ସେଣ୍ଡାଇ(ଜାପାନ),୨୨।୩(ଏଏଫ୍ପି)- କରୋନା ଭାଇରସର ପ୍ରକୋପ ସତ୍ତ୍ୱେ ନର୍ଥଇଷ୍ଟର୍ନ ଜାପାନରେ ରବିବାର ଅନୁଷ୍ଠିିତ ଅଲିମ୍ପିକ୍ସ ମଶାଲ କାର୍ଯ୍ୟକ୍ରମରେ ୫୦ ହଜାର ଦର୍ଶକ ଯୋଗ ଦେଇଛନ୍ତି। ଗୁରୁବାର ଆୟୋଜିତ ଏକ ସ୍ବତନ୍ତ୍ର କାର୍ଯ୍ୟକ୍ରମରେ ଗ୍ରୀସ୍ ଟୋକିଓ ୨୦୨୦ ଗେମ୍ସ ଆୟୋଜକଙ୍କୁ ଅଲିମ୍ପିକ ମଶାଲ ହସ୍ତାନ୍ତର କରାଯାଇଥିଲା। ରୁଦ୍ଧଦ୍ୱାର ମଧ୍ୟରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। କରୋନା ଭାଇରସ ଯୋଗୁ ଅଲିମ୍ପିକ୍ସ ପ୍ରଭାବିତ ହେବାର ବିଶେଷ ସମ୍ଭାବନା ରହିଛି। ବହୁ କ୍ରୀଡ଼ାର ଯୋଗ୍ୟତା ପର୍ଯ୍ୟାୟ ବାତିଲ କିମ୍ବା ସ୍ଥଗିତ ହୋଇଯାଇଛି। ବିଭିନ୍ନ ଦେଶର ଅଲିମ୍ପିକ କମିଟି ଓ କିମ୍ବଦନ୍ତୀ ଖେଳାଳିମାନେ ଅଲିମ୍ପିକ୍ସକୁ ଘୁଞ୍ଚାଇବାକୁ ପରାମର୍ଶ ଦେଇଛନ୍ତି। ଏହାସତ୍ତ୍ୱେ ଅଲିମ୍ପିକ୍ସ ଧାର୍ଯ୍ୟ ତାରିଖରେ ଆରମ୍ଭ ହେବ ବୋଲି ଆୟୋଜକମାନେ ଦୃଢ଼ୋକ୍ତି ଦେଇଛନ୍ତି। ପ୍ରାୟ ୫୦ ହଜାର ଦର୍ଶକ ସେଣ୍ଡାଇ ଷ୍ଟେଶନଠାରେ ଧାଡ଼ିରେ ଛିଡ଼ା ହୋଇ ଅଲିମ୍ପିକ୍ ମଶାଲ ଦେଖିଥିଲେ। ଗଣମାଧ୍ୟମରେ ପ୍ରକାଶ ପାଇଥିବା ରିପୋର୍ଟ ଅନୁଯାୟୀ, ଦର୍ଶକ କିଛି ଘଣ୍ଟା ପାଇଁ ଧାଡ଼ିରେ ଛିଡ଼ା ହେବାକୁ ପଡ଼ିଥିଲା। ସେମାନଙ୍କ ମଧ୍ୟରେ ପ୍ରାୟତଃ ମାସ୍କ ପିନ୍ଧିଥିଲେ। ସେମାନେ ଫଟୋ ମଧ୍ୟ ନେଇଥିଲେ। ମୁଁ ଅଲିମ୍ପିକ୍ ମଶାଲକୁ ଦେଖିବା ଲାଗି ୩ ଘଣ୍ଟା ଧରି ଲାଇନରେ ଛିଡ଼ା ହୋଇଥିଲି ବୋଲି ଜଣେ ୭୦ ବର୍ଷୀୟା ମହିଳା କହିଛନ୍ତି। ଆସନ୍ତା ୨୬ ତାରିଖଠାରୁ ପୂରା ଦେଶରେ ମଶାଲ ରାଲି ଆରମ୍ଭ ହେବ। ଏହା ଫୁକୁଶିମାର ଜେ-ଭିଲେଜ ସ୍ପୋଟର୍ସ କମ୍ପେ୍ଲକ୍ସଠାରୁ ଆରମ୍ଭ ହେବ।