ବମ୍ବେ: ଅଭିନେତା ସୁଶାନ୍ତ ସିଂ ରାଜପୁତଙ୍କ ଆତ୍ମହତ୍ୟାକୁ ଏବେ ବି ଗ୍ରହଣ କରିପାରୁନାହାନ୍ତି ପ୍ରଶଂସକ। ଅପରପକ୍ଷେ ତାଙ୍କ ସହ କାମ କରିଥିବା ଅଭିନେତା/ଅଭିନେତ୍ରୀଙ୍କ ସମାନ ଅବସ୍ଥା। ସମସ୍ତେ ତାଙ୍କର ହସହସ ମୁହଁକୁ ମନେ ପକାଉଛନ୍ତି। ଏପରିକି ତାଙ୍କ ସହ ବିତାଇଥିବା ମୁହୂର୍ତ୍ତର ଫଟୋ ଶେୟାର କରୁଛନ୍ତି। ଅଭିନେତ୍ରୀ କ୍ରିତି ସାନନ୍ ମଧ୍ୟ ଚଳଚ୍ଚିତ୍ର ରାବ୍ତାରେ ସୁଶାନ୍ତଙ୍କ ସହ ନଜର ଆସିଥିଲେ। ସେ ସୁଶାନ୍ତଙ୍କ ଅନ୍ତିମ ସଂସ୍କାରରେ ପହଞ୍ଚିଥିବା ବେଳେ ତାଙ୍କ ମୃତ୍ୟୁକୁ ନେଇ ଦୁଃଖ ପ୍ରକାଶ କରିଥିଲେ। ଏବେ ଅଭିନେତ୍ରୀଙ୍କ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଭିଡିଓରେ ସେ କଫି ଉଇଥ୍ କରନ୍ରେ ସୁଶାନ୍ତଙ୍କୁ ଏକ ନଂ ରେଟିଂ ଦେଉଥିବା ନଜର ଆସିଛି।
ଭିଡିଓରେ ଫିଲ୍ମ ନିର୍ମାତା ତଥା ପ୍ରଯୋଜକ କରଣ ଜୋହର କ୍ରିତୀଙ୍କୁ ବରୁଣ ଧାୱନ, କାର୍ତ୍ତିକ ଆର୍ୟନ, ଆୟୁଷ୍ମାନ ଖୁରାନ୍ନା, ସୁଶାନ୍ତ ସିଂ ରାଜପୁତ ଏବଂ ଟାଇଗର ଶ୍ରଫଙ୍କ ମଧ୍ୟରେ ପ୍ରଥମରୁ ପଞ୍ଚମ ରେଟିଂ ଦେବାକୁ କହିଛନ୍ତି। ଏହାର ଜବାବରେ କ୍ରିତୀ ପ୍ରଥମ ନାମ ଭାବେ ସୁଶାନ୍ତ ସିଂ ରାଜପୁତଙ୍କୁ ବାଛିଥିଲେ। ସେ ସୁଶାନ୍ତଙ୍କୁ ଇଣ୍ଡଷ୍ଟ୍ରିର ସବୁଠାରୁ ଦକ୍ଷ ଅଭିନେତା ଭାବରେ ବର୍ଣ୍ଣନା କରିଥିଲେ। ଏହା ପରେ ସେ ବରୁଣ, କାର୍ତ୍ତିକ, ଆୟୁଷ୍ମାନ ଏବଂ ଟାଇଗରଙ୍କ ନାମ ନେଇଥିଲେ। ଏହି ଭିଡିଓ ଏବେ ଇଣ୍ଟରନେଟରେ ଭାଇରାଲ ହେବାରେ ଲାଗିଛି।
କ୍ରିତି ଏବଂ ସୁଶାନ୍ତ ରାବ୍ତା ଫିଲ୍ମରେ ଏକାଠି କାମ କରିଥିଲେ। ଫିଲ୍ମ ସେତେଟା ସଫଳ ହୋଇ ନ ଥିଲେ ହେଁ ତଥାପି ଉଭୟ ଉଭୟଙ୍କ ଭଲ ବନ୍ଧୁ ପାଲଟିଥିଲେ। ସୁଶାନ୍ତଙ୍କ ବିୟୋଗ ପରେ କ୍ରିତି ଇନଷ୍ଟାଗ୍ରାମରେ ଏକ ଭାବପ୍ରବଣ ପୋଷ୍ଟ ଶେୟାର କରିଥିଲେ। ସେ ଲେଖିଥିଲେ ‘ସୁଶ୍ … ମୁଁ ଜାଣିଥିଲି ଯେ ତୁମର ଉଜ୍ଜ୍ୱଳ ମନ ତୁମର ସର୍ବୋତ୍ତମ ବନ୍ଧୁ ଏବଂ ତୁମର ଖରାପ ଶତ୍ରୁ। ମୁଁ ଏହା ଭାବି ସମ୍ପୂର୍ଣ୍ଣ ଭାଙ୍ଗି ପଡିଛି ଯେ ତୁମ ଜୀବନରେ ଏକ ମୁହୂର୍ତ୍ତ ଆସିଛି ଯେଉଁଠାରେ ତୁମେ ବଞ୍ଚିବା ଅପେକ୍ଷା ସହଜରେ ମରିବା ସହଜ ମନେ କରିଛ। ମୋ ହୃଦୟର ଗୋଟିଏ ଅଂଶ ତୁମ ସହିତ ଯାଇଛି ଏବଂ ଅନ୍ୟ ଭାଗରେ ତୁମେ ସବୁବେଳେ ଜୀବିତ ରହିବ। ମୁଁ ତୁମ ଖୁସି ପାଇଁ ପ୍ରାର୍ଥନା କରିବା ବନ୍ଦ କରି ନାହିଁ କି କେବେବି କରିବି ନାହିଁ।
