ରୋମ,୧୮।୩- ଜୁଭେଣ୍ଟସ ପକ୍ଷରୁ ଖେଳୁଥିବା ବିଶ୍ୱକପ ଚାମ୍ପିୟନ ଫ୍ରାନ୍ସ ଦଳର ସଦସ୍ୟ ବ୍ଲାଇସେ ମାଟୁଡି ଓ ହେଲାସ ଭେରୋନା ଖେଳାଳି ମାଟି ଜାକାଗନି ଘାତକ ଭାଇରସ କରୋନାରେ ଆକ୍ରାନ୍ତ। ଉଭୟଙ୍କ ସ୍ବାବ ରିପୋର୍ଟ ପଜେଟିଭ ଆସିଥିବା ସେମାନଙ୍କ ସିରି ଏ’ କ୍ଲବ ସ୍ପଷ୍ଟ କରିଛନ୍ତି। ଇଟାଲିଆନ ଚାମ୍ପିୟନ ଜୁଭେଣ୍ଟସ ପକ୍ଷରୁ କୁହାଯାଇଛି, ୩୨ ବର୍ଷୀୟ ମାଟୁଡିଙ୍କୁ ଏବେ ଘରେ ପର୍ଯ୍ୟବେକ୍ଷଣରେ ରହିଛନ୍ତି। ୨୦୧୮ ଫିଫା ବିଶ୍ୱକପ୍ ଚାମ୍ପିୟନ ମିଡ୍ଫିଲ୍ଡର ମାଟୁଡିଙ୍କ ଦଳର ସଦସ୍ୟ ଡାନିଏଲ ରୁଗାନି ପ୍ରଥମେ କରୋନାରେ ପୀଡ଼ିତ ହୋଇଥିଲେ। ଏହାପରେ ଦଳର ସମସ୍ତ ସଦସ୍ୟଙ୍କ ସ୍ବାବ ଟେଷ୍ଟ କରାଯିବା ସହ କ୍ୱାରାଣ୍ଟାଇନରେ ରଖାଯାଇଥିଲା। ମୋଟ ୧୩ ସଦସ୍ୟ କରୋନାରେ ଆକ୍ରାନ୍ତ ଥିବା ଅଫିସିଆଲ ରିପୋର୍ଟରେ କୁହାଯାଇଛି। ୨୪ ବର୍ଷୀୟ ଜାକାଗନିଙ୍କ ନିକଟରେ ଲକ୍ଷଣ ଦେଖାଦେବା ପରେ ନିଜ ଆଡ଼ୁ ରୁଦ୍ଦ ରୁମରେ ରହିଛନ୍ତି। ତାଙ୍କୁ ସମସ୍ତ ମେଡିକାଲ ସୁବିଧା ଯୋଗାଇ ଦିଆଯାଉଛି। ତାଙ୍କ ସମେତ ସିରି ଏ’ ପଏଣ୍ଟ ଟେବୁଲର ଅଷ୍ଟମ ସ୍ଥାନରେ ଥିବା ଭେରୋନା କ୍ଲବର ସମସ୍ତ ଖେଳାଳି ୨୫ ମାର୍ଚ୍ଚ ପର୍ଯ୍ୟନ୍ତ ପର୍ଯ୍ୟବେକ୍ଷଣରେ ରହିବେ। ଇଟାଲିରେ କରୋନା ଭାଇରସ ଜନିତ ମୃତ୍ୟୁ ସଂଖ୍ୟା ୨.୫ ହଜାର ଥିଲାବେଳେ ଆକ୍ରାନ୍ତଙ୍କ ସଂଖ୍ୟା ୩୧ ହଜାରେ ପହଞ୍ଚତ୍ଛି। ଗତ ୨୪ ଘଣ୍ଟା ମଧ୍ୟରେ ଏହି ଭାଇରସ ଦେଶରେ ୩୫୦ ଲୋକଙ୍କ ଜୀବନ ନେଇଛି।