ରୋମ,୧୫।୩(ପି.ଟି.)- ଇଟାଲୀ ଫୁଟବଲ ଲିଗ୍ ସିଷ୍ଟମର ଏକ ପେସାଦାର ଲିଗ୍ ଭାବେ ଜଣାଶୁଣା ଥିବା ସିରିଜ ଏ’ରେ ମୋଟ ୧୧ ଜଣ ଖେଳାଳି କରୋନା ଭାଇରସ୍ରେ ସଂକ୍ରମିତ ହୋଇଛନ୍ତି। ଏହା ଏକ ସଙ୍କଟଜନକ ପରିସ୍ଥିତି ବୋଲି ସିରିଜ ଏ’ର ଡାକ୍ତରମାନେ ଘୋଷଣା କରିଛନ୍ତି। ପରିସ୍ଥିତିରେ ଉନ୍ନତି ନ ଆସିବା ପର୍ଯ୍ୟନ୍ତ ଟ୍ରେନିଂ ତଥା ପ୍ରଶିକ୍ଷଣ ଜାରି ନ ରଖିବାକୁ ଡାକ୍ତରମାନେ ପରାମର୍ଶ ଦେଇଛନ୍ତି। ସର୍ବିୟା ଫରଓ୍ବାର୍ଡ ଡୁସେନ ଭ୍ଲାହୋଭିକ୍ଙ୍କ ସମେତ ଫିଓରେଣ୍ଟିନା ଦଳର ୪ଜଣ ସଦସ୍ୟ ଓ ପିଜିଓ ଥେରାପିଷ୍ଟ ଏହି ଭାଇରସ୍ ଦ୍ୱାରା ସଂକ୍ରମିତ ହୋଇଥିବା କଥା ଶୁକ୍ରବାର ଜଣାପଡିଥିଲା। ସେହିପରି ଇଟାଲୀ ମିଡ୍ଫିଲ୍ଡର ଡେପାଓଲି ଓ ପୋଲାଣ୍ଡ ଡିଫେଣ୍ଡର ବେରେସ୍ଜିନ୍ସ୍କିଙ୍କ ସମେତ ସାମ୍ପଡୋରିଆର ୭ ଜଣ ଖେଳାଳି ଶନିବାର ସଂକ୍ରମିତ ହୋଇଥିବା ସ୍ପଷ୍ଟ ହୋଇଥିଲା। ଏହାପୂର୍ବରୁ ଚଳିତ ସପ୍ତାହରେ ଜୁଭେଣ୍ଟସ କ୍ଲବ ଡିଫେଣ୍ଡର ଡାନିଏଲେ ରୁଗାନି ମଧ୍ୟ ସଂକ୍ରମଣର ଶିକାର ହୋଇଥିଲେ। ଉଲ୍ଲେଖଖାଉ କି, ସିରିଜ ଏ ସମେତ ଇଟାଲୀରେ ସବୁ ପ୍ରକାର କ୍ରୀଡ଼ାକୁ ଏପ୍ରିଲ ୩ ତାରିଖ ପର୍ଯ୍ୟନ୍ତ ସ୍ଥଗିତ ରଖାଯାଇଛି। ଶନିବାର ସୁଦ୍ଧା ଦେଶରେ ଏପର୍ଯ୍ୟନ୍ତ ୨୧, ୧୫୭ ଜଣ ବ୍ୟକ୍ତି କୋରାନା ଭାଇରସରେ ସଂକ୍ରମିତ ହୋଇଥିବା ଇଟାଲୀ କର୍ତ୍ତୃପକ୍ଷ ଘୋଷଣା କରିଛନ୍ତି। ଏହି ଭାଇରସ ଦ୍ୱାରା ଏପର୍ଯ୍ୟନ୍ତ ୧,୪୪୧ ଜଣ ବ୍ୟକ୍ତି ମୃତ୍ୟୁମୁଖରେ ପଡିଛନ୍ତି। ଚାଇନା ପରେ ଇଟାଲୀ ଏବେ କରୋନା ଭାଇରସ ଦ୍ୱାର ସବୁଠାରୁ ଅଧିକ ପ୍ରଭାବିତ ହୋଇଛି।