ପୁରୁଷୋତ୍ତମପୁର, ୨୧।୪(ଡି.ଏନ୍.ଏ.): କରୋନା ସହ ମୁକାବିଲା ପାଇଁ ସରକାର ଦୀର୍ଘ ଏକ ମାସରୁ ଊର୍ଦ୍ଧ୍ୱ ହେଲା ରାଜ୍ୟରେ ଲକ୍ଡାଉନ୍ ଘୋଷଣା କରିଛନ୍ତି। ଏଥିଯୋଗୁ ଗଞ୍ଜାମରେ ବିଭିନ୍ନ କଟକଣା ଓ ନିୟମ ଜାରି କରି ଲକ୍ଡାଉନ୍କୁ କଡ଼ାକଡ଼ି ଭାବେ ପାଳନ କରିବାକୁ ଜିଲାପାଳ ନିର୍ଦ୍ଦେଶ ଦେଇଛନ୍ତି। ମାତ୍ର କିଛି ଅତ୍ୟାବଶ୍ୟକ କାର୍ଯ୍ୟକୁ ଦେଖି କଟକଣା ନିୟମରେ କୋହଳ କରାଯାଇଛି। ଇତିମଧ୍ୟରେ ଚାଷକାର୍ଯ୍ୟକୁ ମଧ୍ୟ ସରକାର ଅନୁମତି ପ୍ରଦାନ କରିଥିବାରୁ ଚାଷୀମାନେ ଖୁସି ବ୍ୟକ୍ତ କରିଛନ୍ତି। ପୁରୁଷୋତ୍ତମପୁର ଅଞ୍ଚଳରେ ଚାଷୀମାନେ ଖୁସି ମନରେ କ୍ଷେତରେ ଚାଷ କାର୍ଯ୍ୟ ଆରମ୍ଭ କରିଥିବା ଦେଖିବାକୁ ମିଳିଛି। ଲକ୍ଡାଉନ୍ ଯୋଗୁ ଚାଷୀଙ୍କ ବହୁ ଫସଲ କ୍ଷତିଗ୍ରସ୍ତ ହୋଇଛି। ସେମାନେ ଧାର କରଜ କରି ବ୍ୟବସାୟ ଆଶାରେ କ୍ଷେତରେ ବହୁ ପନିପରିବା ଅମଳ କରିଥିଲେ। ହେଲେ ଏହା ବିକ୍ରି ହୋଇ ନ ପାରି କ୍ଷେତରେ ପଡ଼ି ନଷ୍ଟ ହୋଇଛି। ଅପରପକ୍ଷେ ବର୍ତ୍ତମାନ ଧାନ ଚାଷ କାର୍ଯ୍ୟ ଆରମ୍ଭ ଲାଗି ଜମିର ପାଗ ଅନୁକୁଳ ଥିବାରୁ ଚାଷୀମାନେ କାର୍ଯ୍ୟ ଆରମ୍ଭ କରିଛନ୍ତି। ଏହି ମାରାତ୍ମକ ରୋଗ ଦାଉରୁ ରକ୍ଷା ପାଇବା ଲାଗି ଜିଲାପାଳ ନେଇଥିବା ପଦକ୍ଷେପଗୁଡ଼ିକ ପାଇଁ ଚାଷୀମାନେ ତାଙ୍କୁ ଧନ୍ୟବାଦ ଜଣାଇଛନ୍ତି।