ନ୍ୟୁୟର୍କ,୧୩ା୩: କରୋନା ଭାଇରସ୍ ମହାମାରୀ ୧୨୦ ଦେଶରେ ଆତଙ୍କ ଖେଳାଇ ଚାଲିଛି। ଏହାର ପ୍ରଭାବ ସମଗ୍ର ବିଶ୍ୱବାସୀଙ୍କ ଉପରେ ପଡ଼ିଛି। ଏହି ସଂକଟଜନକ ସ୍ଥିତିରେ ଆମେରିକା, ଯୁକ୍ତରାଷ୍ଟ୍ର ଆମେରିକା, ୟୁରୋପ ପରି ଦେଶର ଧନୀ ଶ୍ରେଣୀର ଲୋକେ ନିଜକୁ କରୋନା ଭାଇରସ୍ରୁ ବଞ୍ଚାଇବା ପାଇଁ ବ୍ୟକ୍ତିଗତ ଜେଟ୍, ବଙ୍କର ଏବଂ ଅଣ୍ଡରଗ୍ରାଉଣ୍ଡ ଗୃହ ବୁକ୍ କରୁଛନ୍ତି। ଏଥିସହ ବ୍ୟକ୍ତିଗତ ଭାବେ ଡାକ୍ତର ଏବଂ ନର୍ସଙ୍କୁ ମଧ୍ୟ ନିଯୁକ୍ତି ଦେଉଛନ୍ତି। ଯାହାକି ପରିବାର ସଦସ୍ୟଙ୍କୁ କରୋନା ସଂକ୍ରମଣରୁ ରକ୍ଷା କରିପାରିବ। ଏଥିପାଇଁ ବିଶ୍ୱର ନାମୀଦାମୀ ଡାକ୍ତରଙ୍କ ସହ ଯୋଗାଯୋଗ ମଧ୍ୟ ଜାରି ରଖିଛନ୍ତି।
ଆମେରିକାର ବେସରକାରୀ ଜେଟ୍ ବୁକିଂ ସେବା ପ୍ରାଇଭେଟ୍ ଫ୍ଲାଇର ମୁଖ୍ୟ କାର୍ଯ୍ୟନିର୍ବାହୀ ଆଡାମ ଟ୍ବିଡେଲ କୁହନ୍ତି, କରୋନା ଭାଇରସ୍ ଦ୍ୱାରା ପ୍ରଭାବିତ ଦେଶଗୁଡ଼ିକର କୋଟିପତିମାନେ ଜରୁରିକାଳୀନ ପରିସ୍ଥିତିରେ ଘରୁ ସୁରକ୍ଷିତ ସ୍ଥାନକୁ ଯିବା ପାଇଁ ଘରୋଇ ଜେଟ୍ ବୁକ୍ କରୁଛନ୍ତି। କାରଣ ଏପରି କଲେ କରୋନା ଭାଇରସ୍ ପରୀକ୍ଷା ଅନ୍ୟ ଦେଶରୁ କରାଯାଇପାରିବ କିମ୍ବା ସେମାନଙ୍କ ନମୁନା ପରୀକ୍ଷା ପାଇଁ ଅନ୍ୟ ଦେଶକୁ ସହଜରେ ପଠାଯାଇପାରିବ। ଧନିକମାନେ କୋଭିଡ୍ -୧୯ ଟିକାକରଣ ପାଇଁ କହୁଛନ୍ତି। ଏହି ଟିକା ମିଳିବା ଏତେ ସହଜ ନୁହେଁ। ପ୍ରାୟ ୧ ବର୍ଷରୁ ଅଧିକ ସମୟ ଲାଗିପାରେ ବୋଲି ସେ କହିଛନ୍ତି।