ଦଶରଥପୁର,୯।୩(ଡିଏନ୍ଏ): ଭୟଙ୍କର ସଂକ୍ରମିତ କରୋନା ରୋଗ ଏବେ ପୃଥିବୀର ସମସ୍ତ ଦେଶକୁ ଧୀରେଧୀରେ କରାୟତ କରିଚାଲିଛି। ଫଳରେ ସବୁ ଦେଶର ଲୋକଙ୍କ ମନରେ ଏକ ଭୟର ବାତାବରଣ ସୃଷ୍ଟି ହୋଇଛି। ପ୍ରତ୍ୟେକ ଦିନ ଏହି ରୋଗରେ ଆକ୍ରାନ୍ତ ରୋଗୀଙ୍କ ସଂଖ୍ୟା ବଢ଼ି ଚାଲିଥିବାବେଳେ ରୋଗାଗ୍ରସ୍ତ ମୃତ୍ୟୁ ସଂଖ୍ୟା ମଧ୍ୟ ବଢିଚାଲିଛି। ଏହି ରୋଗକୁ ୱାଲ୍ଡ ହେଲ୍ଥ ଅର୍ଗାନାଇଜେଶନ୍ (ଡବ୍ଲ୍ୟୁଏଚ୍ଓ) ଜାତୀୟ ମହାମାରୀ ରୋଗଭାବେ ଘୋଷଣା କରିବା ସହ ବିଶ୍ୱ ସମୁଦାୟ ଏହି ରୋଗକୁ ରୋକାଯିବା ଉପରେ ବିଭିନ୍ନ ପଦକ୍ଷେପ ଆରମ୍ଭ କରିଦେଇଛନ୍ତି। ତେବେ ଏହି କରୋନା ପାଇଁ ଏଥର ହୋଲି ଫିକା ପଡ଼ିବାର ଆଶଙ୍କା ଦେଖାଦେଇଛି। ଫଳରେ ରଙ୍ଗ ବେପାର ଉପରେ ଏହାର ଖୁବ୍ ପ୍ରଭାବ ପଡ଼ିଛି। ଦଶରଥପୁର ବ୍ଲକ ଅଞ୍ଚଳର ବଡ଼ ବ୍ୟବସାୟିକ ପେଣ୍ଠସ୍ଥଳ କୁହାଯାଉଥିବା ମଙ୍ଗଳପୁର ଓ ଝୁମ୍ପୁରୀ ବଜାରରେ ପ୍ରତ୍ୟେକ ବର୍ଷ ହୋଲିରେ ବ୍ୟବସାୟୀମାନେ ବିଭିନ୍ନ ରଙ୍ଗର ପସରା ମେଲାଇ ବିକ୍ରି କରିଥାନ୍ତି। ମାତ୍ର କରୋନା ସଂକ୍ରମଣ ଯୋଗୁ ସଚେତନତା ପୂର୍ବକ ହାତ ସଫା କରିବା, ମୁହଁରେ ମାସ୍କ ପିନ୍ଧିବା, ଜନସମାଗମ ସ୍ଥାନକୁ ନ ଯିବା, ଏପରି ଅନେକ ସତର୍କତା ଅବଲମ୍ବନ ପାଇଁ ସମଗ୍ର ସ୍ବାସ୍ଥ୍ୟବିଭାଗ ପକ୍ଷରୁ ସୂଚନା ଦିଆଯାଉଛି। ଯଦ୍ଦ୍ବାରା ରଙ୍ଗ ବେପାର ଏଥର ପୁରା ମାନ୍ଦା ହୋଇଛି ବୋଲି ଦଶରଥପୁର ବ୍ଲକର ମଙ୍ଗଳପୁର ଓ ଝୁମ୍ପୁରୀ ବଜାରରେ ରଙ୍ଗ ଦୋକାନ ଖୋଲିଥିବା କେତେଜଣ ବ୍ୟବସାୟୀ ଏହି ସୂଚନା ଦେଇଛନ୍ତି। ବଜାରକୁ ଆସିଥିବା ରଙ୍ଗରେ କରୋନା ଭୂତାଣୁ ଥିବା ଆଶଙ୍କା କରି ଅଧିକାଂଶ ଗ୍ରାହକ ରଙ୍ଗ କିଣୁ ନ ଥିବା ଦୋକାନୀମାନେ କହିଛନ୍ତି। ରଙ୍ଗଖେଳ ପର୍ବ ହୋଲିକୁ ମାତ୍ର ଦିନଟିଏ ବାକିଥିବାବେଳେ ପ୍ରତ୍ୟେକ ବର୍ଷର ରଙ୍ଗ ବେପାର ଅନୁଯାୟୀ ଏଥର ଶତକଡା ୭୦ ଭାଗ ବ୍ୟବସାୟ କମିଥିବା ବ୍ଲକ ଅଞ୍ଚଳର କେତେଜଣ ରଙ୍ଗ ବ୍ୟବସାୟୀ ପ୍ରକାଶ କରିଛନ୍ତି। କରୋନା ସତର୍କତା ଓ ରଙ୍ଗଖେଳ ପ୍ରଭାବ ସମ୍ପର୍କରେ ମଙ୍ଗଳପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରୀ ଉମାକାନ୍ତ ମଲ୍ଲିକଙ୍କୁ ପଚାରିବାରେ, ରଙ୍ଗଖେଳ ସହ କରୋନା ସଂକ୍ରମଣର ସେପରି ଯଦିଓ କୌଣସି ସମ୍ପର୍କ ନାହଁି, ତଥାପି ସ୍ବାସ୍ଥ୍ୟବସ୍ଥା ଠିକ୍ ନ ଥିବା ଲୋକ କେମିକାଲ୍ଯୁକ୍ତ ରଙ୍ଗ ନ ଖେଳିବା ଉଚିତ ବୋଲି କହିଛନ୍ତି।