙ୍କାନାଳ ଅଫିସ, ୧୫।୪ – ବିଶ୍ୱକୁ ଘରେ ଭିତରେ ବନ୍ଦୀ କରି ରଖିଛି କରୋନା। ଘରୁ ବାହାରିଲେ ଘାରୁଛି ସଂକ୍ରମଣ ଭୟ। ସଂକ୍ରମଣ କମାଇବାକୁ ଜାରି ହୋଇଛି ଲକ୍ଡାଉନ୍। ‘ଜିତିବ ଦେଶ, ହାରିବ କରୋନା’ ଲକ୍ଷ୍ୟ ନେଇ କାର୍ଯ୍ୟ କରୁଛନ୍ତି ସରକାର। ଏପରି ଜଟିଳ ସମୟରେ କରୋନା ସଚେତନତାର ନୀରବ ଯୋଦ୍ଧା ସାଜିଛନ୍ତି ଢେଙ୍କାନାଳର ଯୁବକବି ଅବନୀ ମିଶ୍ର। ତାଙ୍କଦ୍ୱାରା ଲିଖିତ କରୋନା ସମ୍ପର୍କିତ ସଚେତନତାମୂଳକ କବିତା ଏବେ ସୋସିଆଲ ମିଡିଆରେ ସାଉଁଟୁଛି ଅଜସ୍ର ପ୍ରଶଂସା।
ରଥଗଡ଼ା ଅଞ୍ଚଳରେ ରହୁଥିବା ଅବନୀ ହେଉଛନ୍ତି ବହୁମୁଖୀ ପ୍ରତିଭାର ଅଧିକାରୀ। ଗୀତିକାର, ସ୍ତମ୍ଭକାର ଏବଂ ପ୍ରବଚକ ଭାବେ ସେ ବେଶ୍ ପରିଚିତ। କେବଳ ଏତିକି ନୁହେଁ, ସେ ଜିଲା କଳା ସଂସ୍କୃତି ସଂଘର ଉପସଭାପତି ପଦବୀରେ ମଧ୍ୟ ଅଛନ୍ତି। ଲକ୍ଡାଉନ୍ ସମୟକୁ ଠିକ୍ ଭାବେ ଉପଯୋଗ କରିବାକୁ ଅବନୀ ଲେଖୁଛନ୍ତି କରୋନା ସମ୍ପର୍କିତ ସଚେତନତା କବିତା। ଏହାକୁ ସେ ସୋସିଆଲ୍ ମଡିଆ ସାଇଟ୍ରେ ପୋଷ୍ଟ କରି ସଚେତନ ବାର୍ତ୍ତା ବାଣ୍ଟୁଛନ୍ତି। ‘କରନା ହେଳା’, ‘କବାଟ ଖୋଲନା’ କବିତାରେ କରୋନାର ଭୟାବହତାକୁ ସେ ସାବଲୀଳ ଢଙ୍ଗରେ ଦର୍ଶାଇଛନ୍ତି। ଏଥିସହ ହାତ ଧୋଇବା, ଘରୁ ନ ବାହାରିବା, ସାମାଜିକ ଦୂରତା ରଖିବା ଆଦି ଗୁରୁତ୍ୱପୂର୍ଣ୍ଣ ବିଷୟକୁ ମଧ୍ୟ ଏଥିରେ ସ୍ଥାନିତ କରିଛନ୍ତି। ଏ ନେଇ ଅବନୀ ନିଜ ପ୍ରତିକ୍ରିୟାରେ କୁହନ୍ତି, ଘରେ ବସି ଲୋକଙ୍କୁ ସଚେତନ କରିବାର ଏହା ହେଉଛି ପ୍ରକୃଷ୍ଟ ସମୟ। ସୋସିଆଲ୍ ମଡିଆରେ କବିତା ପୋଷ୍ଟ କରିବା ପରେ ଅନେକେ ନିଜର ମତ ଦେଉଛନ୍ତି। କରୋନା ଲଢ଼େଇରେ ଯୋଡ଼ି ହେଉଛନ୍ତି। ଏପରି କାର୍ଯ୍ୟରେ ସ୍ତ୍ରୀ ସସ୍ମିତା ତାଙ୍କୁ ପ୍ରେରିତ କରିଥିବା ଅବନୀ କହିଛନ୍ତି। ସୂଚନାଯୋଗ୍ୟ, ଅବନୀଙ୍କ ରଚନାରେ ବହୁ ଭଜନ ମୁକ୍ତିଲାଭ କରିଛି। ଇରା ମହାନ୍ତି, ଶୈଳଭାମା, ରଶ୍ମିରଞ୍ଜନ ପଣ୍ଡା, ପଙ୍କଜ ଜାଲ ତାଙ୍କ ରଚିତ ଗୀତରେ କଣ୍ଠଦାନ କରିଛନ୍ତି।
