ଟୋକିଓ,୧୩।୫(ଏଏଫ୍ପି): କୋଭିଡ୍-୧୯ ସଂକ୍ରମଣରେ ଜାପାନର ଜଣେ ୨୮ ବର୍ଷୀୟ ସୁମୋ ରେସଲର କିୟୋଟାକା ସୁଏଟେକ ମୃତ୍ୟୁବରଣ କରିଛନ୍ତି। ଅବଶ୍ୟରେ ସେ ଏକାଧିକ ସ୍ବାସ୍ଥ୍ୟଗତ ସମସ୍ୟା ଦେଇ ଗତି କରୁଥିଲେ। ସୁମୋ ରେସଲିଂ ଭଳି ପୁରାତନ କ୍ରୀଡ଼ାର ପ୍ରଥମ ଖେଳାଳିଭାବେ ସେ ପ୍ରାଣ ହରାଇଛନ୍ତି ଜାପାନ ସୁମୋ ଆସୋସିଏଶନ (ଜେଏସ୍ଏ) ବୁଧବାର ଘୋଷଣା କରିଛି। ଶୋବୁସି ନାମରେ ଜଣାଶୁଣା ଥିବା ଏହି ରେସଲର ଗତମାସ ହସ୍ପିଟାଲରେ ଭର୍ତ୍ତି ହୋଇଥିଲେ। ଟୋକିଓର ଏକ ହସ୍ପିଟାଲରେ ସେ ମୃତ୍ୟୁବରଣ କରିଥିଲେ। ଟୋକିଓର ଟାକାଡାଗାଓ୍ବା ଷ୍ଟାବଲରେ ରୁହନ୍ତି। ଗତ ଏକମାସ ଧରି ସେ କରୋନା ଭାଇରସ ବିରୋଧରେ ସଂଗ୍ରାମ କରି ଆସୁଥିଲେ।
ଏପ୍ରିଲ ୪ ଓ ୫ ତାରିଖରେ ସେ ଜ୍ୱରରେ ପୀଡ଼ିତ ଥିଲେ। ଟୋକିଓ ହସ୍ପିଟାଲରେ ଭର୍ତ୍ତି ହେବାକୁ ପୂର୍ବରୁ ସେ ଏକାଧିକ ହସ୍ପିଟାଲକୁ ଯାଇଥିଲେ ଓ ତାଙ୍କୁ ଅଣଦେଖା କରାଯାଇଥିଲା। ରକ୍ତ ବାନ୍ତି କରିବା ପରେ ସେ ଏପ୍ରିଲା ୮ତାରିଖରେ ଟୋକିଓ ହସ୍ପିଟାଲରେ ଭର୍ତ୍ତି ହୋଇଥିଲେ। ଏପ୍ରିଲ ୧୦ ତାରିଖରେ ସେ କୋଭିଡ୍-୧୯ ପଜିଟିଭ ବୋଲି ଜଣାପଡିଥିଲା। ଏହାପରେ ତାଙ୍କୁ ଅନ୍ୟ ହସ୍ପିଟାଲକୁ ସ୍ଥାନାନ୍ତର କରାଯାଇ ଆଇସିୟୁରେ ରଖାଯାଇଥିଲା। ତାଙ୍କ ଦେହାନ୍ତରେ ଜାପାନା କ୍ରୀଡ଼ା ଜଗତରେ ଶୋକର ଛାୟା ଖେଳିଯାଇଛି। ଜାପାନ ସୁମୋ ଆସୋସିଏଶନ ମଧ୍ୟ ଶୋକ ଜାହିର କରିଛି। ୨୦୦୭ରେ ଶୋବୁଶି ପେସାଦାର ସୁମୋ ରେସଲିଂରେ ପଦାର୍ପଣ କରିଥିଲେ। ସେ ର଼୍ୟାଙ୍କିଙ୍ଗ୍ରେ କ୍ୟାରିୟର ଶ୍ରେଷ୍ଠ ୧୧ତମ ସ୍ଥାନ ହାସଲ କରିଥିଲେ। କୋଭିଡ-୧୯ ମହାମାରୀରେ ଜାପାନରେ ୬୬୮ଜଣ ମୃତ୍ୟୁବରଣ କରିଥିବା ବେଳେ ୧୬,୦୦୦ ଜଣ ସଂକ୍ରମିତ ହୋଇଛନ୍ତି।