ନୂଆଦିଲ୍ଲୀ,୨୪।୪: ସାରା ବିଶ୍ୱ କରୋନା ଭାଇରସ୍କୁ ନେଇ ଆତଙ୍କିତ ହୋଇପଡ଼ିଛି। ସମସ୍ତେ ଏହି ସଂକ୍ରମଣକୁ ନେଇ ଭୟଭୀତ ହୋଇପଡ଼ିଥିବା ବେଳେ ଏହାରି ଭିତରେ ଦିଲ୍ଲୀ ପୋଲିସର ମନୋବଳ ବେଶ୍ ପ୍ରଶଂସନୀୟ। କରୋନା ପଜିଟିଭ୍ ହେବା ପରେ ବି ସେମାନଙ୍କ ଉତ୍ସାହରେ ନା ଉଣା ହୋଇଛି ନା ମନରେ କିଛି ଭୟ ଅଛି। ବିନ୍ଦାସ ମୁଡ଼ରେ ସେମାନେ ଯୋଗ ଓ ବ୍ୟାୟାମ କରୁଥିବା ନଜର ଆସିଛନ୍ତି। ଏହି ଦୃଶ୍ୟ ଦେଖିବାକୁ ମିଳିଛି ଦିଲ୍ଲୀର ଆରଏମ୍ଏଲ୍ ହସ୍ପିଟାଲରେ। କିଛି ଦିନ ତଳେ ଚାନ୍ଦିନୀମହଲ ଥାନାର ୮ଜଣ ପୋଲିସକର୍ମୀ କରୋନାରେ ସଂକ୍ରମିତ ହେବାରୁ ସେମାନଙ୍କୁ ଉକ୍ତ ହସ୍ପିଟାଲରେ ଭର୍ତ୍ତି କରାଯାଇଥିଲା। ତେବେ ସୁସ୍ଥ ରହିବା ପାଇଁ ସଂକ୍ରମିତ ପୋଲିସମାନେ ସକାଳୁ ଉଠି ନିଜ ଓ୍ବାର୍ଡରେ ଯୋଗ ଓ ବ୍ୟାୟାମ କରୁଛନ୍ତି।
ଯାହାଦ୍ୱାରା ସେମାନଙ୍କ ଶରୀରରେ ପ୍ରତିରୋଧକ କ୍ଷମତା ବୃଦ୍ଧି ପାଇବା ସହ କୌଣସି ବିଷାଦ ଗ୍ରସ୍ତ ହେବେ ନାହିଁ ଏବଂ ଶୀଘ୍ର ସୁସ୍ଥ ହୋଇଯିବେ। ସାରା ବିଶ୍ୱରେ କରୋନା ରୋଗୀଙ୍କ ଭିତରେ ଏଭଳି ଉତ୍ସାହ କେହି କେବେ ଦେଖି ନ ଥିବା ବେଳେ ପୋଲିସଙ୍କ ଏହି ଭିଡିଓ ଏବେ ସମସ୍ତଙ୍କ ପାଇଁ ପ୍ରେରଣା ପାଲଟିଛି। ପୋଲିସକର୍ମୀଙ୍କ ଏହି ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ସୂଚନା ମୁତାବକ କରୋନା ଯୋଦ୍ଧା ହୋଇ କର୍ତ୍ତବ୍ୟ ସମ୍ପାଦନ କରୁଥିବା ପୋଲିସ ଏବେ ସଂକ୍ରମଣ ଶୀକାର ହେଉଛନ୍ତି। ଦିଲ୍ଲୀରେ ଏପର୍ଯ୍ୟନ୍ତ ୧୯ଜଣ ପୋଲିସ କରୋନାରେ ଆକ୍ରାନ୍ତ ହୋଇସାରିଲେଣି।