ମାଲାପୁରମ (କେରଳ), ୭ା୬ (ପି.ଟି.)- କରୋନା ଭାଇରସ୍ରେ ଆକ୍ରାନ୍ତ ହୋଇ ପୂର୍ବତନ ସନ୍ତୋଷ ଟ୍ରଫି ଜାତୀୟ ଫୁଟ୍ବଲ ଚାମ୍ପିୟନଶିପ୍ ଖେଳାଳି ଇ. ହାମ୍ସାକୋୟାଙ୍କ ମୃତ୍ୟୁ ଘଟିଛି। ଫଳରେ ରାଜ୍ୟରେ କୋଭିଡ୍-୧୯ରେ ମୃତ୍ୟୁ ସଂଖ୍ୟା ୧୫ରେ ପହଞ୍ଚତ୍ଛି। ୬୧ ବର୍ଷୀୟ ହାମ୍ସାକୋୟାଙ୍କ ଜନ୍ମସ୍ଥାନ ହେଉଛି ନିକଟବର୍ତ୍ତୀ ପାରାପ୍ପାନାଙ୍ଗ୍ଡିରେ। ଏବେ ସେ ମୁମ୍ବାଇରେ ବାସ କରୁଛନ୍ତି। ସେ ଓ ତାଙ୍କ ପରିବାର ମେ ୨୧ରେ ତାଙ୍କ ଜନ୍ମ ସହରକୁ ଆସି କ୍ୱାରାଣ୍ଟାଇନ୍ରେ ଥିଲେ। ହାମସାକୋୟାଙ୍କ ୫ଜଣ ପରିବାର ସଦସ୍ୟ ମଧ୍ୟ କରୋନା ପଜିଟିଭ। ସେମାନେ ସମସ୍ତେ ଏବେ ଚିକିତ୍ସାଧୀନ ରହିଛନ୍ତି। ମାଲାପୁରମର ଜିଲା ମେଡିକାଲ ଅଫିସର କେ. ସାକିନାଙ୍କ କହିବା ଅନୁସାରେ ହାମସାକୋୟାଙ୍କ ସ୍ତ୍ରୀ ଏବଂ ପୁଅଙ୍କ ନିକଟରେ ପ୍ରଥମେ କୋଭିଡ୍-୧୯ ଲକ୍ଷଣ ପ୍ରକାଶ ପାଇଥିଲା। ସମସ୍ତ ଚେଷ୍ଟା ସତ୍ତ୍ୱେ ଏହି ପୂର୍ବତନ ଫୁଟ୍ବଲରଙ୍କ ଜୀବନ ରକ୍ଷା ସମ୍ଭବ ହୋଇପାରି ନ ଥିଲା। ଶନିବାର ସକାଳେ ତାଙ୍କର ଦେହାନ୍ତ ହୋଇଥିଲା। ହାମସାକୋୟାଙ୍କ ପୁତ୍ରବଧୂ ଏବଂ ଦୁଇ ନାତି ନାତୁଣୀ ମଧ୍ୟ କରୋନା ପଜିଟିଭ। ସେମାନେ ଏବେ ଡାକ୍ତରଖାନାରେ ଚିକିତ୍ସିତ ହେଉଛନ୍ତି। ମାଲାବାର ଅଞ୍ଚଳର ଭେଟରାନ ଫୁଟ୍ବଲର ହାମସାକୋୟା ୧୯୮୦ଦଶକରେ ମହାରାଷ୍ଟ୍ର ରାଜ୍ୟ ତରଫରୁ ସନ୍ତୋଷ ଟ୍ରଫି ବ୍ୟତୀତ କଲିକତାର ଶକ୍ତିଶାଳୀ କ୍ଲବ ମୋହନବାଗାନ କ୍ଲବରୁ ମଧ୍ୟ ଖେଳିଥିଲେ। ସେ ଓ୍ବିଙ୍ଗ୍ ବ୍ୟାକ୍ ପୋଜିିଶନରେ ଖେଳିଥାନ୍ତି। ସେ ଦୁଇଥର ଜାତୀୟ କ୍ୟାମ୍ପକୁ ଡକରା ପାଇଥିଲେ ମଧ୍ୟ କେବେ ଦେଶ ତରଫରୁ ଖେଳି ନାହାନ୍ତି।