ଦାରିଙ୍ଗବାଡ଼ି,୨୧।୩(ଡି.ଏନ୍.ଏ.): କରୋନା ଭୂତାଣୁକୁ ପ୍ରତିହତ କରିବା ପାଇଁ ଜିଲା ପ୍ରଶାସନ ଅଣ୍ଟା ଭିଡ଼ିଛି । ୧୪୪ ଧାରାକୁ ବଜାୟ ରଖିବା ସହ ଦୋକାନ ବଜାର ବନ୍ଦ ରଖିବା ପାଇଁ ପୋଲିସ ପକ୍ଷରୁ ସୂଚନା ଦିଆଯାଇଛି। ଆଇଆଇସି କୌଶିକ ମାଝୀଙ୍କ ନେତୃତ୍ୱରେ ଏସ୍ଆଇ ଅନିଲ କୁମାର ଦେବତା ସଦଳବଳ ସମସ୍ତ ଦୋକାନ ବଜାରକୁ ବନ୍ଦ କରିଛନ୍ତି। ଶନିବାର ସକାଳୁ ଦାରିଙ୍ଗବାଡ଼ି ପୋଲିସ ଦାରିଙ୍ଗବାଡ଼ି ସମେତ ସିମନବାଡ଼ି, କିରିକୁଟି, ପର୍ତ୍ତମାହା, ଶ୍ରାନିକେତା ପ୍ରମୁଖ ବ୍ୟବସାୟ ସ୍ଥଳରେ ପହଞ୍ଚି ଚା’ ଜଳଖିଆ ସମେତ ଲୁଗା ଦୋକାନ, ଉଠା ଦୋକାନ ଆଦିକୁ ବନ୍ଦ କରିଛନ୍ତି। କେବଳ ରାଶନ, ଓଷଧ ଏବଂ ପନିପରିବା ଦୋକାନକୁ ଖୋଲା ରଖାଯିବା ସହ ଗହଳିକୁ ରୋକାଯାଇଛି। କୌଣସି ଛକ, ବଜାରରେ ଜନଗହଳିକୁ ପୋଲିସ ଏଡ଼ାଇବା ସହ ଲୋକଙ୍କୁ ନିଜ ଘରେ ରହିବାକୁ ପରାମର୍ଶ ଦେଉଛି। କରୋନା ଭୂତାଣୁ ଯେଭଳି ସଂକ୍ରମଣ ନ ହେବ, ସେନେଇ ପୋଲିସ ପକ୍ଷରୁ ଜୋରଦାର ପ୍ରୟାସ କରାଯିବା ସହ ଆକ୍ସନ ମୁଡ୍ରେ ପୋଲିସ କାର୍ଯ୍ୟ କରୁଛି। ସେହିପରି ଦାରିଙ୍ଗବାଡ଼ିଠାରେ ଥିବା ବିଦେଶୀ ମଦ ଦୋକାନକୁ ଶନିବାରଠାରୁ ବନ୍ଦ କରାଯିବ ବୋଲି ଆଇଆଇସି ମାଝୀ ସୂଚନା ଦେଇଛନ୍ତିି। ଯେଉଁ ବ୍ୟବସାୟୀ ନିର୍ଦ୍ଦେଶ ଅବମାନନା କରିବେ, ସେମାନଙ୍କ ବିରୋଧରେ ଆଇନଗତ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କୁହାଯାଇଛି।
ଦାରିଙ୍ଗବାଡ଼ି ଅଞ୍ଚଳକୁ ବାହାର ରାଜ୍ୟରୁ ଫେରୁଥିବା ଲୋକଙ୍କୁ ପୋଲିସ ଯାତ୍ରୀବାହୀ ବସ୍ରୁ ନେଇ ସ୍ବାସ୍ଥ୍ୟକେନ୍ଦ୍ରରେ ପହଞ୍ଚାଇ ସ୍ବାସ୍ଥ୍ୟ ପରୀକ୍ଷା କରାଉଛି। ଜିଲାରେ ଯେଭଳିି ଜଣେ ମଧ୍ୟ କରୋନାରେ ସଂକ୍ରମଣ ନ ହେବେ, ସେନେଇ ଜିଲାପାଳ ଡ. ବୃନ୍ଦା ଡି ସମସ୍ତ ଚେଷ୍ଟା ଚଳାଇଛନ୍ତି।
