ମୁମ୍ବାଇ: ବଲିଉଡ୍ ଅଭିନେତା ଚନ୍ଦ୍ରଚୂଡ଼ ସିଂ ଫିଲ୍ମ ନିର୍ମାତା କରଣ ଜୋହରଙ୍କ ଫିଲ୍ମ ‘କୁଛ୍ କୁଛ୍ ହୋତା ହୈ’ସମ୍ପର୍କରେ କିଛି କଥା ପ୍ରଶଂସକମାନଙ୍କୁ ଜଣାଇଛନ୍ତି। ଏକ ସାକ୍ଷାତକାରରେ ଚନ୍ଦ୍ରଚୂଡ଼ କହିଛନ୍ତି, କରଣ ତାଙ୍କୁ ଶାହାରୁଖ୍ ଖାଁ, ରାଣୀ ମୁଖାର୍ଜୀ ଏବଂ କାଜଲଙ୍କ ପରି କଳାକାର ଥିବା ଏକ ରୋମାଣ୍ଟିକ୍ ଫିଲ୍ମରେ ଅଭିନୟ କରିବାକୁ ଅଫର ଦେଇଥିଲେ। ମାତ୍ର ସେ ଏହି ଅଫର ଗ୍ରହଣ କରି ନ ଥିଲେ। ଯାହା ଆଜି ତାଙ୍କର ଅବଶୋଷ ବୋଲି ସେ କହିଛନ୍ତି।
ପରେ ଏହି ଫିଲ୍ମରେ ଦବଙ୍ଗ ଅଭିନେତା ସଲମାନ୍ ଖାଁ ଅଭିନୟ କରିଥିଲେ। ଚନ୍ଦ୍ରଚୂଡ଼ଙ୍କ କହିବା କଥା ଯେତେବେଳେ ଜଣେ କଳାକାର ନିଜର କ୍ୟାରିୟରରେ ଏକ ଭଲ ଫିଲ୍ମରେ ଅଭିନୟ କରିଥାଏ ସେତେବେଳେ ଦର୍ଶକ ତାଙ୍କଠାରୁ ଆଉ ଅଧିକ କିଛି ଆଶା କରିଥାନ୍ତି। ସେ କହିଛନ୍ତି, ଦକ୍ଷତା ଭିତ୍ତିରେ ଯାହା କରିବା କଥା ସେପରି ଫିଲ୍ମରେ ଅଭିନୟ କରିଛନ୍ତି। ସେ ଆହୁରି ମଧ୍ୟ କହିଛନ୍ତି, ଇଣ୍ଡଷ୍ଟ୍ରିରେ ଛୋଟମୋଟ ଫିଲ୍ମ ଯାହା ହେଉନା କାହିଁକି ସେ ଏଥିରେ ଖୁସି ହୁଅନ୍ତି। ତା’ଠୁ ଅଧିକ ଚାହାନ୍ତି ନାହିଁ। ସେ ଓ୍ବେବ୍ ସିରିଜ୍ ‘ଆର୍ଯ୍ୟ’ରୁ ଦୀର୍ଘ ସମୟ ପରେ ପରଦାକୁ ଫେରିଥିଲେ। ଏହି ସିରିଜ୍ରେ ସେ ଅଭିନେତ୍ରୀ ସୁସ୍ମିତା ସେନ୍ଙ୍କ ସ୍ବାମୀ ଭୂମିକାରେ ଅଭିନୟ କରିଥିଲେ। ଏହି ସିରିଜ୍ରେ ସିକନ୍ଦର ଖେର୍, ଜୟନ୍ତ କୃପାଳିନୀ, ନାମିତ ଦାସ, ମନୀଷ ଚୌଧୁରୀ, ମାୟା ସାରାଓ ପ୍ରମୁଖ ଅଭିନୟ କରିଥିଲେ।