ବାରିପଦା ଅଫିସ,୧୪ା୩: କରୋନା ଭାଇରସ୍ ଯେଭଳି ନ ବ୍ୟାପିବ ସେଥିଲାଗି ବିଭିନ୍ନ ସ୍ତରରେ ସଚେତନତା ସୃଷ୍ଟି କରାଯାଉଛି । ଏହି ରୋଗ ବିଶ୍ୱବ୍ୟାପୀ ଆତଙ୍କ ଖେଳାଇଥିବାରୁ ଏ ଦିଗରେ ସଚେତନା ସୃଷ୍ଟି ଲାଗି ,ଠାକାର ପ୍ରଶାସନ ତତ୍ପର ହୋଇ ଉଠିଛି। ଏହି ପରିପ୍ରେକ୍ଷୀରେ ବାରିପଦା ପିଆରଏମ୍ ମେଡ଼ିକାଲ୍ରେ କରୋନା ରୋଗୀଙ୍କ ପାଇଁ ଖୋଲା ଯାଇଛି ସ୍ବତନ୍ତ୍ର ଆଇସୋଲେସନ ୱାର୍ଡ଼, ଯେଉଁଥିରେ ୬ଟି ଶଯ୍ୟା ବ୍ୟବସ୍ଥା ରହିଛି। ଯଦି କେହି ସଦିଗ୍ଧ ରୋଗୀ ଆସନ୍ତି ତାଙ୍କୁ ସେଠାରେ ରଖି ସ୍ବତନ୍ତ୍ର ଭାବେ ଚିକିତ୍ସା କରାଯାଇପାରିବ । ମାସ୍କ, କ୍ଲୋଭସ୍ , ସାନିଟାଇଜର, ପିପିୟୁ ଯଥେଷ୍ଟ ମହଜୁଦ୍ ରଖାଯାଇଛି ବୋଲି ପିଆରଏମ୍ ମେଡ଼ିକାଲ୍ ପକ୍ଷରୁ ଏଠାରେ ସୂଚନା ଦିଆଯାଇଛି।
ଅନ୍ୟପକ୍ଷେ ଜିଲା ପ୍ରଶାସନ ଆସନ୍ତା ୩୧ ତାରିଖ ପର୍ଯ୍ୟନ୍ତ ସମସ୍ତ ଶିକ୍ଷାନୁଷ୍ଠାନକୁ ବନ୍ଦ କରି ଦେଇଛନ୍ତିି। ସେହଭିଳି ଜିଲାରେ ଥିବା ସମସ୍ତ ଜିମ୍, ସିନେମା ହଲ୍ ଓ ସୁଇମିଂ ପୁଲ୍କୁ ବନ୍ଦ କରିବା ପାଇଁ ନିର୍ଦ୍ଦେଶ ଦିଆଯାଇଛିି। ବାହାଘର ଭୋଜି, ସାମାଜିକ କାର୍ଯ୍ୟକ୍ରମ, ଧାର୍ମିକ ଉତ୍ସବ, ସେମିନାର, ଓ୍ବାର୍କଶପ୍ ଉପରେ ମଧ୍ୟ କଟକଣା ଜାରି କରାଯାଇଛିି। ଆସନ୍ତା ୩୧ ତାରିଖ ପର୍ଯ୍ୟନ୍ତ ସୋମବାରରେ ହେବାକୁ ଥିବା ଜିଲାପାଳଙ୍କ ଯୁଗ୍ମ ଅଭିଯୋଗ ଶୁଣାଣି ଶିବିରକୁ ବାତିଲ କରାଯାଇଛି। ଯେଉଁମାନେ ରାଜ୍ୟ ବାହାରକୁ ଯାଇଥିଲେ ଯଦି ସ୍ବାସ୍ଥ୍ୟବସ୍ଥାରେ ସେମାନଙ୍କଠାରେ କୌଣସି ଥଣ୍ଡା ରୋଗ ଜନିତ ଲକ୍ଷଣ ଦେଖା ଦେଉଛି ତାହା ହେଲେ ସେମାନେ ଭୟଭୀତ ନ ହୋଇ ସ୍ବ ଇଚ୍ଛାରେ ମେଡ଼ିକାଲ୍କୁ ଆସି ଚିକିତ୍ସିତ ହେବା ଲାଗି ପରାମର୍ଶ ଦିଆଯାଇଛି। ଜିଲା ପ୍ରଶାସନ ପକ୍ଷରୁ ନିୟନ୍ତ୍ରଣ କକ୍ଷ ଫୋନ୍ ନମ୍ବର ୯୪୩୯୯୯୭୯୩୩ ଓ ୦୬୭୯୨ ୨୫୨୭୦୨ ସହ ଯୋଗାଯୋଗ କରିବା ପାଇଁ ବାରିପଦା ମେଡ଼ିକାଲ୍ ପକ୍ଷରୁ ମଧ୍ୟ ସୂଚନା ଦିଆଯାଇଛି।