ବଡ଼ସାହି,୧୬।୪(ସ୍ବପ୍ର)- କରୋନା ମହାମାରୀର ମୁକାବିଲା ପାଇଁ ମୟୂରଭଞ୍ଜ ଜିଲା ବଡ଼ସାହି ବ୍ଲକ ଅଧୀନ ବେଲପାଳ ସରସ୍ବତୀ ଶିଶୁ ବିଦ୍ୟା ମନ୍ଦିର ପକ୍ଷରୁ ପ୍ରଧାନମନ୍ତ୍ରୀ ରିଲିଫ ଫଣ୍ଡକୁ ୧୦ହଜାର ଟଙ୍କା ପ୍ରଦାନ କରାଯାଇଛି। ଏହି ରାଶି ବଡ଼ସାହି ବିଡ଼ିଓ ଦିଲୀପ କୁମାର ମହାରଣାଙ୍କ ଜରିଆରେ ଚେକ ମାଧ୍ୟମରେ ପ୍ରଦାନ କରାଯାଇଛି। ସାରା ବିଶ୍ବରେ କରୋନା ଭୂତାଣୁ ମହାମାରୀ ଭାବେ ନିଜର କାୟା ବିସ୍ତାର କରି ଚାଲିଛି। ଏହାର ମୁକାବିଲା ପାଇଁ ଭାରତ ସରକାରଙ୍କ ରିଲିଫ ଫଣ୍ଡକୁ ସରସ୍ବତୀ ଶିଶୁ ବିଦ୍ୟା ମନ୍ଦିରରେ କାର୍ଯ୍ୟରତ ସମସ୍ତ ଗୁରୁମା ଗୁରୁଜୀ ଓ କର୍ମଚାରୀମାନେ ଦିନକର ଦକ୍ଷିଣା ଦେବାକୁ ସ୍ଥିର କରିଥିଲେ। ପରିଚାଳନା କମିଟିର ସମସ୍ତ ସଦସ୍ୟ ଏବଂ ଶିଶୁ ମନ୍ଦିର ସହିତ ଜଡ଼ିତ ଥିବା କର୍ମକର୍ତ୍ତାମାନେ ମିଳିତ ଭାବେ ୧୦ହଜାର ଟଙ୍କା ପ୍ରଦାନ କରିଛନ୍ତି। ପରିଚାଳନା କମିଟିର ସମ୍ପାଦକ ନୀଳାଦ୍ରି ବିହାରୀ ଦଣ୍ଡପାଟଙ୍କ ନେତୃତ୍ୱରେ ଉପସଭାପତି ରସାନନ୍ଦ ବଳା, ପ୍ରଧାନ ଆଚାର୍ଯ୍ୟ ଶାଶ୍ବତୀ ଦାସ ମହାପାତ୍ର, ଗୁରୁମା ଏମ ପୁଲସ୍ତମୀ ପ୍ରମୁଖ ଉପସ୍ଥିତ ରହି ଏହି ସହାୟତା ପ୍ରଦାନ କରିଥିଲେ।