ଜୁନାଗଡ,୧୨।୪(ଡି.ଏନ୍.ଏ.)-ମହାମାରୀ କରୋନା ଭୁତାଣୁ ସଂକ୍ରମଣକୁ ନିୟନ୍ତ୍ରଣ କରିବା ପାଇଁ ସରକାର ଲକ୍ଡାଉନ ଜାରି କରିଛନ୍ତି। ଏହାର ପ୍ରଭାବରେ ଅନେକ ଲୋକ ନିଜ ଜୀବିକା ହରାଇ ବସିଛନ୍ତି। ଫଳରେ ସେମାନଙ୍କ ଚଳିବା ଏବେ କଷ୍ଟକର ହୋଇପଡିଛି। ଏପରି ଦୃଶ୍ୟ ଦେଖିବାକୁ ମିଳିଛି ଚିତ୍ରକର,ରଙ୍ଗତୂଳୀ ଶିଳ୍ପୀ କାରିଗରଙ୍କ କ୍ଷେତ୍ରରେ। ରଙ୍ଗତୂଳୀ ମାଧ୍ୟମରେ ନିଜ ସଂସାର ଚଳାଉଥିବା ଏମାନଙ୍କ ଜୀବନଜୀବିକା ଏବେ କରୋନା ଯୋଗଁୁ ଦୁର୍ବିସହ ହୋଇପଡିଛି। ଏହି ପରିପ୍ରେକ୍ଷୀରେ କଳାହାଣ୍ଡି ଜିଲାର ଶତାଧିକ ରଙ୍ଗତୁଳୀ ଶିଳ୍ପୀ, ମୂର୍ତ୍ତି କାରିଗର, ଯାନବାହାନ ଷ୍ଟିକରିଂ କରୁଥିବା କାରରଗର ଏବେ ଲକ୍ଡାଉନ କଟକଣା ଯୋଗଁୁ ଜୀବିକା ହରାଇ ଘରେ ବସିଛନ୍ତି। ବିବାହ, ବ୍ରତ ପରି ମାଙ୍ଗଳିକ କାର୍ଯ୍ୟ, ସରକାରୀ ଓ ବେସରକାରୀ ବିଜ୍ଞାପନ ଓ ସାଇନ ବୋର୍ଡ କରି ସେମାନେ ନିଜ ପରିବାର ପ୍ରତିପୋଷଣ କରିଥାନ୍ତି। ସରକାର ୨୧ଦିନର ଲକ୍ଡାଉନ ପରେ ପୁନର୍ବାର ଏପ୍ରିଲ ୩୦ ପର୍ଯ୍ୟନ୍ତ ବୃଦ୍ଧି କରିଛନ୍ତି। ଯାହାଫଳରେ ସେମାନଙ୍କ ପରିବାର ଚଳିବା ଏବେ କଷ୍ଟକର ହୋଇପଡିଛି। ସରକାର ଏଥିପ୍ରତି ଦୃଷ୍ଟିଦେଇ ଏହି କାରୀଗରମାନଙ୍କୁ ଆର୍ଥିକ ସହାୟତା ଯୋଗାଇ ଦେବାପାଇଁ ଜିଲା ଚିତ୍ରଶିଳ୍ପୀ କଳାକାର ସଂଘ ସଭାପତି ହିମାଂଶୁ ଶେଖର ନାଏକ, ବରିଷ୍ଠ ଶିଳ୍ପୀ ଶ୍ରୀବନ୍ତ ଭାର, ଶିବଶଙ୍କର ମହାନନ୍ଦ ତଥା ଅନ୍ୟାନ କର୍ମକର୍ତ୍ତମାନେ ନିବେଦନ କରିଛନ୍ତି।