ସୁନ୍ଦରଗଡ, ୨ା୪ (ଡି.ଏନ୍.ଏ) : କରୋନା ସଚେତନତା ଅଭିଯାନରେ ସାମିଲ ହୋଇଛନ୍ତି ସୁନ୍ଦରଗଡ ବିଧାୟିକା କୁସୁମ ଟେଟେ। ସୁନ୍ଦରଗଡ ପୌରାଞ୍ଚଳ ଓ ସଦର ବ୍ଲକର ବିଭିନ୍ନ ଅଞ୍ଚଳକୁ ଯାଇ ସେ ଲୋକଙ୍କୁ ସଚେତନ କରୁଛନ୍ତି। ବିଧାୟିକା ସୁନ୍ଦରଗଡ ନାରୀ କଲ୍ୟାଣ କେନ୍ଦ୍ରଠାରେ ହୋଇଥିବା କ୍ୱାରେଣ୍ଟାଇନ୍ ଓ୍ବାର୍ଡ ବୁଲି ଦେଖିବା ସହ ଅଟକ ଥିବା ଲୋକଙ୍କ ସୁବିଧା, ଅସୁବିଧା ପଚାରି ବୁଝିଥିଲେ। ହାତଧୁଆ ସାବୁନ୍ ବଣ୍ଟନ କରି ନିୟମିତ ହାତ ଧୋଇବାକୁ ବୁଝାଇଥିଲେ। ସେହିପରି ସଦର ବ୍ଲକର ସାଲେପାଲି, କୁଲଟା, ଲେଡିମଙ୍ଗ, ବିରବିରା, ମଝାପଡା, କର୍ଲା, ଭଷ୍ମା, କୁଣ୍ଡୁକେଲା, ଦେଉଳୀ, ମସ୍ନିକାନି, ଭେଡାବାହାଲ, ଲଙ୍କାହୁଡା ଆଦି ପଂଚାୟତ ପରିଦର୍ଶନ କରି ପଂଚାୟତ ଗୁଡିକରେ ହୋଇଥିବା ଆଇସୋଲେସନ ଓାର୍ଡ ବୁଲି ଦେଖିଥିଲେ । ଏଭଳି କଠିନ ସମୟରେ ଗ୍ରାମବାସୀଙ୍କ ସମସ୍ୟା ବୁଝିବା ସହିତ ସରକାରଙ୍କ ଦ୍ୱାରା ଆଗୁଆ ୩ମାସର ଭତ୍ତା ଓ ଖାଉଟୀ ସାମଗ୍ରୀ ଠିକ ଭାବେ ମିଳୁଛି କି ନାହିଁ ଲୋକଙ୍କୁ ପଚାରି ବୁଝିଥିଲେ ।