ଢେଙ୍କାନାଳ ଅଫିସ, ୧୬।୩: କରୋନା ଭାଇରସ୍ ସଂକ୍ରମଣ ପ୍ରତିରୋଧ ଲାଗି ଢେଙ୍କାନାଳ ଜିଲା ଦେବୋତ୍ତର ବିଭାଗ ପକ୍ଷରୁ ବ୍ୟାପକ ପଦକ୍ଷେପ ଗ୍ରହଣ କରାଯାଇଛି। ଜିଲାର ପ୍ରସିଦ୍ଧ ଶୈବପୀଠ କପିଳାସରେ ରବିବାର ମାଇକ୍ ଯୋଗେ ପ୍ରଚାର କରି କଟକଣା ଲାଗୁ କରାଯାଇଛି। ପୀଠକୁ ଆସୁଥିବା ଶ୍ରଦ୍ଧାଳୁ, ସେବକଙ୍କୁ ସଚେତନ ରହିବାକୁ ପରାମର୍ଶ ଦିଆଯାଇଛି। ମନ୍ଦିର ଭିତରକୁ ଥରକେ ଅଧିକ ଲୋକ ପ୍ରବେଶ କରିପାରିବେ ନାହିଁ। ଭିତରକୁ ଆସୁଥିବା ପର୍ଯ୍ୟଟକ ମାସ୍କ ବ୍ୟବହାର କରିବା ଅପରିହାର୍ଯ୍ୟ। ସେହିପରି ସେବକମାନେ ମଧ୍ୟ ମାସ୍କ ବ୍ୟବହାର କରିବେ। ବୃଷଭକୁ ସ୍ପର୍ଶ କରିବା, ହାତରେ ପାଦୁକା ଏବଂ ପ୍ରସାଦ ନେବାକୁ ବାରଣ କରାଯାଇଛି। ଏଥିସହ ମନ୍ଦିର ପରିସରକୁ ପରିଷ୍କାର ପରିଚ୍ଛନ୍ନ ରଖିବା ଲାଗି ସଚେତନ କରାଯାଇଛି। ସମାନ କଟକଣା ଲଗାଯାଇଛି ପ୍ରାଚୀନ ଶ୍ରୀବଳରାମ ମନ୍ଦିରରେ। ଏଠାରେ ମଧ୍ୟ ଏକା ସଙ୍ଗରେ ଅଧିକ ଶ୍ରଦ୍ଧାଳୁ ଦର୍ଶନ ନ କରିବା, ଗରୁଡ଼ ସ୍ତମ୍ଭକୁ ନ ଛୁଇଁବା, ମାସ୍କ ପିନ୍ଧିବାକୁ ଦେବୋତ୍ତର ବିଭାଗ ପକ୍ଷରୁ ନିର୍ଦ୍ଦେଶ ଜାରି କରାଯାଇଛି। ଏହି କଟକଣା ଆସନ୍ତା ୩୧ ତାରିଖ ଯାଏ ବଳବତ୍ତର ରହିବ। ଲୋକଙ୍କୁ ସଚେତନ କରିବାକୁ ବ୍ୟାପକ ସଚେତନତା କାର୍ଯ୍ୟକ୍ରମ ହାତକୁ ନିଆଯିବ ବୋଲି ଦେବୋତ୍ତର ନିରୀକ୍ଷକ ପ୍ରଦ୍ୟୁମ୍ନ କୁମାର ତ୍ରିପାଠୀ ସୂଚନା ଦେଇଛନ୍ତି।
ସେହିପରି କରୋନା ଆତଙ୍କ ଯୋଗୁ ରବିବାରଠାରୁ କପିଳାସ ଚିଡ଼ିଆଖାନା ପର୍ଯ୍ୟଟକଙ୍କ ଲାଗି ବନ୍ଦ ରଖାଯାଇଛି। ଏହା ୩୧ ତାରିଖ ଯାଏ ବଳବତ୍ତର ରହିବ।