ଭୁବନେଶ୍ୱର, ୧୪ା୪: କରୋନା ମୁକାବିଲା ପାଇଁ ଏବେ ସାମୂହିକ ଲଢ଼େଇ ଚାଲିଛି। ଲକ୍ଡାଉନ୍ ପାଇଁ ବର୍ତ୍ତମାନ ଉପୁଜୁଥିବା ବିଭିନ୍ନ ସମସ୍ୟାର ସମାଧାନ ସବୁଠୁ ଗୁରୁତ୍ୱପୂର୍ଣ୍ଣ ହୋଇପଡିଛି। ଏଭଳିସ୍ଥଳେ ସ୍ବାସ୍ଥ୍ୟ ସେବା, ଟେକ୍ନୋଲୋଜି ଇଣ୍ଡଷ୍ଟ୍ରି, ସାମାଜିକ ଓ ସରକାରୀ କ୍ଷେତ୍ରରେ କାର୍ଯ୍ୟ କରୁଥିବା ଏକାଧିକ ଷ୍ଟାର୍ଟଅପ୍ ସେମାନଙ୍କ କାର୍ଯ୍ୟଧାରାକୁ ବଦଳାଇ ଦେଇଛନ୍ତି। ଏକାଠି ହୋଇ କରୋନା ମୁକାବିଲା ପାଇଁ ଅଣ୍ଟା ଭିଡିଛନ୍ତି। ପୂର୍ବରୁ ବିଜ୍ନେସ୍-ଟୁ-ବିଜ୍ନେସ୍(ବିଟୁବି) ଥିବା ଷ୍ଟାର୍ଟଅପ୍ଗୁଡ଼ିକ ଏବେ ଇ-କମର୍ସ ପ୍ଲାଟଫର୍ମ ଭଳି ବିଜ୍ନେସ୍-ଟୁ-କନ୍ଜ୍ୟୁମର୍(ବିଟୁସି) ଫର୍ମାଟରେ କାର୍ଯ୍ୟ କରୁଛନ୍ତି। ଅତ୍ୟାଧୁନିକ ଟେକ୍ନୋଲୋଜି ମାଧ୍ୟମରେ ସିଧାସଳଖ ଲୋକଙ୍କୁ ଅତ୍ୟାବଶ୍ୟକ ସାମଗ୍ରୀ ଓ ସେବା ଯୋଗାଇ ଦେଉଛନ୍ତି। ହୋମ୍ ଡେଲିଭରୀରୁ ଆରମ୍ଭ କରି ଇ-ମେଡିସିନ ପର୍ଯ୍ୟନ୍ତ, ସବୁକ୍ଷେତ୍ରରେ ଏହି ଷ୍ଟାର୍ଟଅପ୍ଗୁଡ଼ିକ ପ୍ରମୁଖ ଭୂମିକା ଗ୍ରହଣ କରିଛନ୍ତି।
କେବଳ ଓଡ଼ିଶାରେ ନୁହେଁ, ଜାତୀୟସ୍ତରରେ ମଧ୍ୟ ଏକାଧିକ ସଂସ୍ଥା ଏବେ କରୋନା ସଂକ୍ରମଣ ରୋକିବାକୁ ଆଗେଇ ଆସିଛନ୍ତି। ସ୍ବାସ୍ଥ୍ୟ ସେବା କ୍ଷେତ୍ରରେ ବିଭିନ୍ନ ଟେକ୍ ଷ୍ଟାର୍ଟଅପ୍ ସହଯୋଗରେ କେନ୍ଦ୍ର ସରକାର ଓ ବିଭିନ୍ନ ରାଜ୍ୟର ସରକାର ‘ଆରୋଗ୍ୟ ସେତୁ’, ‘କରୋନା କବଚ’, ‘ମହାକବଚ’, ‘କୋଭିଡ୍-୧୯ କ୍ୱାରାଣ୍ଟାଇନ ମନିଟର୍’, ‘କ୍ୱାରାଣ୍ଟାଇନ୍ ୱାଚ୍’, ‘କରୋନା ୱାଚ୍’, ‘କୋଭିଡ୍-୧୯ ଫିଡ୍ବ୍ୟାକ’ ଭଳି ଆପ୍ ପ୍ରସ୍ତୁତ କରିଛନ୍ତି। ଫଳରେ ଜନସାଧାରଣଙ୍କ ସ୍ବାସ୍ଥ୍ୟଗତ ସମସ୍ୟା ବୁଝିବା ସହ କରୋନା ସନ୍ଦିଗ୍ଧଙ୍କ ସମ୍ପୂର୍ଣ୍ଣ ତଥ୍ୟ ଓ ସେମାନଙ୍କ ସଂସ୍ପର୍ଶରେ ଆସିଥିବା ଲୋକଙ୍କୁ ଟ୍ରାକ୍ କରିବାରେ ସହଜ ହୋଇଛି। କ୍ରେଡ୍, ହୋମ୍ଲେନ୍, ବ୍ଲାକ୍ବକ୍, ମାଇଁଗେଟ୍, ୱାନ୍ଏମ୍ଜି, ମ୍ୟାପ୍ମାଇଁଇଣ୍ଡିଆ ଭଳି ଏକାଧିକ ପ୍ରତିଷ୍ଠିତ ସଂସ୍ଥା ଟେଲିମେଡିସିନ ମାଧ୍ୟମରେ ଟେଷ୍ଟିଂ, ମଲ୍ଟିଷ୍ଟେଜ୍ ଟେଷ୍ଟିଂ ପ୍ରୋସିଜିଓର୍, ଟେଷ୍ଟ୍କିଟ୍ ଓ ବିଭିନ୍ନ ମେଡିକାଲ ଉପକରଣ ପ୍ରସ୍ତୁତ କରିବା ଦିଗରେ କାର୍ଯ୍ୟ କରୁଛନ୍ତି। ସେହିଭଳି ଷ୍ଟେଜ୍-୩ ପାଇଁ ଭାରତକୁ ପ୍ରସ୍ତୁତ ରଖିବା, ଗୋଷ୍ଠୀ ସଂକ୍ରମଣକୁ ଆକଳନ କରିବା ଭଳି କ୍ଷେତ୍ରରେ ମଧ୍ୟ ଏମାନେ କାର୍ଯ୍ୟ କରୁଛନ୍ତି।