ଭୁବନେଶ୍ୱର,୨୬ା୩(ବ୍ୟୁରୋ): କରୋନା ଭୂତାଣୁର ମୁକାବିଲା ପାଇଁ ଲକଡାଉନ ଘୋଷଣା ପରେ ଓଡ଼ିଶା ପୋଲିସର କାର୍ଯ୍ୟ ବଢ଼ିଯାଇଛି। ଗତ ସପ୍ତାହରୁ ଧରି ଏଯାବତ ପୋଲିସମାନେ ଜଗିରହି ଲୋକଙ୍କୁ ସଚେତନ କରିବା ସହ ଘରୁ ନ ବାହାରିବା ପାଇଁ ଦିନରାତି ବୁଲି ପ୍ରଚାର କରୁଛନ୍ତି। ସେମାନଙ୍କ ଏଭଳି ନିଷ୍ଠା କାର୍ଯ୍ୟ ଓଡ଼ିଶାବାସୀଙ୍କ ମନ ଜିଣିଛି। ସେମାନେ ନିଜ ଜୀବନ ବାଜି ଲଗେଇ ସମାଜ ପାଇଁ କାମ କରୁଛନ୍ତି। ପୋଲିସଙ୍କ ଏଭଳି କାର୍ଯ୍ୟଶୈଳୀକୁ ଦେଖି ଅଭିନନ୍ଦନ ଜଣାଇଛନ୍ତି ପୋଲିସ ଡିଜି ଅଭୟ। ସେ ଆହୁରି କହିଛନ୍ତି ଯେ, ତାଲାବନ୍ଦ ୩ ସପ୍ତାହ ଚାଲିବ, କିନ୍ତୁ କରୋନା ଲଢ଼େଇ ୬ ମାସ ଚାଲିବ। ଓଡ଼ିଶାବାସୀଙ୍କ ସ୍ବାସ୍ଥ୍ୟ ଓ ଜୀବନ ରକ୍ଷା ପାଇଁ ଆମକୁ ଗୁରୁଦାୟିତ୍ୱ ମିଳିଛି । ଏ ନେଇ ଆମକୁ ଦୀର୍ଘ ସମୟ ପାଇଁ ସମର୍ପିତ ରହିବାକୁ ପଡ଼ିବ। ରାଜ୍ୟବାସୀଙ୍କ ସ୍ବାସ୍ଥ୍ୟ, ଜୀବନ ରକ୍ଷା ଆମ ଦାୟିତ୍ୱ ବୋଲି ଡିଜିପି କହିଛନ୍ତି। କରୋନାକୁ ନେଇ ଆଜି ବି ଅନେକ ଲୋକ ଲକଡାଉନ ନିୟମକୁ ଉଲ୍ଲଂଘନ କରିଛନ୍ତି। ଦୁଇଦିନ ମଧ୍ୟରେ ରାଜ୍ୟରେ ନିୟମ ଉଲ୍ଲଂଘନ କରିଥିବା ଅଭିଯୋଗରେ ୪୦୪ରୁ ଊଦ୍ଧର୍ବ ମାମଲା ରୁଜୁ ହୋଇଛି। ଲକ ଡାଉନ ଉଲ୍ଲଂଘନରେ ୩୮୦, ହୋମ କ୍ୱାରାଣ୍ଟାଇନ ନିୟମ ଭାଙ୍ଗି ୧୦ଟି ଏବଂ କୋଭିଡ-୧୯ ନିୟମ ଉଲ୍ଲଂଘନରେ ୧୪ଟି ମାମଲା ରୁଜୁ ହୋଇଛି। ଏଣିକି ଯେଉଁମାନେ ଲକଡାଉନ ନିୟମକୁ ମାନୁ ନାହାନ୍ତି ସେମାନଙ୍କ ବିରୋଧରେ କଡ଼ା କାଯ୍ୟାନୁଷ୍ଠାନ ଗ୍ରହଣ କରାଯାଉଛି ବୋଲି କହିଛନ୍ତି।