କେନ୍ଦୁଝର, ୨୮ା୩ (ସ୍ବ.ପ୍ର.)-କରୋନା ସଂକ୍ରମଣ ରୋକିବା ପାଇଁ ଲକ ଡାଉନ ଘୋଷଣା, ଅନେକ ଜନଜୀବନକୁ ବ୍ୟତିବ୍ୟସ୍ତ କରିପକାଇଛି। ଲକ ଡାଉନ୍ ଘୋଷଣା ହେବା ପରେ ପ୍ଲାଷ୍ଟର ଅଫ ପ୍ୟାରିଶରେ ମୂର୍ତ୍ତି ଗଢି ଏବଂ ବଜାରରେ ବିକି ପେଟପୋଷୁଥିବା ରାଜସ୍ଥାନରୁ ଆସି ଏଠାରେ ଥିବା ବହୁ ଯାଯାବର ପରିବାର ଏବେ ଚିନ୍ତାରେ ରହିଛନ୍ତି। ହଠାତ ଲକ୍ ଡାଉନ୍ ଘୋଷଣା ଏବଂ ଟ୍ରେନ ଚଳାଚଳ ବନ୍ଦ ହୋଇଯିବାରୁ ଏହି ସବୁ ପରିବାର ଫେରିପାରିନାହାନ୍ତି। ସେପଟେ କାମଧନ୍ଧା ନ ଥିବାରୁ ସେମାନଙ୍କ ପାଖରେ ପଇସାପତ୍ର ମଧ୍ୟ ନାହିଁ। ଏବେ ଦୋକାନ ବଜାର ବନ୍ଦ ଓ କଟକଣା ଲାଗୁ ହେବାରୁ କିପରି ଛୁଆ ପିଲାଙ୍କୁ ଧରି ଚଳିବେ ଓ କଣ ଖାଇବେ ସେ ନେଇ ଚିନ୍ତାରେ ରହିଛନ୍ତି ା କେନ୍ଦୁଝରର ସ୍ଥାନୀୟ ଘୁଟୁରୁ ସତସଙ୍ଗ ବିହାର ନିକଟରେ ପଡିଆରେ ଟେଣ୍ଟ ଟାଣି ରାଜସ୍ଥାନର ୨ ପରିବାର ଅଛନ୍ତି। ୪/୫ ମାସ ହେଲା ସେମାନେ ଆସିଥିଲେ। ଏହା ପୂର୍ବରୁ ସେମାନେ ଭୂବନେଶ୍ୱରରେ ଥିଲେ। ସେମାନଙ୍କ ଅନ୍ୟ ପରିବାର ଲୋକ ମାନେ ଜିଲାର ବିଭିନ୍ନ ସ୍ଥାନରେ ଏଭଳି ରହି ମୂର୍ତ୍ତି ବିକି ଚଳୁଥିଲେ। ଆଉ ଅନ୍ୟମାନେ ଭୁବନେଶ୍ୱରରେ ଅଛନ୍ତି ବୋଲି ଗୌରୀ ଦେବୀ। ଆଉ ୨ରୁ ୩ ଦିନ ପରେ ଖାଇବା ସରିଯିବ ଓ କିପରି ଚଳିବୁ ବୋଲି ଆମ ଜିଲା ପ୍ରତିନିଧିଙ୍କୁ ଜଣାଇଛନ୍ତି। ସେମାନେ ପ୍ରତ୍ୟେକ ବର୍ଷ ଆସନ୍ତି। ବିଭିନ୍ନ ପ୍ରକାରର ମୂର୍ତ୍ତି ଗଢି ହାଟବଜାର ଓ ଗାଁଗଣ୍ଡା ବୁଲି ବିକିଥାନ୍ତି। ଯାହା ମିଳେ ସେଥିରୁ ଚଳିଥାନ୍ତି ବୋଲି କହିଛନ୍ତି ା କରୋନା ସଂକ୍ରମଣ ପାଇଁ ସବୁ ବନ୍ଦ ରହିଛି। ଗାଁ କୁ କିପରି ଯିବୁ ଓ ଏଠାରେ କିପରି ଚଳିବୁ ସେ ନେଇ ଚିନ୍ତାରେ ସମସ୍ତେ। ସେମାନଙ୍କୁ ପ୍ରଶାସନ ପକ୍ଷରୁ ଖାଦ୍ୟ ସାମଗ୍ରୀ ଯୋଗାଇଦେବାକୁ ସ୍ଥାନୀୟ ଲୋକେ ଦାବି କରିଛନ୍ତି।