ମୁମ୍ବାଇ,୭।୫:ଭାରତରେ କରୋନା ସଂକ୍ରମଣ ବଢ଼ିବାରେ ଲାଗିଛି। ଦେଶରେ ସଂକ୍ରମିତ ଏବଂ ମୃତକଙ୍କ ସଂଖ୍ୟା ପ୍ରତିଦିନ ବୃଦ୍ଧି ପାଉଛି। ମୃତକଙ୍କ ସଂଖ୍ୟା ବଢୁଥିବାରୁ ଅଭାବନୀୟ ସ୍ଥିତି ସୃଷ୍ଟି ହେଉଛି। ଫଳରେ ମୃତଦେହ ରହିଥିବା ଓ୍ବାର୍ଡରେ ମଧ୍ୟ ସଂକ୍ରମିତଙ୍କୁ ଚିକିତ୍ସା କରାଯାଉଛି। ଏଭଳି ଏକ କରୁଣ ଦୃଶ୍ୟ ସମ୍ବଳିତ ଭିଡ଼ିଓ ମହାରାଷ୍ଟ୍ର ବିଧାୟକ ନୀତିଶ ଏନ୍. ରାଣେ ସୋସିଆଲ୍ ମିଡ଼ିଆରେ ଅପଲୋଡ୍ କରିଛନ୍ତି। ଏହି ଭିଡ଼ିଓଟି ମୁମ୍ବାଇର ସିଓନ ହସ୍ପିଟାଲର ବୋଲି କୁହାଯାଉଛି। ୫୭ ସେକେଣ୍ଡର ଏହି ଭିଡ଼ିଓରେ ଏକ କରୋନା ଓ୍ବାର୍ଡରେ କଳା ପ୍ଲାଷ୍ଟିକ୍ ବ୍ୟାଗ୍ରେ ବନ୍ଧା ଯାଇଥିବା କେତେକ ମୃତଦେହକୁ ବିଭିନ୍ନ ବେଡ୍ ଉପରେ ରଖାଯାଇଛି। ସେହି ଓ୍ବାର୍ଡରେ ଅନ୍ୟ କରୋନା ସଂକ୍ରମିତଙ୍କୁ ମଧ୍ୟ ଚିକିତ୍ସା କରାଯାଉଥିବା ଦେଖିବାକୁ ମିଳୁଛି। ଏହି ଭିଡ଼ିଓକୁ ମୁମ୍ବାଇ ମହାନଗର ନିଗମ ଏବଂ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ପଠାଯାଇଥିବା କୁହାଯାଉଛି।
