ନୂଆଦିଲ୍ଲୀ,୨୯।୬:ଭାରତୀୟ କ୍ରିକେଟର ସିଦ୍ଧାନ୍ତ ଡୋବାଲଙ୍କ ପିତା ସଞ୍ଜୟ ଡୋବାଲ ସୋମବାର କରୋନାରେ ମୃତ୍ୟୁବରଣ କରିଛନ୍ତି। ସଞ୍ଜୟ ନିଜେ ଦିଲ୍ଲୀର ଜଣେ ଜଣାଶୁଣା କ୍ଲବ କ୍ରିକେଟର ଥିଲେ। ସେ ଦିଲ୍ଲୀ ଅଣ୍ଡର -୨୩ ଦଳର ସପୋର୍ଟ ଷ୍ଟାଫର ମଧ୍ୟ ଅଂଶ ଥିଲେ। ୫୨ ବର୍ଷୀୟ ସଞ୍ଜୟ ମୃତ୍ୟୁ ସହ ସଂଗ୍ରାମ କରୁଥିବାବେଳେ ପୂର୍ବତନ ଭାରତୀୟ ବ୍ୟାଟ୍ସମ୍ୟାନ୍ ବୀରେନ୍ଦ୍ର ସେହ୍ବାଗ ମଧ୍ୟ ସୋସିଆଲ ମିଡିଆରେ ତାଙ୍କୁ ସହାୟତା ଦେବା ପାଇଁ ଅପିଲ୍ କରିଥିଲେ। ଦିଲ୍ଲୀର ପୂର୍ବତନ ଅଲରାଉଣ୍ଡର ସଞ୍ଜୟଙ୍କ ଦେହାନ୍ତ ଯୋଗୁ କ୍ରୀଡା ଜଗତରେ ଶୋକର ଛାୟା ଖେଳିଯାଇଛି। ଡୋବାଲଙ୍କ ପତ୍ନୀ ଏବଂ ଦୁଇ ପୁଅ ଅଛନ୍ତି। ସିଦ୍ଧାନ୍ତ ରାଜସ୍ଥାନ ପାଇଁ ଖେଳନ୍ତି ଏବଂ ସାନପୁଅ ଏକାଂଶ ଦିଲ୍ଲୀ ଅଣ୍ଡର -୨୩ ଦଳରେ ଖେଳୁଛନ୍ତି।
ଡିଡିସିଏ ଜଣେ ଅଧିକାରୀ କହିଛନ୍ତି ଯେ, ସଞ୍ଜୟ କରୋନା ସଂକ୍ରମଣ ହୋଇଥିଲେ। ତାଙ୍କୁ ବାହାଦୁରଗଡର ଏକ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ତାଙ୍କୁ ପ୍ଲାଜମା ଥେରାପି ମଧ୍ୟ ଦିଆଯାଇଥିଲା। କିନ୍ତୁ ଏହା ତାଙ୍କ ଶରୀରରେ କୌଣସି ପ୍ରଭାବ ପଡ଼ି ନ ଥିଲା। ଗୌତମ ଗମ୍ଭୀର, ବୀରେନ୍ଦ୍ର ସେହ୍ବାଗ ଏବଂ ମିଥୁନ ମାନହସ ମଧ୍ୟ ଟୁଇଟର ମାଧ୍ୟମରେ ପ୍ଲାଜ୍ମା ଦାନ ପାଇଁ ନିବେଦନ କରିଥିଲେ।