ମୁମ୍ବାଇ: ସାରା ଦେଶରେ କରୋନା ପ୍ରକୋପ ଜାରି ରହିଛି। ଦିନକୁ ଦିନ କରୋନା ଭାଇରସ୍ରେ ଆକ୍ରାନ୍ତଙ୍କ ସଂଖ୍ୟା ବଢ଼ିବାରେ ଲାଗିଛି। ଏହାକୁ ରୋକିବା ପାଇଁ ସରକାର ବିଭିନ୍ନ ପଦକ୍ଷେପ ଗ୍ରହଣ କରୁଛନ୍ତି। କରୋନା ବିରୋଧରେ ଜାରି ରହିଥିବା ଲଢ଼େଇ ପାଇଁ ବିଭିନ୍ନ ସ୍ତରରୁ ସହାୟତାର ହାତ ବଢ଼ୁଛି। ଇତିମଧ୍ୟରେ ବଲିଉଡ୍ ଅଭିନେତା କାର୍ତ୍ତିକ ଆର୍ୟନ ମଧ୍ୟ ସହାୟତାର ହାତ ବଢ଼ାଇଛନ୍ତି। ପ୍ରଧାନମନ୍ତ୍ରୀ ରିଲିଫ୍ ପାଣ୍ଠିକୁ ସେ ଏକ କୋଟି ଟଙ୍କା ଦାନ କରିଥିବା ଜଣାପଡ଼ିଛି। ଏନେଇ କାର୍ତ୍ତିକ ଟୁଇଟ କରି କହିଛନ୍ତି, ଏଭଳି ଘଡିସନ୍ଧି ମୁହୂର୍ତ୍ତରେ ସମସ୍ତେ ଏକାଠି ହେବାର ସମୟ ଆସିଛି। ସେ ଆଜି ଯାହା ବି ଅଛନ୍ତି ଓ ଯାହା ଆୟ କରିଛନ୍ତି କେବଳ ଭାରତ ଲୋକଙ୍କ ପାଇଁ। ତେଣୁ ଲୋକଙ୍କ ସହାୟତା ପାଇଁ ଏହି ଦାନ କରୁଛି ବୋଲି କାର୍ତ୍ତିକ କହିଛନ୍ତି। ଏଥିସହ ସହାୟତା କରିବା ପାଇଁ ସେ ସମସ୍ତ ଦେଶବାସୀଙ୍କୁ ନିବେଦନ କରିଛନ୍ତି। ସେହିପରି ଗାୟକ ତଥା ର଼୍ୟାପର୍ସ ବାଦଶାହ ମଧ୍ୟ ପ୍ରଧାନମନ୍ତ୍ରୀ ରିଲିଫ୍ ପାଣ୍ଠିକୁ ୨୫ଲକ୍ଷ ଟଙ୍କା ପ୍ରଦାନ କରିଥିବା ଜଣାପଡ଼ିଛି। ଏନେଇ ସେ ଟୁଇଟ କରି କହିଛନ୍ତି, କରୋନା ବିରୋଧରେ ଜାରି ରହିଥିବା ସଂଘର୍ଷରେ ଦେଶ ପାଇଁ ତାଙ୍କ ପକ୍ଷରୁ ଏକ ଛୋଟ ଯୋଗଦାନ।
