ଜଗତ୍ସିଂହପୁର ଅଫିସ/ଏରସମା,୨୮ା୩(ସ୍ବ.ପ୍ର.): କରୋନା ପଜିଟିଭ୍ ଚିହ୍ନଟ ହୋଇଥିବା ନେଇ ହ୍ବାଟ୍ସଆପ୍ରେ ଗୁଜବ କରି ଗିରଫ ହୋଇଛନ୍ତି ଜଗତ୍ସିଂହପୁର ଜିଲା ଏରସମା ବ୍ଲକ ଅଞ୍ଚଳର ୪ଜଣ। ସେମାନେ ହେଲେ ଏରସମା ପୂର୍ବତନ ବ୍ଲକ ଅଧ୍ୟକ୍ଷ ତଥା ପଏଦା ଗ୍ରାମର ମାନସ ରଞ୍ଜନ ସେଠୀ, ପୂର୍ବତନ ସରପଞ୍ଚ ତଥା ଜାନକାଦେଇପୁର ଗ୍ରାମର ଦୀପକ ଦାସ, ଏରସମାର ଜ୍ୟୋତି ପ୍ରକାଶ ରାଉତ ଓ ଉମେଶ ରାଉତ। ଗୁଜବ ସମ୍ପର୍କରେ ଏରସମା ପୋଲିସ ଶୁକ୍ରବାର ନିଜଆଡ଼ୁ ମାମଲା ରୁଜୁ କରିବା ସହ ଅଭିଯୁକ୍ତମାନଙ୍କୁ କୋର୍ଟଚାଲାଣ କରିଛି। ଏନେଇ ଏକ ମାମଲା ନଂ-୪୯/୨୦ରୁଜୁ ହୋଇଥିବା ଏରସମା ଥାନା ଅଧିକାରୀ ପ୍ରଶାନ୍ତ ମାଝି ସୂଚନା ଦେଇଛନ୍ତି। ସେହିପରି ଲକ୍ଡାଉନ୍ ଉଲ୍ଲଂଘନ କରି ଶୁକ୍ରବାର ଜଗତ୍ସିଂହପୁର ଜିଲାର ବିଭିନ୍ନ ଥାନା ଅଞ୍ଚଳରୁ ୧୯ଜଣ ଗିରଫ ହୋଇଥିବାବେଳେ ୮ଟି ବାଇକ୍ ଓ ୧୯ ହଜାର ଟଙ୍କା ଜବତ କରାଯାଇଛି। ଅନୁରୂପଭାବେ ଗତ ୨୬ ତାରିଖରେ ୩୫ ଜଣଙ୍କୁ ଗିରଫ କରାଯିବା ସହ ୯ଟି ବାଇକ୍ ଓ ୪୫ ହଜାର ଟଙ୍କା ଜରିମାନା ଆଦାୟ ହୋଇଥିବା ଏସ୍ପି ପ୍ରକାଶ ଆର୍ ସୂଚନା ଦେଇଛନ୍ତି।