ବେଜିଂ,୨୫।୨: କରୋନା ଭାଇରସର ଭୟାବହତା କମିବାର ନାଁ ନେଉନି। ଚାଇନାରେ ପ୍ରଥମକରି ଦେଖାଯାଇଥିବା ଏହି କରୋନା ଭାଇରସରେ ଏବେ ସେଠାରେ ପ୍ରାୟ ୭୭,୬୫୮ ଜଣ ଆକ୍ରାନ୍ତ ହୋଇଥିବା ବେଳେ ଏଥିରେ ସଂକ୍ରମିତ ଥିବା ୨,୬୬୩ ଜଣଙ୍କର ମୃତ୍ୟୁ ହୋଇ ସାରିଲାଣି। ଚାଇନାର ହୁବଇ ଅଞ୍ଚଳରେ କରୋନା ଭାଇରସରେ ସର୍ବାଧିକ ଲୋକଙ୍କ ମୃତ୍ୟୁ ହୋଇଛି। ଏହି ମହାମାରୀ ଏବେ ପାଖାପାଖି ୩୧ ଦେଶକୁ ବ୍ୟାପିଥିବା କୁହାଯାଉଛି। ଏଥିମଧ୍ୟରେ ଚାଇନା ପରେ ସାଉଥ୍ କୋରିଆରେ ସର୍ବାଧିକ କରୋନା ସଂକ୍ରମିତଙ୍କୁ ଚିହ୍ନଟ କରାଯାଇଛି। ତେବେ ଜାପାନ ଉପକୂଳରେ ଲାଗିଥିବା ଏକ ଜାହାଜରେ ଫଶି ରହିଥିବା ପ୍ରାୟ ୩ ହଜାର ଲୋକଙ୍କ ମଧ୍ୟରୁ କେତେକଙ୍କୁ ଛାଡି ଦିଆଯାଇଥିବା ବେଳେ ଅନ୍ୟ କେତେଜଣ ଏବେବି ଜାହାଜରେ ଫସି ରହିଛନ୍ତି। ପୂର୍ବରୁ ଜାପାନ ଉପକୂଳରେ ଲାଗିଥିବା ଏହି ଜାହାଜ ଡାଇମଣ୍ଡ ପ୍ରିନସେସ୍ରେ କରୋନା ଭାଇରସ ଯୋଗୁ ୩ ଜଣଙ୍କ ମୃତ୍ୟୁ ହୋଇଥିବା ବେଳେ ଏବେ ଆଉ ଜଣଙ୍କର ମୃତ୍ୟୁ ହୋଇଥିବା ସୂଚନା ମିଳିଛି। ମୃତ ବ୍ୟକ୍ତିଙ୍କ ବୟସ ପାଖାପାଖି ୮୦ ବର୍ଷ ହେବ ବୋଲି କୁହାଯାଉଛି। ହେଲେ ତାଙ୍କ ସମ୍ପର୍କରେ ବିଶେଷ ସୂଚନା ମିଳିପାରି ନାହିଁ। ଅନ୍ୟପଟେ ଉକ୍ତ ଜାହାଜରେ ଫଶି ରହିଥିବା କେତେଜଣ ଭାରତୀୟ କରୋନା ଭାଇରସରେ ସଂକ୍ରମିତ ହୋଇଥିବା ବେଳେ ଅନ୍ୟ କେତେଜଣ ସେମାନଙ୍କୁ ଉଦ୍ଧାର କରିବାକୁ କେନ୍ଦ୍ର ସରକାରଙ୍କୁ ଅନୁରୋଧ କରିଛନ୍ତି।