ନୂଆଦିଲ୍ଲୀ,୧୨।୫: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲ କରୋନା ଯୋଦ୍ଧାଙ୍କ ମୃତ୍ୟୁରେ ସହାୟତା ରାଶି ଭାବେ ୧କୋଟି ଟଙ୍କା ପ୍ରଦାନ କରିବାକୁ ପୂର୍ବରୁ ଘୋଷଣା କରିଥିଲେ। ମେ’ ୪ରେ ମ୍ୟୁନିସିପାଲ କର୍ପୋରେଶନ ଅଫ୍ ଦିଲ୍ଲୀ(ଏମ୍ସିଡି)ସ୍କୁଲରେ କାମ କରୁଥିବା ଜଣେ ଶିକ୍ଷୟିତ୍ରୀଙ୍କ ମୃତ୍ୟୁ ପରେ ତାଙ୍କ ପରିବାରକୁ ୧ କୋଟି ଟଙ୍କା ସହାୟତା ରାଶି ପ୍ରଦାନ କରିବାକୁ କେଜରିଓ୍ବାଲ କହିଛନ୍ତି। ସୂଚନାଯୋଗ୍ୟ, ବୈକାଲି ସରକାର ନାମକ ଜଣେ ଶିକ୍ଷୟିତ୍ରୀ ଚୁକ୍ତି ଭିତ୍ତିରେ ଏମ୍ସିଡି ସ୍କୁଲରେ କାମ କରୁଥିଲେ। ସେ ଦିଲ୍ଲୀର ରୋହିନିରେ ରହୁଥିବା ବେଳେ ଏବେ କରୋନା ମୁକାବିଲା ପାଇଁ ସାଜିଥିଲେ ଆଗଧାଡିର ଯୋଦ୍ଧା। ସରକାରଙ୍କ ଏକ ହଙ୍ଗର ରିଲିଫ୍ ସେଣ୍ଟରରେ ସେ ଭୋକିଲାମାନଙ୍କ ପାଇଁ ଖାଦ୍ୟ ଯୋଗାଇ ଆସୁଥିଲେ। ଏହାପରେ ସେ କରୋନାରେ ସଂକ୍ରମିତ ହୋଇ ମେ’ ୨ରେ ହସ୍ପିଟାଲରେ ଭର୍ତ୍ତି ହୋଇଥିବା ବେଳେ ମେ’ ୪ରେ ତାଙ୍କର ମୃତ୍ୟୁ ହୋଇଥିଲା। ଆଉ ମେ’ ୫ରେ ତାଙ୍କର କରୋନା ପଜିଟିଭ ବୋଲି ରିପୋର୍ଟ ହସ୍ତଗତ ହେଲା। ପ୍ରଥମେ ତାଙ୍କୁ ଡାକ୍ତର ବାବାସାହେବ ଆମ୍ବେଦକର ହସ୍ପିଟାଲରେ ଭର୍ତ୍ତି କରାଯାଇଥିବା ବେଳେ ପରେ ତାଙ୍କୁ ଡାକ୍ତର ରାମ ମନୋହର ଲୋହିଆ ହସ୍ପିଟାଲରେ ଭର୍ତ୍ତି କରାଯାଇଥିଲା। ସୂଚନାଯୋଗ୍ୟ, କରୋନା ଯୋଦ୍ଧା ଯେମିତିକି ହେଲ୍ଥ ଓ୍ବାର୍କର,ସିଭିଲ ଡିଫେନ୍ସ ପର୍ସନାଲ, ଟିଚର,ପୋଲିସମେନ ଓ ଫୟାରମେନଙ୍କ ମୃତ୍ୟୁରେ ତାଙ୍କ ପରିବାର ଲୋକଙ୍କୁ ୧ କୋଟି ଟଙ୍କା ପ୍ରଦାନ କରାଯିବ ବୋଲି ପୂର୍ବରୁ କେଜରିଓ୍ବାଲ ଘୋଷଣା କରିଥିଲେ।