କରୋନା କଟକଣାକୁ ନିରାକାରପୁର ଅଞ୍ଚଳବାସୀଙ୍କ ବେଖାତିର: ଦୋକାନ ଦିନରେ ତାଲା, ରାତିରେ ଖୋଲା; ଚା’ ଖଟିରେ ଜମୁଛି ଆସର
06 ନିରାକାରପୁର,୧୬।୪(ଡି.ଏନ୍.ଏ.): କରୋନା ଭୁତାଣୁ ସଂକ୍ରମଣକୁ ରୋକିବା ପାଇଁ କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ଲକ୍ ଡାଉନ୍ ସ୍ଥିତି ଜାରି ରହିଛି। ଏହି ସମୟରେ କେବଳ ଅତ୍ୟାବଶ୍ୟକ ସାମଗ୍ରୀ ଦୋକାନ ଖୋଲିବା ପାଇଁ ନିର୍ଦ୍ଦେଶ ଜାରି କରାଯାଇଛି। ହେଲେ ଖୋର୍ଦ୍ଧା ଜିଲା ନିରାକାରପୁର ଏବଂ ଏହାର ଆଖପାଖ ଅଂଚଳରେ ଏହି ନିୟମକୁ ଖୋଲା ଖୋଲି ଉଲଘଂନ କରାଯାଉଥିବା ଦେଖିବାକୁ ମିଳିଛି। ଏଠାରେ ନିୟମ ମାନିବା କଥା ଦୂରରେ ଥାଉ ବିଲ ଗହିରରେ କ୍ରିକେଟ, ଗାଁ ଗାଁରେ ତାସ୍ ଖେଳ, ଚେସ, ପଶା ଖେଳଠାରୁ ଆରମ୍ଭ କରି ଛକ ଏବଂ ଗାଁ ମୁଣ୍ଡରେ ଚା’ ଓ ପାନ ଦୋକାନ ଖୋଲା ରହୁଛି। ଏପରିକି ସକାଳୁ ସନ୍ଧ୍ୟା ଯାଏ ରାଜନୀତିିର ଆଡ୍ଡା ଜମୁଥିବା ଦେଖିବାକୁ ମିଳୁଛ। ବଜାର ବନ୍ଦକୁ ଆଖିରେ ରଖି କିଛି ଲୋକ କଳାବଜାରି ଆରମ୍ଭ କରିଛନ୍ତି। ଦୋକାନରେ ଥିବା ଜେରେକ୍ସ ମେଶିନକୁ ନିଜ ଘରେ ରଖି ୫ରୁ ୧୦ ଟଙ୍କା ଲେଖାଏ ଜୋର ଜବରଦସ୍ତ ଆଦାୟ କରୁଛନ୍ତି। ପୋଲିସ ଭୟରେ ଲୋକେ ପନିପରିବା, ରାଶନ ଓ ଔଷଧ ଦୋକାନ ଲୋକେ ଦିନବେଳା ଖୋଲୁଥିବା ବେଳେ ଅନ୍ୟ ଦୋକାନ ରାତି ୧୧ଟାରୁ ସକାଳ ୫ ଟା ପର୍ଯ୍ୟନ୍ତ ଖୋଲା ରହୁଛି। ଚୋରା ବାଲି, ଗୋଡି ଓ ମାଙ୍କଡା ପଥର ଶହ ଶହ ଗାଡି ମୋଟର ଖୁଲମ୍ଖୁଲା ଯାତାୟାତ କରୁଛନ୍ତି। ସେପଟେ ଲକ୍ ଡାଉନ୍ ପାଇଁ ପ୍ରଶାସନ ପକ୍ଷରୁ ସୀମା ସିଲ୍ ହୋଇଛି। କିନ୍ତୁ ଏହି ସବୁ କାର୍ଯ୍ୟ ବିଭିନ୍ନ କଟକଣା ସତ୍ତ୍ୱେ ପୋଲିସ ଆଖିରେ ଧୂଳି ଦେଇ କରାଯାଉଛି। କେବଳ ଏତିକି ନୁହେଁ ନୂତନ ଘର ନିର୍ମାଣ କାର୍ଯ୍ୟ ମଧ୍ୟ ଅଞ୍ଚଳରେ ଜାରି ରହିଛି। ଯଦି ଗାଁ ଗହଳିରେ ଏହାକୁ ରୋକା ନ ଯାଏ ତେବେ ଆଗାମୀ ଦିନରେ କରୋନା ସଂକ୍ରମଣକୁ ରୋକିବା ସମ୍ଭବପର ହୋଇ ନ ପାରେ ବୋଲି ବୁଦ୍ଧିଜୀବୀମାନେ ମତ ପ୍ରକାଶ କରିଛନ୍ତି। ଏ ନେଇ ନିରାକାରପୁର ଥାନା ଏଏସ୍ଆଇ ଶରତ ଚନ୍ଦ୍ର ପାଇକରାୟଙ୍କୁ ପଚାରିବାରେ ଆମେ ପାଟ୍ରୋଲିଂ କରୁଛୁ। ଯେଉଁଁଠି କେହି ଉଲ୍ଲଘଂନ କରୁଥିବା ଦେଖୁଛୁ ତାକୁ ସଚେତନତା କରିବା ସହିତ ତାଗିଦ କରୁଛୁ। ହେଲେ ରାତିରେ ଯେଉଁ ଦୋକାନ ଖୋଲିବା ନେଇ ଅଭିଯୋଗ ହେଉଛି ତାହାକୁ ଦେଖିବୁ ବୋଲି ସେ କହିଛନ୍ତି ।