ତାଇପେ,୧୦।୨: ଚାଇନାରେ କରୋନାଭାଇରସ ମହାମାରୀର ରୂପ ନେଇଥିବା ବେଳେ ଏବେ ଏହାକୁ ରୋକିବା ପାଇଁ ଚାଇନା ସରକାର ଭିନ୍ନ ଭିନ୍ନ ପଦକ୍ଷେପ ନେଉଛନ୍ତି। ଶୁଣିବାକୁ ମିଳିଛି ଏବେ ଚାଇନା ସରକାର ଟେଲିଭିଜନ ଧାରାବାହିକ ଓ ସିନେମାରୁ କିସିଂ ସିନ୍ ହଟାଇ ଦେଉଛନ୍ତି। କିସିଂ ଦ୍ୱାରା କରୋନାଭାଇରସ ବ୍ୟାପୁଥିବାରୁ ସରକାର ଏଭଳି ପଦକ୍ଷେପ ନେଇଥିବା କୁହାଯାଉଛି। ନିକଟରେ କରୋନାଭାଇରସ ବାୟୁଦ୍ୱାରା ବ୍ୟାପୁଥିବା ବିଶେଷଜ୍ଞମାନେ କହିଛନ୍ତି। କେବଳ ସେତିକି ନୁହେଁ ସିଧାସଳଖ ସଂକ୍ରମିତଙ୍କ ସଂସ୍ପର୍ଶରେ ଆସିଲେ କରୋନାଭାଇରସ ସଂକ୍ରମିତ ହେଉଛି ବୋଲି ମଧ୍ୟ କୁହାଯାଇଛି। ୟୁନାଇଟେଡ ଡେଲି ରିପୋର୍ଟ ଅନୁଯାୟୀ, ଏହାକୁ ନଜରରେ ରଖି ଚାଇନାର ତାଇଓ୍ବାନରେ ଶୁଟିଂ କରାଯାଉଥିବା ଟେଲିଭିଜନ ଓ ସିନେମା ସିନ୍ରୁ କିସିଂ ସିନ୍କୁ ହଟାଇ ଦେବାକୁ ସ୍ଥିର କରାଯାଇଥିବା କୁହାଯାଉଛି। ଏହାସହ କଳାକାରମାନେ କଥାବାର୍ତ୍ତା ସମୟରେ ନିଜ ନିଜ ଭିତରେ ଦୂରତା ରଖିବାକୁ ମଧ୍ୟ ପରାମର୍ଶ ଦିଆଯାଇଛି। ଏଭଳି ପଦକ୍ଷେକୁ କଳାକାର ମହଲରେ ସ୍ବାଗତ କରାଯାଇଛି। ସୂଚନାଯୋଗ୍ୟ, କରୋନାଭାଇରସ ସଂକ୍ରମଣରେ ଚାଇନାରେ ଏବେ ସୁଦ୍ଧା ୯୦୮ ଜଣଙ୍କ ମୃତ୍ୟୁ ହୋଇଥିବା ବେଳେ ୪୦ ହଜାରରୁ ଊର୍ଦ୍ଧ୍ୱ ସଂକ୍ରମିତଙ୍କୁ ଚିହ୍ନଟ କରାଯାଇଛି।