ଜୟପୁର, ୧୯।୩ (ନି.ପ୍ର.): ସାରା ବିଶ୍ୱରେ କରୋନା ଭାଇରସ୍ ଆତଙ୍କ ଖେଳାଇଛି। ଏହାଠାରୁ ବଞ୍ଚିବାକୁ ହେଲେ ସଚେତନ ଓ ସତର୍କତା ଅବଲମ୍ବନ ପାଇଁ ସରକାର ଘୋଷଣା କରିଛନ୍ତି। ଜନଗହଳିପୂର୍ଣ୍ଣ ସ୍ଥାନରେ ଏକାଠି ନ ବୁଲିବା, ଲୋକଙ୍କ ସଂସ୍ପର୍ଶରେ ନ ଆସିବାକୁ ସଚେତନ କରାଯାଉଛି। ସେହିଭଳି ମାସ୍କ ବ୍ୟବହାର କରିବାକୁ ସରକାର ଲୋକଙ୍କୁ ସଚେତନ କରିଛନ୍ତି। ବର୍ତ୍ତମାନ ବଜାରରେ ମାସ୍କ ଅଭାବ ଦେଖାଦେଇଛି। ଏହାକୁ ଦୂର କରିବା ପାଇଁ ଜୟପୁର ଚନ୍ଦନବାଡ ସାହିର ଶ୍ରୀ ଲକ୍ଷ୍ମୀ ଗଣପତି ସ୍ବୟଂ ସହାୟକ ଗୋଷ୍ଠୀ ମହିଳା ଆଗେଇ ଆସିଛନ୍ତି। ସ୍କୁଲ ଡ୍ରେସ ତିଆରି କରୁଥିବା ଏହି ସଂଘର ମହିଳାମାନେ ଏବେ ମାସ୍କ ତିଆରି କରୁଛନ୍ତି। ଏହି ମାସ୍କକୁ ବଜାରରେ ବିକ୍ରି କରାଯାଉଛି।
ସ୍ଥାନୀୟ ଅଞ୍ଚଳର ୧୦ ଜଣ ମହିଳା ମିଶି ଏହି ଗ୍ରୁପ ଆରମ୍ଭ କରିଥିଲେ। ପ୍ରଥମେ ସେମାନେ ସ୍କୁଲ ଡ୍ରେସ ସିଲେଇ କରୁଥିଲେ। ତେବେ କରୋନା ଭୟାବହତାକୁ ନଜରରେ ରଖି ଲୋକେ ଅଧିକ ସଂଖ୍ୟାରେ ମାସ୍କ ବ୍ୟବହାର କରୁଛନ୍ତି। ଫଳରେ ବଜାରରେ ମାସ୍କର ଅଭାବ ଦେଖାଦେଉଛି। ଏହି ସମୟରେ କରୋନା ମୁକାବିଲା ପାଇଁ ଆଗେଇ ଆସିଲେ ସଂଘ ମହିଳାମାନେ। ମାସ୍କ ତିଆରି କରିବାକୁ ମନ ବଳେଇ ଥିଲେ। ନିଜ ସହ ୪୦ ଜଣ ମହିଳାଙ୍କୁ ନିୟୋଜିତ କରି ୩ ଦିନ ହେବ ଆରମ୍ଭ କରିଛନ୍ତି ମାସ୍କ ସିଲେଇ। ଗୋଟିଏ ପ୍ୟାକେଟରେ ରହୁଛି ୧୦ ମାସ୍କ। ଗୋଟଏ ମାସ୍କକୁ ୨୦ଟଙ୍କା ହିସାବରେ ପ୍ୟାକେଟକୁ ୨ଶହ ଟଙ୍କାରେ ସ୍କୁଲ, ହଷ୍ଟେଲ, ଔଷଧ ଦୋକାନରେ ବିକ୍ରି କରାଯାଉଛି। ମାସ୍କ ତିଆରି ପାଇଁ ଆବଶ୍ୟକ ସାମଗ୍ରୀ ଲୁଧିଆନା, କୋଲକାତାରୁ ଆସୁଛି। ମାସ୍କଗୁଡିକୁ କଟନ କପଡ଼ାରେ ତିଆରି କରାଯାଉଛି। ତେଣୁ ଏହାକୁ ଭଲଭଭାବେ ଧୋଇ ଶୁଖେଇ ପୁଣି ଥରେ ବ୍ୟବହାର କରଯାଇ ପାରୁଥିବାରୁ ଏହାର ଚାହିଦା ବଜାରରେ ଭଲ ରହିଛି ବୋଲି ମହିଳାମାନେ କହିଛନ୍ତି। ମାସ୍କ ତିଆରି କରୁଥିବା ମହିଳାଙ୍କୁ ସିଲେଇ ହିସାବରେ ଟଙ୍କା ଦିଆଯାଉଛି ବୋଲି ଗ୍ରୁପ ସଭାପତି ଜି. ଭାରତି, ସମ୍ପାଦିକା ଓ୍ବାଇ. କାନ୍ତା କହିଛନ୍ତି। ନିଜେ ସ୍ବାବଲମ୍ବୀ ହେବା ସହ କରୋନା ମୁକାବିଲା ପାଇଁ ଆଗେଇ ଆସିଥିବା ଏହି ମହିଳାମାନେ ଏବେ ଅନ୍ୟମାନଙ୍କ ପାଇଁ ଉଦାହରଣ ପାଲଟିଛନ୍ତି।