ଛତ୍ରପୁର,୨ା୬(ଡି.ଏନ.ଏ.)-କରୋନା ସଂକ୍ରମଣକୁ ସମ୍ପୂର୍ଣ୍ଣ ପ୍ରତିହତ କରାଯିବ। ଜୁନ ମାସରେ କଟକଣା ବଳବତ୍ତର ରହିବ। ବିନା ମାସ୍କରେ ବାହାରେ ବୁଲିଲେ ତୁରନ୍ତ କାର୍ଯ୍ୟାନୁଷ୍ଠାନ । ସବୁ ଦୋକାନୀ ଗ୍ରାହକଙ୍କର ବିବରଣୀ ଲିପିବଦ୍ଧ କରିବେ। ଦୋକାନରେ ସାମାଜିକ ଦୂରତ୍ୱ ରକ୍ଷା ସହ ବାହାରେ ଗୋଲେଇ ଚିହ୍ନରେ ଗ୍ରାହକ ରହିବେ। ଦୋକାନୀ ହ୍ୟାଣ୍ଡ ଗ୍ଳୋବ, ସାନିଟାଇଜର୍ ବ୍ୟବହାର କରିବେ। ଏସବୁ ଅବମାନନା କଲେ ଜୁନ ମାସସାରା ଦୋକାନକୁ ତାଲାପକାଇ ଦିଆଯିବ। ସେହିପରି କୌଣସି ସରକାରୀ କର୍ମଚାରୀ କରୋନା ମୁକାବିଲା ପାଇଁ କାର୍ଯ୍ୟ କରିବାକୁ ମନା କଲେ ସ୍ବତନ୍ତ୍ର କ୍ଷମତାବଳରେ ତାଙ୍କୁ ଜେଲ ହାଜତକୁ ପଠାଇବେ ବୋଲି ସମୀକ୍ଷା ବୈଠକ ଅବସରରେ ଜିଲାପାଳ ବିଜୟ ଅମୃତା କୁଲାଙ୍ଗେ ସମସ୍ତଙ୍କୁ ଦୃଢ ନିଷ୍ପତ୍ତି ଶୁଣାଇଛନ୍ତି ।
ଗଞ୍ଜାମ ପାଇଁ ଜୁନ ମାସ ଘଡିସନ୍ଧିର ସମୟ । ସା ୭ରୁ ସକାଳ ୭ ପର୍ଯ୍ୟନ୍ତ ବାହାରକୁ ବାହାରିବା ନିଷେଧ। ଶନିବାର, ରବିବାର ଜରୁରୀ ସ୍ବାସ୍ଥ୍ୟସେବା ବ୍ୟତୀତ କେହି ବି ବାହାରକୁ ବାହାରିବେ ନାହିଁ। ବାହାରିଲେ ବନ୍ଧା ହେବେ । ଏହି ସମୟରେ ଗାଡିମୋଟର ରାସ୍ତାରେ ଗଡିବ ନାହିଁ । ଏହା ପୂର୍ବରୁ ସମସ୍ତ ଆବଶ୍ୟକୀୟ ସାମଗ୍ରୀ ସଂଗ୍ରହ କରି ରଖିବାକୁ ଜିଲାପାଳ ଜିଲାବାସୀଙ୍କୁ ଅନୁରୋଧ କରିଛନ୍ତି। ନିଜ ଘରେ ସଫଳତାର ସହିତ କ୍ବାରାଣ୍ଟାଇନ୍ କଲେ ନିର୍ଦ୍ଧାରିତ ଅର୍ଥ ମିଳିବା ସହିତ ସାବାସୀ ପ୍ରଦାନ କରାଯିବ । ଅମାନ୍ୟ କଲେ କାର୍ଯ୍ୟାନୁଷ୍ଠାନ। ଆଗାମୀ ଦିନରେ ଜିଲାରେ ୧ ଲକ୍ଷରୁ ଅଧିକ ଲୋକ ହୋମ କ୍ବାରାଣ୍ଟାଇନରେ ରହିବାକୁ ଥିବାରୁ ସେଥିପ୍ରତି କର୍ମଚାରୀମାନେ ଅଧିକ ସଜାଗ ରହିବାକୁ ଜିଲାପାଳ କହିଛନ୍ତି । ଯେଉଁ ଅଞ୍ଚଳରେ ଅଧିକ ଲୋକ କ୍ବାରାଣ୍ଟାଇନରେ ଥିବେ ସେମାନଙ୍କ ସହିତ କୌଣସି ବାହାର ଲୋକ ମିଶି ପାରିବେ ନାହିଁ । ସେହି ଅଞ୍ଚଳର ଲୋକଙ୍କୁ ସଚେତନ କରିବାପାଇଁ ଡାକବାଜି ଯନ୍ତ୍ର ଯୋଗେ ପ୍ରଚାର କରାଯିବ । ୬୦ ବର୍ଷରୁ ଉଦ୍ଧର୍ବ ବୟସର ବ୍ୟକ୍ତିମାନଙ୍କୁ ବାହାରେ ବୁଲିବା ନିଷେଧ କରାଯାଇଛି । ଅମାନ୍ୟ କଲେ କ୍ବାରାଣ୍ଟାଇନରେ ରଖାଯିବ। ସେହିପରି ମନ୍ଦିର, ମସଜିଦ, ଗୀର୍ଜାକୁ ଯିବା ବାରଣ କରାଯାଇଛି। ଯେଉଁଠାରେ ଅଧିକ ଗହଳି ହେଉଥିବ ସେଠାରୁ ସନ୍ଦେହ ହେଉଥିବା ଲୋକଙ୍କ ସ୍ବାବ ପରୀକ୍ଷା ପାଇଁ ପଠାଯିବ । ସମସ୍ତ କଟକଣାରୁ କୃଷିକାର୍ଯ୍ୟକୁ ବାଦ ଦିଆଯାଇଛି ।