ଭୁବନେଶ୍ୱର,୧୬।୩(ବ୍ୟୁରୋ): କରୋନା ଭୟାବହତାକୁ ଦୃଷ୍ଟିରେ ରଖି ଫିଲ୍ମ ଓ ଧାରାବାହିକ ଶୁଟିଂକୁ ବନ୍ଦ କରିବାକୁ ନିଷ୍ପତ୍ତି ହୋଇଛି। ଏଥିଲାଗି ହାତ ମିଳାଇଛନ୍ତି ଇଣ୍ଡିଆନ୍ ମୋଶନ ପିକ୍ଚର ପ୍ରଡ୍ୟୁସର୍ସ ଆସୋସିଏଶନ (ଆଇଏମ୍ପିପିଏ), ଓ୍ବେଷ୍ଟର୍ନ ଇଣ୍ଡିଆ ଫିଲ୍ମ ପ୍ରଡ୍ୟୁସର୍ସ ଆସୋସିଏଶନ (ଡବ୍ଲ୍ୟଆଇପିଏଫ୍ଏ), ଇଣ୍ଡିଆନ୍ ଫିଲ୍ମ ଆଣ୍ଡ୍ ଟିଭି ପ୍ରଡ୍ୟୁସର୍ସ କାଉନ୍ସିଲ (ଆଇଏଫ୍ଟିପିସି), ଇଣ୍ଡିଆନ୍ ଫିଲ୍ମ ଆଣ୍ଡ୍ ଟେଲିଭିଜନ ଡାଇରେକ୍ଟର୍ସ ଆସୋସିଏଶନ (ଆଇଏଫ୍ଟିଡିଏ) ଏବଂ ଫେଡେରେଶନ ଅଫ୍ ଓ୍ବେଷ୍ଟର୍ନ ଇଣ୍ଡିଆ ସିନେ ଏମ୍ପ୍ଲଇଜ୍ (ଏଫ୍ଡବ୍ଲ୍ୟୁଆଇସିଇ)। ରବିବାର ଅନୁଷ୍ଠିତ ଏକ ମିଳିତ ବୈଠକରେ ଫିଲ୍ମ ସହ ସମସ୍ତ ଟେଲି ଧାରାବାହିକ, ଓ୍ବେବ୍ ସିରିଜ ଏବଂ ଡିଜିଟାଲ ପ୍ଲାଟ୍ଫର୍ମର ସମସ୍ତ ମନୋରଞ୍ଜନଧର୍ମୀ କାର୍ଯ୍ୟକ୍ରମର ଶୁଟିଂକୁ ଆସନ୍ତା ୧୯ ତାରିଖରୁ ୩୧ ପର୍ଯ୍ୟନ୍ତ ବନ୍ଦ ରଖିବାକୁ ସ୍ଥିର କରାଯାଇଛି। ଏପଟେ କେନ୍ଦ୍ର ସରକାରଙ୍କ ନିଷ୍ପତ୍ତିକ୍ରମେ ସମସ୍ତ ସିନେମା ହଲ୍, ଶିକ୍ଷାନୁଷ୍ଠାନ, ମହୋତ୍ସବକୁ ବନ୍ଦ କରାଯାଇଥିବାବେଳେ ପ୍ରଯୋଜକ ଆସୋସିଏଶନ ଏଥିରେ ସମସ୍ତ ପ୍ରକାର ସହାୟତା ଯୋଗାଇଦେବ ବୋଲି କହିଛି। ତେବେ ୧୯ ତାରିଖ ପର୍ଯ୍ୟନ୍ତ ଶୁୁଟିଂ କରୁଥିବା ସଂସ୍ଥା ସମସ୍ତ ପ୍ରକାର ପ୍ରାକ୍ ସଚେତନମୂଳକ ପଦକ୍ଷେପ ଗ୍ରହଣ କରିବାକୁ କୁହାଯାଇଛି। ୩୦ ତାରିଖରେ ଆଉ ଏକ ବୈଠକ ବସି ପରିସ୍ଥିତିକୁ ଦୃଷ୍ଟିରେ ରଖି ପରବର୍ତ୍ତୀ ନିଷ୍ପତ୍ତି ନିଆଯିବ ବୋଲି ଇଣ୍ଡିଆନ୍ ମୋଶନ ପିକ୍ଚର ପ୍ରଡ୍ୟୁସର୍ସ ଆସୋସିଏଶନ କହିଛି।
ଏପଟେ ଓଡ଼ିଶାରେ ମଧ୍ୟ ସମସ୍ତ ଚଳଚ୍ଚିତ୍ର ଓ ଧାରାବାହିକର ଶୁଟିଂ ବନ୍ଦ କରିବାକୁ ଓଡ଼ିଶା ପ୍ରଡ୍ୟୁସର୍ସ ଆସୋସିଏଶନ ନିଷ୍ପତ୍ତି ନେଇଛି। ମନୋରଞ୍ଜନ ଶିଳ୍ପ ସହ ଜଡ଼ିତ ବ୍ୟକ୍ତିବିଶେଷଙ୍କ ସୁରକ୍ଷା ଲାଗି ଏପରି ନିଷ୍ପତ୍ତି ନିଆଯାଇଥିବାବେଳେ ୩୧ ତାରିଖ ପର୍ଯ୍ୟନ୍ତ ସମସ୍ତ ଶୁଟିଂ ବନ୍ଦ ରହିବ। ଧାରାବାହିକଗୁଡ଼ିକ ପୂର୍ବରୁ ଶୁଟିଂ ସରିଥିବା ଏପିସୋଡ୍ରେ ଚାଲିବ। ୧୫ଦିନ ପରେ ପରବର୍ତ୍ତୀ ନିଷ୍ପତ୍ତି ନିଆଯିବ ବୋଲି ପ୍ରଡ୍ୟୁସର୍ ଆସୋସିଏଶନ୍ର ଏକ୍ଜିକ୍ୟୁଟିଭ୍ ବଡି ସଦସ୍ୟ ଲୁଟୁ ମହାନ୍ତି କହିଛନ୍ତି।