ଛତ୍ରପୁର, ୧୬।୫(ଡି.ଏନ୍.ଏ.)- କରୋନା ମୁକାବିଲାକୁ ନେଇ ସାରା ଦେଶରେ ଲକ୍ଡାଉନ୍ କଟକଣା। ଏପରିକି ସଂକ୍ରମଣ ଆଶଙ୍କାରେ ବାହାରୁ ଫେରୁଥିବା ପ୍ରବାସୀମାନଙ୍କୁ ରାଜ୍ୟର ବିଭିନ୍ନ କ୍ୱାରାଣ୍ଟାଇନ ସେଣ୍ଟରରେ ରଖାଯାଉଛି। ହେଲେ କ୍ୱାରାଣ୍ଟାଇନ୍ ଅବଧି ସରି ନ ଥିବାରୁ ମା’ଙ୍କ ମୁଁହରେ ପୁଅ ମୁଖାଗ୍ନି ଦେଇପାରି ନ ଥିବା ଭଳି ଏକ ଘଟଣା ନଜରକୁ ଆସିଛି। ଗଞ୍ଜାମ ଜ଼ିଲା ଛତ୍ରପୁର ବ୍ଲକ ଭିକାରୀପାଲି ପଞ୍ଚାୟତ ଗୋଳାପଲି ଗାଁରେ ଏଭଳି ଏକ ଦୁଃଖଦ ଘଟଣା ଘଟିଛି।
ସୂଚନାନୁଯାୟୀ, ଗତ ୩ ତାରିଖରେ ଏହି ଗାଁ ର ବି ନୋକା ପାତ୍ର ସୁରଟରୁ ଫେରି ଛତ୍ରପୁର ସରକାରୀ ଆଇଟିଆଇ କୋଠାରେ ଥିବା କ୍ୱାରାଣ୍ଟାଇନ ସେଣ୍ଟରରେ ରହୁଛନ୍ତି। ଶନିବାର ତାଙ୍କ ମା ବି ଲକ୍ଷ୍ମୀ ପାତ୍ରଙ୍କ ନିଜ ଘରେ ମୃତ୍ୟୁ ଘଟିଥିବା ଖବର ଆସିଥିଲା। ହେଲେ ନୋକାଙ୍କ କ୍ୱାରାଣ୍ଟାଇନ ଅବଧି ସରି ନ ଥିବାରୁ ସେ ତାଙ୍କ ମାଙ୍କୁ ମୁଖାଗ୍ନି ଦେଇପାରିନାହାନ୍ତି। ଅପରପକ୍ଷରେ ପ୍ରଶାସନ ପକ୍ଷରୁ ତାଙ୍କୁ କୋଭିଡ ଆମ୍ବୁଲାନରେ ଶ୍ମଶାନକୁ ନିଆଯାଇଥିଲା। ସେଠାରେ ସେ କେବଳ ମା’ଙ୍କ ଶେଷକୃତ୍ୟ ଦର୍ଶନ କରିପାରିଥିବା ଜଣାପଡ଼ିଛି।