ଝାରସୁଗୁଡ଼ା ଅଫିସ,୧୦ା୪: କେନ୍ଦ୍ର ସରକାରଙ୍କ ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ହର୍ଷବର୍ଦ୍ଧନ ଶୁକ୍ରବାର ଦେଶର ବିଭିନ୍ନ ରାଜ୍ୟର ସ୍ବାସ୍ଥ୍ୟମନ୍ତ୍ରୀଙ୍କ ସହ ଭିଡିଓ କନ୍ଫରେନ୍ସିଂ ଜରିଆରେ କରୋନା ମୁକାବିଲା ନେଇ ସମୀକ୍ଷା କରିଛନ୍ତି। ଏହି ପରିପ୍ରେକ୍ଷିରେ ଓଡ଼ିଶା ସରକାରଙ୍କ ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ନବ କିଶୋର ଦାସ ଝାରସୁଗୁଡା ଜିଲାପାଳଙ୍କ କାର୍ଯ୍ୟାଳୟରେ ଥିବା ଏନ୍ଆଇସି ପ୍ରକୋଷ୍ଠରେ ଉପସ୍ଥିତ ରହି ଆଲୋଚନା ଓ ସମୀକ୍ଷାରେ ସାମିଲ ହୋଇଥିଲେ। କେନ୍ଦ୍ର ସ୍ବାସ୍ଥ୍ୟ ମନ୍ତ୍ରୀଙ୍କ ସହିତ ଆଲୋଚନା ବେଳେ ସେ ରାଜ୍ୟ ପାଇଁ ବିଭିନ୍ନ ଦାବି କରିଛନ୍ତି। ଓଡ଼ିଶା ସରକାର କରୋନାକୁ ରାଜ୍ୟ ବିପର୍ଯ୍ୟୟ ଘୋଷଣା କରିସାରିଥିବା ବେଳେ ଏହାକୁ ରୋକିବା ପାଇଁ ବିଭିନ୍ନ ପଦକ୍ଷେପ ଗ୍ରହଣ କରିସାରିଛନ୍ତି। ବର୍ତ୍ତମାନ ସୁଦ୍ଧା ୧୫ଶହରୁ ଊର୍ଦ୍ଧ୍ୱ ଶଯ୍ୟା ନିମନ୍ତେ କୋଭିଡ ହସ୍ପିଟାଲଗୁଡିକ ପ୍ରତିଷ୍ଠା ହୋଇସାରିଛି। ଆଗକୁ ୬ ହଜାର ବେଡ୍ ବୃଦ୍ଧି କରିବାକୁ ଯୋଜନା ରହିଛି। ଏଣୁ କରୋନ ମୁକାବିଲା ନେଇ କେନ୍ଦ୍ର ସରକାରଙ୍କ ପକ୍ଷରୁ ରାଜ୍ୟ ସରକାରଙ୍କୁ ଯେଉଁ ଅନୁଦାନ ପ୍ରଦାନ କରାଯାଇଛି ତାହା ଅନ୍ୟ ରାଜ୍ୟ ତୁଳନାରେ କମ୍। ଏଣୁ ଏହି ଅନୁଦାନକୁ ବୃଦ୍ଧି କରିବାକୁ ସେ ଦାବି କରିଛନ୍ତି। ସେହିପରି ୫ ଲକ୍ଷ ପିପିଇ କିଟ୍ ସହ ଆରଟିପିସିଆର କିଟ୍, କ୍ୱାରାଣ୍ଟାଇନ ଟାବଲେଟ୍, ମାସ୍କ, ସାନିଟାଇଜର ଆଦି ପର୍ଯ୍ୟାପ୍ତ ପରିମାଣରେ ଯୋଗାଇ ଦେବାକୁ ଦାବି କରିଛନ୍ତି। ସେହିପରି ରାଜ୍ୟର ଅନୁସୁଚିତ ଜାତି ଓ ଜନଜାତି ଅଞ୍ଚଳ ପାଇଁ ସ୍ବତନ୍ତ୍ର ଗାଇଡ୍ ଲାଇନ ପ୍ରସ୍ତୁତକରି ପ୍ରତିଶେଧକ ବ୍ୟବସ୍ଥା କରିବାକୁ ମଧ୍ୟ ରାଜନ୍ୟ ସ୍ବାସ୍ଥ୍ୟମନ୍ତ୍ରୀ ଦାସ ଦାବି କରିଛନ୍ତି।
