ଭୁବନେଶ୍ୱର,୧୮ା୩ (ବ୍ୟୁରୋ): କରୋନା ଭାଇରସ୍କୁ ନେଇ ସବୁଠି ଭୟ ଓ ଆଶଙ୍କାର ବାତାବରଣ। ସଂକ୍ରମଣ ରୋକିବାକୁ କଡ଼ା ନିର୍ଦ୍ଦେଶ ଜାରି ପରେ ସବୁଠି କଟକଣା ଲଗାଯାଇଛି। ହେଲେ ଓଡ଼ିଶାର ଅନ୍ୟତମ ପ୍ରମୁଖ ପ୍ରବେଶ ପଥ ଭୁବନେଶ୍ୱର ରେଳ ଷ୍ଟେଶନରେ ଏହାର ବ୍ୟତିକ୍ରମ ଦେଖିବାକୁ ମିଳିଛି। ରେଳ ଷ୍ଟେଶନ ଖୋଲାମେଲା ରହିଥିବାବେଳେ ନିର୍ଦ୍ଦେଶକୁ ଖୋଲାଖୋଲି ଉଲ୍ଲଂଘନ କରାଯାଉଥିବାରୁ ସଂକ୍ରମଣ ଆଶଙ୍କା ଦେଖାଦେଇଛି। ଟିକେଟ କାଉଣ୍ଟର, ପ୍ରବେଶ ପଥ, ବସିବା ସ୍ଥାନ ଆଦି ବିଭିନ୍ନ ସ୍ଥାନରେ ଘଣ୍ଟା ଘଣ୍ଟା ଧରି ସମାଗମ ଦେଖିବାକୁ ମିଳୁଛି। ଟିକେଟ ଓ ଟଙ୍କା ଦେଣନେଣବେଳେ ସଂକ୍ରମଣ ସମ୍ଭାବନା ରହୁଛି। ପ୍ରତିଦିନ ରାଜ୍ୟ ତଥା ଦେଶର ବିଭିନ୍ନ ରାଜ୍ୟରୁ ହଜାର ହଜାର ଲୋକ ଏହି ରେଳ ଷ୍ଟେଶନ ଦେଇ ଯାତାୟାତ କରୁଥିଲେ ମଧ୍ୟ କୌଣସି ଯାଞ୍ଚ କରାଯାଉନାହିଁ। ବିମାନ ବନ୍ଦର ଭଳି ଏଠାରେ ସ୍କ୍ରିନିଂ ବ୍ୟବସ୍ଥା ନାହିଁ। ଫଳରେ ଅନ୍ୟ ରାଜ୍ୟରୁ ଖସି ଆସୁଥିବା ସନ୍ଦିଗ୍ଧ କରୋନା ଆକ୍ରାନ୍ତ ଟ୍ରେନ୍ ଯୋଗେ ଭୁବନେଶ୍ୱର ଚାଲି ଆସିବାର ସମ୍ଭାବନାକୁ ଏଡାଇ ଦେଇ ହେଉନି। ଏହାକୁ ନେଇ ଷ୍ଟେଶନରେ କାର୍ଯ୍ୟରତ କର୍ମଚାରୀ ଓ ଯାତାୟାତ କରୁଥିବା ଲୋକେ ଆତଙ୍କିତ ଅବସ୍ଥାରେ ରହୁଛନ୍ତି। ଅନ୍ୟପକ୍ଷରେ ଷ୍ଟେଶନ ଦେଇ ଅଧିକ ସଂଖ୍ୟକ ଲୋକ ଯାତାୟାତ କରୁଥିବାରୁ ସମସ୍ତଙ୍କୁ ଗୋଟିଗୋଟି କରି ସ୍କ୍ରିନିଂ କରିବା ସମ୍ଭବ ନୁହେଁ। ଏହାସହ ଯାଞ୍ଚବେଳେ କର୍ମଚାରୀଙ୍କୁ ମଧ୍ୟ ସଂକ୍ରମଣ ଭୟ ରହୁଛି। ଏପରିସ୍ଥଳେ ଷ୍ଟେଶନରେ କିଭଳି କରୋନା ସଂକ୍ରମଣ ରୋଗୀଙ୍କୁ ଚିହ୍ନଟ କରିହେବ ସେନେଇ ରେଳପଥ କର୍ତ୍ତୃପକ୍ଷଙ୍କ ଚିନ୍ତା ବଢ଼ିଛି। ତେଣୁ ଷ୍ଟେଶନରେ ଥର୍ମାଲ ଇମେଜିଂ କ୍ୟାମେରା ଲଗାଇବା ପାଇଁ ଷ୍ଟେଶନ ଡାଇରେକ୍ଟର ଚିତ୍ତରଞ୍ଜନ ନାୟକ ଉଚ୍ଚ ଅଧିକାରୀଙ୍କୁ ଚିଠି ଲେଖି ଜଣାଇଥିବା କହିଛନ୍ତି। ମଙ୍ଗଳବାର ବିଭାଗୀୟ ଅଧିକାରୀ ଭୁବନେଶ୍ୱର ଷ୍ଟେଶନ ପରିଦର୍ଶନ କରିବା ସହ ସ୍ଥିତି ଅନୁଧ୍ୟାନ କରିଥିବା ଜଣାପଡିଛି। ଖୁବ୍ଶୀଘ୍ର ଷ୍ଟେଶନରେ ଥର୍ମାଲ ଇମେଜିଂ କ୍ୟାମେରା ଲଗାଯିବ ବୋଲି ଚିତ୍ତରଞ୍ଜନ କହିଛନ୍ତି। ଗୋଟିଏ ଏକ ନମ୍ବର ପ୍ଲାଟ ଫର୍ମର ପ୍ରବେଶ ପଥ ଓ ଅନ୍ୟଟି ୬ ନମ୍ବର ପ୍ଲାଟ ଫର୍ମରେ ଲାଗିବ। ଷ୍ଟେଶନରେ ଥିବା ଅନ୍ୟସବୁ ବାଟକୁ ବନ୍ଦ କରି ଏହି ଦୁଇଟି ବାଟରେ ଯାତ୍ରୀ ଯିବା ଆସିବା କରିବେ। କୌଣସି କରୋନା ରୋଗୀ ଆସିଲେ କ୍ୟାମେରା ଚିହ୍ନଟ କରିନେବ। ୩୦ ମିଟର ରେଡିଏଶନରେ ଯେଉଁ ଯାତ୍ରୀ ଯିବେ ସେମାନଙ୍କ ଶରୀରର ତାପମାତ୍ରା ମାପିଦେବ ଏହି କ୍ୟାମେରା। କରୋନା ରୋଗୀ ଷ୍ଟେଶନ ଦେଇ ଆସିଲେ ତାପମାତ୍ରାରୁ ତୁରନ୍ତ ଚିହ୍ନଟ କରି ସୂଚନା ପ୍ରଦାନ ସହ ସତର୍କ କରାଇଦେବ। ଏହି କ୍ୟାମେରାର ଦାମ୍ ୯ ଲକ୍ଷ ୫୦ ହଜାର ଲେଖାଏ ପଡ଼ିବ ବୋଲି ସେ ସୂଚନା ଦେଇଛନ୍ତି।
ଅନ୍ୟପକ୍ଷରେ କରୋନା ପ୍ରଭାବ ରେଳ ଯାତ୍ରୀ ଉପରେ ପଡିଛି। କରୋନାକୁ ଦେଖି ଲୋକମାନେ ଯାତ୍ରା କରିବାକୁ ରାଜି ହେଉନାହାନ୍ତି। ଯେଉଁମାନେ ବାହାରକୁ ଯିବା ପାଇଁ ଆଗୁଆ ଟିକେଟ କରିଥିଲେ ସେମାନେ ଟିକେଟ ବାତିଲ କରୁଛନ୍ତି। ମଙ୍ଗଳବାର ଭୁବନେଶ୍ୱର ରେଳ ଷ୍ଟେଶନରେ ଟିକେଟ କରୁଥିବା ବ୍ୟକ୍ତିଙ୍କଠାରୁ ବାତିଲ କରୁଥିବା ଯାତ୍ରୀଙ୍କ ସଂଖ୍ୟା ୩ ଗୁଣା ଅଧିକ ଥିଲା। ଆଗାମୀ ଦିନରେ ଏକାଧିକ ଟ୍ରେନ ବାତିଲ ହେବ ବୋଲି ରେଲ୍ଓ୍ବେ କର୍ତ୍ତୃପକ୍ଷ କହିଛନ୍ତି।
ସେପଟେ ସଚେତନତା ପଦକ୍ଷେପ ସ୍ବରୂପ ସାନିଟାଇଜର ବ୍ୟବହାରକୁ ଗୁରୁତ୍ୱ ଦିଆଯାଉଥିବାବେଳେ ଏସି ବଗିରେ ଲାଗିଥିବା ଡୋର ସ୍କିନ୍ କାଢି ନିଆଯାଇଛି। ଏହାସହ ଶୌଚାଳୟର ହ୍ୟାଣ୍ଡେଲ ଓ ଏକାଧିକ ଯାତ୍ରୀ ସମାଗମ ହେଉଥିବା ସ୍ଥାନକୁ କେମିକାଲ ପାଣି ଦ୍ୱାରା ସଫା କରାଯାଉଛି।