ମୁମ୍ବାଇ: ଚଳଚ୍ଚିତ୍ରର କାହାଣୀ ସାଙ୍ଗକୁ ନାୟିକା-ନାୟକଙ୍କ ଅଭିନୟ ଦର୍ଶକଙ୍କ ମନରେ ଗଭୀର ଛାପ ଛାଡ଼ିଥାଏ। ଏଥିରୁ ଫିଲ୍ମଟି କେତେ ସଫଳ ତାହା ବାରି ହୋଇପଡେ। ଏମାନଙ୍କୁ ଛାଡ଼ି ଦେଲେ ଚଳଚ୍ଚିତ୍ରରେ ଏଭଳି କିଛି ଚରିତ୍ର ଥାଏ ତାହା ସବୁଦିନ ପାଇଁ ମନେ ରହେ। ସେହିପରି ଗୋଟିଏ ଚରିତ୍ର ହେଉଛି ଫିଲ୍ମ ‘କବିର ସିଂହ’ରେ ନାୟକ ଶାହିଦ କପୁରଙ୍କ ବନ୍ଧୁ ‘ଶିବା’ ଭୂମିକାରେ ଅଭିନୟ କରିଥିବା ସୋହମ୍ ମଜୁମ୍ଦାର। ଫିଲ୍ମଟି ବକ୍ସ ଅଫିସରେ ହିଟ୍ ସାବ୍ୟସ୍ତ ହେବା ସହ ଭଲ ବ୍ୟବସାୟ କରିଛି। ଫିଲ୍ମରେ ଶାହିଦଙ୍କ ଅଭିନୟକୁ ଯୁବଗୋଷ୍ଠୀ ବେଶ ପସନ୍ଦ କରୁଛନ୍ତି। ଏସବୁ ମଧ୍ୟରେ ସୋହମଙ୍କ ଭୂମିକାକୁ ମଧ୍ୟ ପସନ୍ଦ କରାଯାଉଛି। ଜଣେ ବନ୍ଧୁ ହିସାବରେ ସେ ବହୁତ ଭଲ ବୋଲି ଦର୍ଶକ ପ୍ରତିକ୍ରିୟା ରଖୁଛନ୍ତି। ଶିବା ଓ କବିରଙ୍କ ଯୋଡ଼ିକୁ ନେଇ ଅନେକ ମେମେ ମଧ୍ୟ ଭାଇରାଲ ହେଉଛି।
କେବଳ ଯେ କବିର-ଶିବା ତାହା ନୁହେଁ, ପୂର୍ବରୁ ଅନେକ ଫିଲ୍ମରେ ନାୟକଙ୍କ ବନ୍ଧୁ ହୋଇ ବାହା ବାଃ ସାଉଁଟିଛନ୍ତି କଳାକାର। ‘ରାଞ୍ଝଣା’ ଚଳଚ୍ଚିତ୍ରରେ କୁନ୍ଦନ(ଧନୁଷ)ଙ୍କ ସାଙ୍ଗ ମୁରାରି(ମହମ୍ମଦ ଜୀଶାନ ଅୟୁବ), ‘ଦବଙ୍ଗ-୨’ରେ ଠାକୁର ବଚ୍ଚା ସିଂହଙ୍କ ଭାଇ ଭୂମିକାରେ ଅଭିନୟ କରିଥିବା ଦୀପକ ଡୋବରିୟାଲ, ‘ଗଲି ବୟ’ ଫିଲ୍ମରେ ରଣବୀରଙ୍କ ବନ୍ଧୁ ଭୂମିକାରେ ସିଦ୍ଧାନ୍ତ ଚତୁର୍ବେଦୀ ପ୍ରମୁଖ ଦର୍ଶକଙ୍କ ମନ କିଣିଛନ୍ତି।