ଭଣ୍ଡାରିପୋଖରୀ, ୧୩।୪(ଡି.ଏନ.ଏ.)-ଭଦ୍ରକ ଜିଲ୍ଲା ଭଣ୍ଡାରିପୋଖରୀ ବ୍ଲକ ନେରଡା ପଞ୍ଚାୟତ ପୁଣ୍ୟତୋୟା ବୈତରଣୀ ନଦୀ କୂଳରେ ଅବସ୍ଥିତ ପ୍ରତ୍ୟେକ୍ଷ ଦେବୀ ମା’ ସୁନାମୁହିଁ (ସୁବର୍ଣ୍ଣମୁଖୀ) ପୀଠ। ଏଠାରେ ପଣା ସଂକ୍ରାନ୍ତି ବହୁ ଧୁମ୍ଧାମ୍ରେ ପାଳନ ହୋଇଥିବାବେଳେ ଚଳିତବର୍ଷ କରୋନା ସଂକ୍ରମଣ ପାଇଁ ପ୍ରଥମଥର ନିରାଡ଼ମ୍ବରରେ ପାଳିତ ହୋଇଛି। ସୋମବାର ପ୍ରତ୍ୟୁଷରୁ ମା’ଙ୍କ ରୀତି ନୀତି ଅନୁଯାୟୀ ପୂଜାର୍ଚ୍ଚନା କରାଯାଇଛି। ପୂଜକ ବ୍ରଜ କିଶୋର ପଣ୍ଡା ଓ ଦେହୁରୀ ମାଗୁଣି ଦଳେଇଙ୍କ ଉପସ୍ଥିତିରେ ଏହି ପୂଜା ଅନୁଷ୍ଠିତ ହୋଇଥିଲା। ପୀଠର ମହିମା ସମ୍ପର୍କରେ ମଧ୍ୟ ଅନେକ ଜନଶ୍ରୁତି ରହିଛି। ବ୍ଲକ ପ୍ରଶାସନର ବାରଣ ଏବଂ ଲୋକ ମାନଙ୍କ ସ୍ବତଃ ପ୍ରବୃତ୍ତ ଭାବେ ଏହି ପୀଠକୁ ଯେଉଁ ଭଳି ଭାବେ ଆସିବା କଥା କେହି ଆସି ନ ଥିଲେ। ଯେଉଁ ଭକ୍ତ ଆସିଥିଲେ ସାମାଜିକ ଦୂରତାରେ ରହି ମା’ଙ୍କୁ ଦର୍ଶନ କରି ଫେରିଥିଲେ। ଏହି ପୀଠକୁ ବହୁ ଦୂର ଦୂରାନ୍ତରୁ ଶ୍ରଦ୍ଧାଳୁମାନେ ଆସିଥାନ୍ତି। କରୋନା ପାଇଁ ସୁନାମୁହିଁଙ୍କ ଯାତ୍ରା ଖାଁ ଖାଁ ଲାଗୁଛି।ଯେଉଁ ମେଳାରେ ଶତାଧିକ ଲୋକଙ୍କ ସମାଗମ ଦେଖିବାକୁ ମିଳୁଥିଲା ସେ ମେଳା ଆଜି ଶୂନଶାନ୍। ଏହି ଯାତ୍ରା ଏଠାରେ ୯ ଦିନ ଧରି ଚାଲିଥାଏ। ଚଳିତବର୍ଷ ଏହି ଯାତ୍ରା ତିନି ଦିନ ଧରି ଅନୁଷ୍ଠିତ ହୋଇ ଚଡ଼କ ଯାତ୍ରା ସମାପନ ହେବାର କାର୍ଯ୍ୟକ୍ରମ ରହିଥିବା ପୂଜକଙ୍କ ସୂତ୍ରରୁ ଜଣାଯାଇଛି। କମିଟି ନିଷ୍ପତ୍ତି ଅନୁଯାୟୀ ପୂଜାର୍ଚ୍ଚନା ଖାଲି ଚାଲିଛି। କମିଟିର ସଭାପତି ଗୋଲକ ବେହେରା, ଅନନ୍ତ କିଶୋର ଜେନା, ଉମାକାନ୍ତ ଜେନା, ଜଗନ ଭାରତୀ, ରବିନାରାୟଣ ଜେନା, ଗୌରାଙ୍ଗ ମହାପାତ୍ର ଗ୍ରାମବାସୀ ପ୍ରମୁଖଙ୍କ ସହଯୋଗରେ ମା’ଙ୍କ ପୂଜାର୍ଚ୍ଚନା ଚାଲିଛି।
