କରୋନା ଭାଇରସ୍ ସାରା ବିଶ୍ୱରେ ଆତଙ୍କ ସୃଷ୍ଟି କରିଛି। ଏହାକୁ ନେଇ ଲୋକଙ୍କ ମନରେ ଭୟର ବାତାବରଣ ସୃଷ୍ଟି ହୋଇଛି। ଯଦି କେହି ଛିଙ୍କୁଛନ୍ତି ତେବେ ସମସ୍ତେ କରୋନା ଭାଇରସ୍ ସଂକ୍ରମଣ ନେଇ ଭୟଭୀତ ହୋଇପଡ଼ୁଛନ୍ତି। କିଛି ଏଭଳି ଦୃଶ୍ୟ ଦେଖିବାକୁ ମିଳିଛି ଏୟାର ଏସିଆ ଇଣ୍ଡିଆର ପୁଣେ-ଦିଲ୍ଲୀ ବିମାନରେ। ଶୁକ୍ରବାର ଏହି ବିମାନରେ ଜଣେ କରୋନା ସନ୍ଦିଗ୍ଧ ଯାତ୍ରା କରୁଥିବା ଜାଣି ଲୋକଙ୍କ ମଧ୍ୟରେ ହଇଚଇ ସୃଷ୍ଟି ହୋଇଥିଲା। କାରଣ ବିମାନ ଅବତରଣ ସମୟରେ ଜଣେ ସନ୍ଦିଗ୍ଧ ଯାତ୍ରୀ ଛିଙ୍କିଦେଇଥିଲେ। ଏନେଇ ଜାଣିବା ପରେ ପାଇଲଟ୍ ଜଣଙ୍କ ଝରକା ଦେଇ ଓହ୍ଲାଇ ପଡ଼ିଥିଲେ। ସାଧାରଣତଃ ପାଇଲଟ ଓହ୍ଲାଇବା ପାଇଁ ବିମାନର ସାମ୍ନା ଗେଟ୍ର ବ୍ୟବହାର କରନ୍ତି। ହେଲେ ଯେତେବେଳେ ଜାଣିବାକୁ ପାଇଲେ ଯେ, ପ୍ରଥମ ଧାଡିରେ ବସିଥିବା ଯାତ୍ରୀ ଜଣଙ୍କ ଛିଙ୍କିଦେଇଛନ୍ତି, ସେହି ସମୟରେ ଭୟଭୀତ ହୋଇ ପାଇଲଟ ଜଣଙ୍କ କକ୍ପିଟ୍ ବା ଇମାରଜେନ୍ସି ଗେଟ୍ ଦେଇ ବାହାରକୁ ପଳାଇ ଆସିଥିଲେ। ଏହାପରେ ସବୁ ଯାତ୍ରୀ ମଧ୍ୟ ଭୟଭୀତ ହୋଇ ପଛ ଝରକା ଦେଇ ସୁରକ୍ଷିତ ଭାବେ ବାହାରକୁ ବାହାରି ଯାଇଥିଲେ। ଆଉ ଉକ୍ତ ସନ୍ଦିଗ୍ଧ ଯାତ୍ରୀଙ୍କୁ ସାମ୍ନା ଗେଟ୍ରୁ ବାହାରକୁ ବାହାର କରାଯାଇଥିଲା। ଏହାପରେ ସମସ୍ତ ଯାତ୍ରୀଙ୍କର କରୋନା ନେଇ ଯାଞ୍ଚ କରାଯାଇଥିଲା। ତେବେ ସମସ୍ତଙ୍କ ରିପୋର୍ଟ ନେଗେଟିଭ୍ ଆସିଥିବା ଜଣାପଡ଼ିଛି। ସୁରକ୍ଷା ଦୃଷ୍ଟିରୁ ବିମାନ ଅବତରଣ ପରେ ବିମାନକୁ ଅଲଗା ରଖାଯାଇଛି। ଏହି ଘଟଣା ଘଟିବା ପରେ ଏୟାର ଏସିଆ ଇଣ୍ଡିଆର ମୁଖପାତ୍ରଙ୍କ ବୟାନ ସାମ୍ନାକୁ ଆସିଛି। ସେ କହିଛନ୍ତି, ଆଣ୍ଟି ଇନ୍ଫେକ୍ସନ୍ ଦ୍ୱାରା ବିମାନକୁ ସଫା କରାଯାଇଛି। ଏଭଳି ଘଟଣା ପାଇଁ ପୂର୍ବରୁ ଆମର ପାଇଲଟ ପ୍ରଶିକ୍ଷିତ ଓ ପ୍ରସ୍ତୁତ ରହିଥାନ୍ତି। ଏଭଳି ସ୍ଥିତିରେ ଉକ୍ତ ପାଇଲଟଙ୍କ ଉପସ୍ଥିତି ବୁଦ୍ଧି ଓ ଧର୍ଯ୍ୟକୁ ଏୟାର ଏସିଆ ଇଣ୍ଡିଆର ମୁଖପାତ୍ର ପ୍ରଶଂସା କରିଛନ୍ତି।