ଭୁବନେଶ୍ୱର, ୨୯।୫(ବ୍ୟୁରୋ): କରୋନା ମୁକାବିଲାରେ ଓଡ଼ିଶା ଅଗ୍ରଣୀ ରାଜ୍ୟ ବୋଲି ଗୁରୁବାର କେନ୍ଦ୍ର କ୍ୟାବିନେଟ୍ ସଚିବ ରାଜୀବ ଗୌବାଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଆଲୋଚନା ହୋଇଛି। ମୁଖ୍ୟ ଶାସନ ସଚିବ ଅସିତ ତ୍ରିପାଠୀ ଏବଂ ସ୍ବାସ୍ଥ୍ୟ ବିଭାଗ ଅତିରିକ୍ତ ଶାସନ ସଚିବ ପ୍ରଦୀପ୍ତ କୁମାର ମହାପାତ୍ରଙ୍କ ସମେତ ବରିଷ୍ଠ ଅଧିକାରୀମାନେ ଭିଡିଓ କନ୍ଫରେନ୍ସିଂ ବୈଠକରେ ସାମିଲ ହୋଇଛନ୍ତି। କରୋନା ନେଇ ବିଭିନ୍ନ ରାଜ୍ୟର ସ୍ଥିତି ସମ୍ପର୍କରେ ଏକ ସମୀକ୍ଷା କରାଯିବାପରେ ଜଣାପଡ଼ିଛି, କରୋନା ପରିଚାଳନାରେ ଓଡ଼ିଶା ଅଗ୍ରଣୀ ସ୍ଥାନରେ ରହିଛି। ରାଜ୍ୟର ପ୍ରତି ନିୟୁତ ଜନସଂଖ୍ୟାରେ ୩୦୨୯ ପରୀକ୍ଷା କରାଯାଇଛି। ସର୍ବଭାରତୀୟ ସ୍ତରରେ ଏହି ସଂଖ୍ୟା ୨୪୯୦ ରହିଛି। ଜାତୀୟସ୍ତର ହାର ଅନୁଯାୟୀ ପ୍ରତି ୨୧ ପରୀକ୍ଷାରୁ ଜଣେ ଲେଖା କରୋନା ପଜିଟିଭ ବାହାରୁଥିବା ବେଳେ ଓଡ଼ିଶାରେ ଏହି ସଂଖ୍ୟା ଅତି କମ୍ ରହିଛି। ଏଭଳି ସ୍ଥିତିରେ ଓଡ଼ିଶାରେ ହାରାହାରି ୮୪ ନମୁନାରୁ ଗୋଟିଏ ପଜିଟିଭ କେସ୍ ମିଳୁଛି। ମୃତ୍ୟୁହାରରେ ବର୍ତ୍ତମାନ ପର୍ଯ୍ୟନ୍ତ ଓଡ଼ିଶା ୦.୪୨ପ୍ରତିଶତ ଥିବାବେଳେ ସର୍ଭଭାରତୀୟ ମୃତ୍ୟୁହାର ୨.୮୬ପ୍ରତିଶତ ରହିଛି। ଏବେସୁଦ୍ଧା ରାଜ୍ୟରେ ୧,୩୯,୩୧୧ ନମୁନା ପରୀକ୍ଷା କରାସରିଛି। ରାଜ୍ୟରେ ୪୯ପ୍ରତିଶତ ଭାଗ ଆକ୍ରାନ୍ତ ଲୋକ ସୁସ୍ଥ ହୋଇଛନ୍ତି। ସର୍ବଭାରତୀୟ ହାରଠାରୁ ପ୍ରାୟ ୭ପ୍ରତିଶତ ଅଧିକ।
