ମୁମ୍ବାଇ, ୧୫।୩(ପି.ଟି.)- କରୋନା ଭାଇରସ ସଂକ୍ରମଣ ତଥା ଆତଙ୍କ କାରଣରୁ ଭାରତୀୟ କ୍ରିକେଟେ କଣ୍ଟ୍ରୋଲ ବୋର୍ଡ (ବିସିସିଆଇ) ଇରାନୀ ଟ୍ରଫି ସମେତ ସବୁ ପ୍ରକାର ଘରୋଇ ମ୍ୟାଚକୁ ସ୍ଥଗିତ ରଖିଛି। ଇରାନୀ ଟ୍ରଫିରେ ରଣଜୀ ଚାମ୍ପିୟନ ସୌରାଷ୍ଟ୍ର ଓ ଅବଶିଷ୍ଟ ଭାରତ ପରସ୍ପରକୁ ଭେଟିବାର କାର୍ଯ୍ୟକ୍ରମ ରହିଛି। ଇରାନୀକୁ ବାଦ୍ ଦେଲେ ଭିଜ୍ଜି ଟ୍ରଫି, ସିନିୟର ମହିଳା ଦିନିକିଆ ନକ୍ଆଉଟ ଓ ସିନିୟର ମହିଳା ଦିନିକିଆ ଚ୍ୟାଲେଞ୍ଜର ଟୁର୍ନାମେଣ୍ଟକୁ ମଧ୍ୟ ସ୍ଥଗିତ ରଖାଯାଇଛି ବୋଲି ବିସିସିଆଇ ତରଫରୁ ସ୍ପଷ୍ଟ କରାଯାଇଛି।
ପରବର୍ତ୍ତୀ ନୋଟିସ ନ ହେବା ପର୍ଯ୍ୟନ୍ତ ଜୁନିୟର ମହିଳା ଟୁର୍ନାମେଣ୍ଟଗୁଡିକୁ ମଧ୍ୟ ସ୍ଥଗିତ ରଖାଯାଇଛି। ଏଥିରେ ୧୯ ବର୍ଷରୁ କମ୍ ଦିନିକିଆ ନକ୍ଆଉଟ, ୧୯ ବର୍ଷରୁ କମ୍ ଟି୨୦ ଲିଗ୍, ସୁପର ଲିଗ ଓ ନକ୍ଆଉଟ, ୧୯ ବର୍ଷରୁ କମ୍ ଟି୨୦ ଚ୍ୟାଲେଞ୍ଜର ଟ୍ରଫି, ୨୩ ବର୍ଷରୁ କମ୍ ନକ୍ଆଉଟ ଓ ୨୩ ବର୍ଷରୁ କମ୍ ଦିନିକିଆ ଚ୍ୟାଲେଞ୍ଜର ସାମିଲ ରହିଛି। ବିସିସିଆଇ ସମ୍ପାଦକ ଜୟ ଶାହାଙ୍କ ସ୍ବାକ୍ଷର ସମ୍ବଳିତ ଏ ସଂକ୍ରାନ୍ତରେ ବିସିସିଆଇ ତରଫରୁ ଏକ ପ୍ରେସ୍ ବିଜ୍ଞପ୍ତି ଜାରି କରାଯାଇଛି।