ନୂଆଦିଲ୍ଲୀ,୧୦।୩: ରଙ୍ଗର ପର୍ବ ହୋଲି ସାରା ଦେଶରେ ପାଳନ କରାଯାଉଥିବା ବେଳେ ଚଳିତ ବର୍ଷ କିନ୍ତୁ ଏହି ପର୍ବ ସାମାନ୍ୟ ଫିକା ପଡିଥିବା ପରିଲକ୍ଷିତ ହୋଇଛି। ଚାଇନା ରଙ୍ଗଠାରୁ ଦୂରେଇ ରହିବା ଓ କରୋନା ଭାଇରସ ସଂକ୍ରମଣ ଭୟରେ ଅନେକ ସ୍ଥାନରେ ଲୋକେ ରଙ୍ଗ ଖେଳିବାଠାରୁ ଦୂରେଇ ରହିଥିବା ଦେଖାଯାଉଛି। ଅନ୍ୟପଟେ ସ୍ବାସ୍ଥ୍ୟ ବିଭାଗ ପକ୍ଷରୁ ମଧ୍ୟ କରୋନା ଭାଇରସକୁ ନେଇ ରଙ୍ଗ ନ ଖେଳିବାକୁ ବାରଣ କରାଯିବା ସହ ରଙ୍ଗ ଖେଳିବା ବେଳେ କେତେଗୁଡିଏ ଦିଗ ପ୍ରତି ନଜର ରଖିବାକୁ କୁହାଯାଇଛି। ରଙ୍ଗ ଖେଳିବା ସମୟରେ କେବଳ ପରିବାର ଲୋକଙ୍କ ସହ ରଙ୍ଗ ଖେଳିବା ଭଲ ବୋଲି କହିଛି ସ୍ବାସ୍ଥ ବିଭାଗ। ଏହାସହ ଏହି ସମୟରେ କାହାକୁ ଆଲିଙ୍ଗନ ନ କରିବା, କାହାସହ ହାତ ନ ମିଳାଇବା ଆଦିକୁ ବାରଣ କରାଯାଇଛି। ସୂଚନାଯୋଗ୍ୟ, ଏବେ ସାରା ବିଶ୍ୱର ପ୍ରାୟ ୧୦୦ ଦେଶକୁ ବ୍ୟାପିଥିବା କରୋନା ଭାଇରସ ସମସ୍ତଙ୍କୁ ଚିନ୍ତାରେ ପକାଇ ଦେଇଛି। ଭାରତରେ ଏବେସୁଦ୍ଧା ୪୩ ଜଣ କରୋନା ଭାଇରସରେ ସଂକ୍ରମିତ ବୋଲି ଜଣାପଡିଛି।